¹ Utahukumu, na winye utize uhukumiwe. ² Ku hukumu yene umahukumu na winye uhukumiwa. Ni ichipimilo chene umapimila na winye ulipimiwe chicho. ³ Na kuchiyi umalola akapate kikwi kene kali mwiliso idyaka waminu, nanga ulo utamana akapate kigogo kene kali mwiliso dyako? ⁴ Umawezya wuni kutela kwa waminu kukuti, weta ngufunye akapate kene kali mwiliso dyako, pine ipate idyi gogo lili mwiliso dyako? ⁵ Ngulugulu wewe; yanda kufunya igogo dyene lili mwiliso dyako, na pine ulola ivinonu na kukafunya akapate kiikwi kene kali mwiliso dya wamina. ⁶ Utape imbwa chene ichisokofu, na utavwitile inguluwe ichindu ichinonu. Waviluwanga na kudyatadyata ku manama yao, kalinji wakugelukila uwewe na kukusasanga amapande pande. ⁷ Lenga, nawinye wakukupa. Vwamba nawinye upata. Iyuzya na winye wakukwiyulila. ⁸ Kwandu yoyosi yene amalenga, atanganaya. Na kwandu yoyosi yene wavwamba, apataya. Na kwandu yene wakwiyuzya, akwiyuliwa. ⁹ Ama kuli undu kuminu yene ngi, umwanakwe wandenga umkate angampa iwe? ¹⁰ Ama ngi wandenga iswi, nu mwene akumpa izoka? ¹¹ Epa umwemwe mwalonga mawi mmanile kuwapa awana winu ivindu ivinonu, Epa! Chinduchi ichikulu Utayi yene alikululu awapa ivindu ivinonu wala wene wakundenga umwene? ¹² Epa ngi umavwamba kulongiwa ichindu chochosi na wandu awanji, na winye umavwambiwa kuwalongela vivyo nye awene. Vine eyo yene amasunde aya awilagu. ¹³ Mwinjile kupitila undyango untinti. Vine undyongo unkulu ni zila ingulu yene yalongozya ku luwazi, na kuli awandu awinji wene wapita izila iyo. ¹⁴ Undyango untiti, undyango untinti yene izila yene yalongozya ku upuma na awache wene wawezya kuiona. ¹⁵ Walole awilagu awa ulongofi, wene wakwiza wavwite ingwembe iya ng'ozi, nanga ulo mmwene, akawila akali. ¹⁶ Kumakomi yao muwamana. Epa awandu wawezizye kukuza amakomi kumivwa, ama mwikwi mwene muli imbeyu iya mbaruti? ¹⁷ Ikwi inonu lilelaya amakomi amanonu, nanga ulo ikwi iwi lilelaya amakomi amawi. ¹⁸ Ikwi inonu tanga lilele amakomi amawi, nanga ikwi iwi tanga lilele amakomi amanonu. ¹⁹ Chila ikwi dyene litalela amakomi amakomi amanonu litipwa na kusumbiwa mundilo. ²⁰ Epa, uwamana kufumila kumakomi yao. ²¹ Kasi hilandu yene wambozya unene, 'Tayi, Tayi,' akwinjila kuwu mweene wa kululu, ngani yula adyumwi yene walonga amanonu kwa Tayi wane yene alikululu. ²² Awandu awinji wambozya ulusiku ulo, 'Tayi, Tayi, alinge tutafunya uwilangu kwi tawa dyako, alinge tutafunya amazimu kwi tawa dyako, na kwi tawa dyako twalongile aminji amakulu?' ²³ Pine nguwapozya pawelu, iza ndawa mana umwemwe! Uki kukwane, umwemwe yene mulonga amawi!' ²⁴ Epa chilandu yene wakwivwa inongwa zyane na kutimika akwifwana nu undu yene ali ni ishima yene azyengile inumba yakwa palulu ya chitunda. ²⁵ Ivula ngi yatona, umwalamo ngiwiza, nu mweya ngiwiza na kuilamba inumba iyo, nanga ulo itawezizye kukuwa pasi, vine iza izyengiwe palulu ya chitunda. ²⁶ Nanga ulo undu yene wakwivwa imbola yane na ataitimike, afwaninganywa nu undu untivu yene azyengile inumba yakwe palulu ya lusanga. ²⁷ Ivula iza, umwalamo ngi wiza, nu mweya ngiwiza na kuilamba inumba iyo. Na kukuwa, nu uluwazi wakwe watimila." ²⁸ Dyafikile isambo dyene u Yesu wamazile kupanga inongwa izi amagumbalo yosi yakasamizwe na malanganizyo yakwe, ²⁹ vine walanganizye changati undu yene ali na amaka, na kasi changati alanganizyi wao.