¹ Poshe wulo muvambiwa muwele awandu kunkunkonga Umulungu, changati ana wakwe walutogo. ² Muendane kwi togo, vino changati uKristo mwene atutogwile usweswe, wifunyizye umwene kulusweswe. Umwene alinge indupo, ni dhabihu, kukuwa ihalufu inonu yakunsekelezya Umulungu. ³ Ukuwi au uuchafu wowosi nu usonofu umbi zitatakwe kuminu, ngati vino imavambiwa ku wene wazumilile, ⁴ amawi yatatelwe, ipangwe lachitivu, amatona iyazi, yene kyatavambiwa, poshe wolu kuwe kusalifya. ⁵ Mungawa nu uhakika kukuti kuli ukuwi, uchafu wene wasonofu, awazumilo dya awamulungu, atakola imbyano yoyosi ku uumwene wa Kristo nu Mulungu. ⁶ Undu yeyosi atakulongope kwinongwa ndupu, vino imbola hii iyasila yaka Mulungu imakwiza kuwala wene watakola utii(ishima). ⁷ Ulemashe papamwi nao. ⁸ Changati usweswe pawandilo iza tulikugiza, poshe wulo isaizi tuliku uwelu ku Nkali. Wulo endai changati awana wa ulwelu. ⁹ Chawino amakomi ya uwelu ya jumuisha unonu wosi usokofu nu izyamweene. ¹⁰ Vambwi chila chene chisekesha ku Nkali. ¹¹ Utonekane ku lemasha ku imilimo yi chisi yene yatakola amakomi, poshe wilo zimanikwe ku ukweli. ¹² Vino imbola zyenezilongiwa na wala wene watakola upisamu wulo ni iyazi nanga kuyalondola. ¹³ Imbola yosi, peneyawikwa ku welu, imakuwa pawelu, ¹⁴ chila chindu chene chikupuliwe kikuwa ku uwelu. Poshe wulo imatelwa wuli, "Langazya, uwewe mwene uonile, imilila kufuma ufwile nu uKristo akwelupa kululu yako." ¹⁵ Wulo muangalile pine mukwenda, mutawe changati awandu wene watakola injele changati vine wali ni njele. ¹⁶ Muupulushe umuda vino isiku zyimbi. ¹⁷ Mutawe mwativu, ngani mumane ulutogo dya Nkali. ¹⁸ Mutamweleshe kundimba, imatwala ku uluwazi, poshe wulo mwizule ku Umoyo Wachitimbano. ¹⁹ Telayi nachilandu winu ku zaburi, nu kwisifa, ni inimbo yaku imyoyo, imbilili nakutogolosha ku umoyo dya Nkali. ²⁰ Isiku zyosi salifyi kwi imbola yosi kwitawa dya uKristo Yesu Nkali witu ku Umulungu Utayi. ²¹ Yifunyi mwemwe chilandu ku winji ku ishima ya Kristo. ²² Awachichima, usizyi ku awachilume changati ku Unkali. ²³ Vinu undume untwe wa uchima, changati vino uKristo untwe wiitekelo. Umpulushi wa umbili. ²⁴ Poshe wulo, vino itekelo lilipasi ya uKristo, vine unchima wamavwambiwa kulonga wulo kwa awalume wao ku chila chindu. ²⁵ Awalume, muwatogwe awachima winu changati vila uKristo vino alitogwile itekelo, na wufunyizye mwene kulumwene. ²⁶ Alongile wulo vine liwe lisokofu. Walyelufye kwakulikusa na amazi ku imbola. ²⁷ Alongile wulo vino awezye kwiletela mwene itekelo itimu, pine patakola uchafu nanga uuwi au ichindu chine chifine, poshe wulo chisokofu limelitakola iwi. ²⁸ Ku zila yiyila achilume wavambiwa kuwatogwa achichima wao changati umbili wao. Mwene antogwile unchima wakwe amakwitogwa umwene. ²⁹ Kutakola nanga adyumu mwene amaunyesela umbili. Poshe wulo huunonolezya na kuutogwa, changati uKristo vine watogilwe itekelo. ³⁰ Vine usweswe tu waumbili wakwe. ³¹ "Vino achilume andeka uise nu nina na wakwingana nuuchima ne ewo wawili wakuwa umbili adyumu". ³² huu ulinge wipisa. Poshe wulo natela ku Ukristo wi itekelo. ³³ Poshe, wulo chilandu winu amavambiwa kukuntogwa uchima changati umwene, nu uchima amavambiwa antimike undume.