¹ Ulwakuva kange ndeve uNguluve akavasyiluile palikimo nu Kilisite, mulondaghe isa mwne sino uKilisite ikukala uluvoko lwa ndia lwa Nguluve. ² Namungasaghaghe isa pa iisi, looli isa ku kyanya. ³ Ulwakuva mufwile, nu vwumi vufisilue palikimo nu Kilisite mwa Nguluve. ⁴ Unsiki ghuno uKilisite ilivoneka juno ghwe vwumi vwinu, pe pano na jumue mlivoneka palikimo nu mwene mu vwimike. ⁵ Pe lino musileke sino sili pa iisi sino lwe lufunyo lwa kihwani kya Nguluve, ⁶ Vwimila mu isi soni ing'halasi ja Nguluve jikwisa ku vano navitiki. ⁷ Mu isi najumue mukikalile palikimo navo. ⁸ Neke lino nuloghiile muvusie isi sooni ghalasi, amasaghe mavivi, amaligho na masio malamafu ghano ghihuma mu malomo ghinu. ⁹ Namungasyanganaghe jumue kwa jumue, ulwakuva muvufulile uvumuunhu vwinu uvwa pakali na maghendele ghake. ¹⁰ Muvufwalile uvupia vuno vuvomvua vupia mu luhala kuhumila kwa jula juno alyavavumbile. ¹¹ mu luhala ulu kusila muYunani nambe muYahudi, kukekua nambe kisila kukekua u mwimbi nambe juno na mwimbi um'bombi nambe juno na m'bombi, neke uYesu Kilisite ghwe sooni mu sooni. ¹² Ndavule avimike va Nguluve, avimike avaghanike, muvufwalaghe uvumuunhu uvunono, uvuhugu, kunyenyekela, uvukoola nu lugudo. ¹³ Mutolelanilanaghe jumue kwa jumue. Musaghilanaghe mweni. ndeve umuunhu alini nongua kwa junge ansaghilaghe ndavule uMutwa fino ikuvasahila umue. ¹⁴ Kukila aghuo ghoni, muvisaghe nu lughano luno ghwe nsingi ghwa vunywilifu. ¹⁵ Ulutengano lwa Kilisite lwongelele mu numbula sinu. Ndeve vwe vwimila vwa lutengano ulu kuuti mukavikilue mu m'bili ghumo. muvisaghe nu luhongesio. ¹⁶ Ni lisio lwa Kilisite likalaghe n'kate jinu ku vutajili. Mu vukoola vwoni, muvulanisianaghe na vungana jumue kwa jumueku sabuli, inyimbo, ni nyimbo sa munumbula. mwimbaghe mu luhongesio mu numbula sinu kwa Nguluve. ¹⁷ Na kyokyoni kino muvomba mu masio nambe mu maghendele, vombagha soni ku litavua lya Mutwa Yesu. Mu mwongesiaghe uNguluve Nhaata kukilia umwene. ¹⁸ Vadala, vanyenyekelaghe avaghosi vinu, ndavulle lumunoghiile uMutwa. ¹⁹ Na jumue vaghosi, muvaghanaghe avadala vinu, namungavisaghe vakali ku vanave. ²⁰ Vaanha, muvitikilaghe avapafi viinu mu sooni, ulwakuva lwe lukumunoghela uMutwa. ²¹ Va baba namungavahovesiaghe avaanha viinu, neke navangisaghe kudenyeka inumbula. ²² Vasung'ua, muvitikilaghe avavaha vinu mu lwa m'bili mu maghendele ghoni kisila imbombele inofu ija maaso hwene vaanhu vano vihovosia lwene. pe mu numbula ja lweli. mumwoghopaghe uNguluve. Kyokyoni ²³ Kino muvomba, namungavombaghe ndavule avaanhu, looli vombagha kuhuma mu numbula sinu ndavule uMutwa. ²⁴ mukagula kuuti mulikwupila ingigha kuhuma kwa Mutwa. ghwe Kilisite UMutwa juno mukum'bombela. ²⁵ ulwakuva ghweni juno ivomba sino nasakyang'haani ilihighua mumaghendele ghano nagha kyang'haani ghano akavombile, kisila kubaghula.