¹ Ulwakuva ninoghua kuuti mukagule ndavule nilyale ni mhumhuko nyinga vwimila jiinu, ku vooni vano vali ku Laodikia na kuvoni vano navaghaghile amaaso ghango mu lwa m'bili. ² Nivomba imbombo iji kuuti inumbula saave siwesie kuhuvisivua Kukwisa palikimo ku lughano na mu vutajili vwoni vwa vwinga nu vukyang'haani vwa luhala, kwa kukagula ulufiso lwa lweli ulwa Nguluve, juno ghwe Kilisite. ³ Mwa mwene vutile vwoni vwa vukoola nu luhala sifisilue. ⁴ Nijova ndiki neke kuuti umuunhu ghweni nangavavombelaghe igila ku njovele inya vusyangi. ⁵ Nambe kuuti nanili palikimo numue ku m'bili, looli nili numue ku numbula. Nihovoka kuvona uvutavike vwinu vunono ni ngufu sa lwinu mwa Kilisite. ⁶ Ndavule mulyamupile uKilisite Mutwa, mughendaghe mwa mwene. ⁷ Mukangasivue mwa mwene, mujengwe mwa mwene, mukangasivue mu lwitiko ndavule mulyavulanisivue na kupinyua muluhongesio lwinga. ⁸ Mulolaghe kuuti umuunhu ghweni nangavakolaghe mu masio ghano ghasila kimonga aghavusyangi kuling'haana na vaanhu fino vikwupila nu vutaviike vwa iisi, kisila kuling'haana nu Kilisite. ⁹ Ulwakuva mwa mwene uvunywilifu vwoni uvwa Nguluve vukukala mumbili. ¹⁰ Umue mumemesevue mwa mwene. Umwene ghwe mutu ghwa vuwesia vwoni nu vutavulua. ¹¹ Mwa mwene kange mulyakekilue ku tohala jino najikavombike nu muunhu kuvusisivua um'bili ghwa danda. Neke je tohala ja Kilisite. ¹² Mukasyililue palikimo nu nu mwene mu lwofugho. Na kusila ja lwitiko mukasyilulivue ku ngufu sa Nguluve juno akansyuluile kuhuma kuvafue. ¹³ Na pano mulyafwile mu vuhosi vwinu kisila kukekua amaviili ghinu, akavavombile kuva vwumi palikimo nu mwene na kutusaghila uvuhosi vwitu vwoni. ¹⁴ Akafutile ikumbukumbu isa kudajivua sino sikalembilue, nu vutavike vuno natukanoghiile kuva navyo. ¹⁵ Akavusisie ghoni na kupaghika pakikovekano. Akavusisie ingufu nu vutavulua. Akaghavika pavuvalafu na kukughahovokela ku vusindi vwimila kikovekano kyake. ¹⁶ Pe lino u muunhu ghweni nangavahighaghe umue kwa kulia nambe kunyua, nambe mu kighono kya kuhovokela nambe umwesi umpya, nambe ikighono kya Sabati. ¹⁷ Ifi fye fin'sulua fya ghano ghikwisa, neke ikikome ghwe Kilisite. ¹⁸ Umuunhu ghweni nangapokuaghe ingigha jaake kwa kunoghelua uvukoola na kukufunya avanya Mhola. Umuunhu ughwa ndikio aikwingila mu sino asaghile ka na kusyangua na masaghe ghake agha m'bili. ¹⁹ Umwene naikolelela umutu. Kuhuma ku mutu kuuti um'bili ghwoni kukilila ifilungo fyake na mafupa kulunganisivua palikimo; na kukula muvukulilo vwa Nguluve. ²⁰ Ulwakuva mlyafwile palikimo nu Kilisite mu maghendele gha iisi, ongo mukukala hwene mukujivombela iisi: ²¹ ''Namungakolaghe nambe kuvonja, ²² Agha ghooni ghalaghilue vwimila uvunangifu vuno vukwisa na kutumila, kuhangilanila ni mbulanisio sa vaanhu. ²³ Indaghilo isi sili nu vukola vwa nyifunyilo sino sitendilue ku vunoghelua vwave na nakunyenyekela mu mhumhuko sa m'bili. Neke sisila lutalama mu noghelua sa m'bili.