¹ Pine u Yesu wikile pase kufuma kuchitunda lwungano ikulu wafwatile. ² Lola, iwiwala wawala wamwinamila kumbele yakwe, watela, nkali, nge uilinginye unganavwa unelufye." ³ U Yesu wagolosha unkono wakwe wankomiya, watela, "Nilinginye ukwelupa." Paponye welupa iwala dyakwe. ⁴ U Yesu wampozya, "Lolaya utatele kwandu yoyosi. Lema izila yako, ilondezye wankala kwa mwene na ufunye indupo yene u Musa walagizye, kwa ajili ya umashuda wao" ⁵ Isambo u Yesu pene wafikile pa Kapernaumu, undwani wazile kukwakwe wambwilikisya ⁶ watela, "Nkali, ukatumwa wane alambalile kukaya watalala na wawawikwa ziwipe." ⁷ U Yesu wampozya, "Ngwiza npulushe." ⁸ Undwani wampozya wati, "Nkali unene kasi nandu wapangamaliwa mpaka uize palulu yanumba yane, panga inongwa tu ukatumwa wane apona. ⁹ Vine unene ndili nukali, na ndili na adwani wine wali pase yane. Nge natela kwa yuyu, "Wala' na awala, nu uwinji "Iza, akwiza, nuchilongelo wane, longa uli, napinye alonga vivyonye" ¹⁰ Pine u Yesu wivwa hulo, wakasamile ngani wawapozya wine alinge wakunkonga izya mwene nawapozya, njele imbonaye undu iwi izumilo changati uyu pa Israeli. ¹¹ Nampozya, awinji wakwiza kufuma kungwembele na kwitimba, wakwikala pa meza nu Abrahimu, Isaka, na Yakobo, ku umwene iwa kululu. ¹² Ila awana iwa umwene wasumbwa ku chisi icha kuzi, kwine kukuwa na kulila na kukusha amino." ¹³ U Yesu wampozya undwani, "Wala! Changati vino wazumilile, na ilongiwe hivyo kulu wewe, uchilongelo waponile isambo lilo. ¹⁴ Pine u Yesu wafikile ku numba ya Petro, wambwine uninavyala dya Petro alambalile awinile izegema. ¹⁵ U Yesu wapalakishe unkono wakwe, ne izegema yandekela, ngani walangazya wanzya kukundongela. ¹⁶ Pine yafika umangolwa, awandu watwalila u Yesu awinu iwa mazimu. Wawachimbizya amazimu yosi na awinu wawapulusha wapona. ¹⁷ Ngani yakwile yala yene yapangiwe nu u Isaya umbwilagu, "Umwene wasendile imina zyitu na kupapa imina yitu.'' ¹⁸ Pine u Yesuwaliona iungano ya mpilima, wawelekezya wawale upande uwinji iwa lukuwa dwa Galilaya. ¹⁹ Ngani umwandikaji wambalela wampozya, "Ngukonga kokosi kwine uwala." ²⁰ U Yesu wampozya, "Ubwea ali na malindi, ne inoni izya kululu zili ni visanzo, epa na mwana wa Adamu atakola nanga apalambaleka untwe wakwe." ²¹ Ukatumwa yumwi wampozya wati, "Nkali, ndeka tamu mbale nganzyike utayi ane." ²² Ngani u Yesu wampozya, "Ngonga, leke afwile wazyeke afwile wao." ²³ U Yesu pine winjile imbwato, akatumwa wakwe wankonga imbwato. ²⁴ Lola, wizile umweya unkali palulu yalukuwa lwine lwakupikiwe na amatundumsi. U Yesu alinge ayonile. ²⁵ Akatumwa wakwe wiza wandangazya watela wati, "Nkali, tupulushe usweswe, twapalamila kukufwa!" ²⁶ U Yesu wawapozya, "Kuchiyi mutina, umwemwe wine mulinizumilo iche?" Pene walangazya wakalipila umweya wa ndukuwa. Pine kwatekama, ²⁷ achilume wakasamile watela wati, ''Undu uyu iwa uni, mwine nanga umweya iwa ndukuwa ukunzumila umwene?" ²⁸ Pine u Yesu alinge aizile upande uwamiao wase iya Magadala, achilume wawili wene wameniwe na mazimu wakomengine nakwe. Linge wafumilile kumawila alinge walinevulugu chisini, nanga awandu linge watakatishaya izila ila. ²⁹ Lola, wapokwite kwilingo kukuti, "Tulinachiyi ichalonga kukwako, mwana wa Mulungu? Uizile kutugazya nanga isambo litafika?" ³⁰ Iungano ikulu idya nguluwe alinge lisungwa, linge kasi pautani napene linge wali, ³¹ amazimu yazyizye kukumunanika u Yesu yatela yati. "Nge umavwamba tuuke tutwale kwiungato idya nguluwe." ³² U Yesu wawapozya, "Wali!" Amazimu yawafuma yawala kunguluwe. Lola, iwungano ikulu dyosi lika kufuma kuchitunda likila ndukuwa dyafwila imazi. ³³ Achilume wine alinge wadima inguluwe wa chimbile. Pene wanzile nkaya wapangilile chila chindu, hasa chine hafumilile kwa achilume wala awamazimu. ³⁴ Lola, ikaya imbuma wiza kukomengana nu Yesu. Pine wambwine, wapozizye auke kusi yao.