¹ Pimbila kasi kulonga yene amanonu kuwandu ngani kukwilondezya, ngi wawika ulo utakatengana indimbano kufuma kwa Tayi yene ali kululu. ² Ngi umafunya utalambe ichongo na ukwitogola wankala changati agulugulu vine walonga ku matekelo na kulumbanda, ngani kukuti awandu wawatogole. Mmwene nawapozya, ewo watangana mdupo yao. ³ Nanga ulo uwewe pine umafunya, unkono wako umongo utamane chene chilongiwa nu unkono undyilo, ⁴ ngani kukuti indupo yako ifunyiwe chimyamya. Pine Utayi wako yenye walola inkasi akukupa indupo yako. ⁵ Na pine umasalila, utawe changati agulugulu, vine watogwile kukwimilila na kusalila ku matekeo na imbelo ya lumbanda, ngani kukuti awanduwawalole. Mmwene nampozya, watangana indupo yao. ⁶ Nanga ulo uwewe, pene umasalila, injila inumba. Iyalila undyango, usalile kwa Tayi wako yene ali inkasi. Pine Utayi wako yene walola inkasi, akukupa indupo yako. ⁷ Na pine umasalila, utasuwilile suwilile inongwa changati amasi vine walonga, vine wakwelenganya kukuti wakwivwikwa kunongwa zyao ininji zine watela. ⁸ Epa, utawe changati awene, vine Utayi wako amanile chene umavwamba nanga pene uchili utasalila. ⁹ Epa, salila wuli: Tayi witu yene uli kululu, itawa dyako litimikwe. ¹⁰ Uwumwene wako wize, yene utogwile yalongekwe epa pawelelo changati uko kululu. ¹¹ Yene umatupa ichakudya chitu icha chila iyolo. ¹² Utuwele ingumbu, changati nu sweswe vine tuwaonela ingumbu amitu. ¹³ Na utatutwale kumayozo, nanga ulo utupulushe na yula unkomazi.' ¹⁴ Ngi muwaonela ingumbu awandu yene wawaluwinge, Utayi wako yene ali kululu awawonela ingumbu umwemwe. ¹⁵ Nanga ulo ngi mtakawawonela ingumbu chene wawaluwinge, nanga Utayi winu atakawawonela ingumbu zyene muluwinge. ¹⁶ Kupita yosi, pene ngi ufungile, utalondezye kusukupata changati agulugulu vine wawika, vine wakuwa changati wanyesile pamiso yao ngani kukuti awandu wawamane kukuti wafungile. Mmwene nakupozya, watangana indupo yao. ¹⁷ Pine uwewe, pene umakuwa ufungile, pakala amafuta untwe wako na ukalawe kumisi yako. ¹⁸ Ngi wawika ulo itakakulondezya kuwandu kukuti ufungile, ikuwa kwa Tayi wako yene ali inkasi. Nu Tayi wako yene walola inkasi, akukupa indupo yako. ¹⁹ Utiwikile ichipa chako wankala epa pawelelo, pine inondo ni kutu ziluwa ngaya, pine awivi wavunaya na kukwiwa. ²⁰ Epa, iwikile ichipa chako wankala kululu, pine inodno nanga ikutu tangaziwezye kuluwanga, na pene awivi tanga wavune na kukwiwa. ²¹ Vine ichipa chako pine chikwali, pine moyo wako ukuwa uli epe. ²² Ilisoitala ya mbili. Epa ngi iliso dyako ipuma, umbili wosi ukwizuzwa nu welu. ²³ Epa ngi iliso dyako iwovu, umbili wako wosi wizula ichisi kuwene. Epa, ngi uwelu wene ukwali inkasi yako ni chisi ica mwene, ichisi ichikulu kupita chinduchi! ²⁴ Kutakola nanga adyumwi yene angawezya kuwalongela achilume wawili, vine akunyesela adyumwi na kukuntogwa uwinji, ama akwifunya kwandu adyumwi na kukumbyeda uwinji. Tanga muwezye kukundongela Umulungu ni sawo. ²⁵ Epa nakupozya, utawe nu wowa ku wikalo wako, kukuti ukudya chiyi ama umwela chiyi, ama kumbili wako, uvwala chinduchi. Epa! Uwikalo wako kasi ukulu kupita ichakudya nu umbili kupita ivivwalo? ²⁶ Lola inoni zyene zili kululu. Zitasimika na watakuza na watakwinganya na kuwika nchiyenye, nanga ulo Utayi winu uwa kululu wawadyisha awene. Epa umwemwe kasi mwa nonu kupita izyene? ²⁷ Unanu kuminu yene angigazya angawezya kukonjezya utani wakwe nanga chilufi kupuma wa uwikalo wakwe? ²⁸ Na ku chiyi mukuwa nu wowa kuvivwalo? Yelenganya uwezya kuvyalo, vine ukula utalonga imilimo na yatawezya kukwivwika. ²⁹ Njili nawapozya, nanga u Selemani ku timu wakwe wosi achili avwikwae changati eya. ³⁰ Ngi Umulungu wayavwika amasote ku vyalo, yene yakwikala ulusiku lulumwi ni yolo yasumbwa mundilo, epa ku winji chi awavwika umwemwe, umwemwe wene muli ni izumilo ititi? ³¹ Epa mutawe nu wowa na kutela, 'Epa tukudya chiyi?' ama "Tumwela chindichi?" ama "Tuvwala myendachi?" ³² Vine amasi yavwamba eya, nu Tayi winu uwa kululu amanile kukuti muvwamba eyo. ³³ Nanga ulo tamula vwambi uwumwene wakwe nu nonu wakwe neya yosi yakwiza kulu uwewe. ³⁴ Epa, utawe nu wowa kwi iyolo, vine iyolo ikwigayila ingala. Chila iyolo yakwila kukuwa na amagayo yakwe ingala.