¹ Aputi, bhabhali Bhalawi, na makabela gonti ga Lawi, sagagayibha ni gawo wala upyano antu heka ni Israeli; bhahanziwa alye imfumizyo ya Yahwe yigombilwe hu moto hansi upyano wawo. ² Sagabhayibha nu pyano myongoni mwa holo bhawo; uYahwe pyano wawo, hansi shayanjile nawo. ³ Ene sababu ya puti afume hu bhantu, afume whabhala bhabhafumya imfumizyo, hansi yayibha ng'ombe au ingole: bhahanziwa afumye wha puti ibega amadele gabhele, ni sehemu zya mukasi. ⁴ Iviyawo vya whande viviyawo zyaho, ihombwa yaho ipya, na mafuta gaho, na masepe gawhande gongole zyaho uhanziwa upele. ⁵ Afwatanaje uYahwe Ungolobhe waho asaluye afume hu makabela gonti goho awhemelele atumishe whitawa lya Yahwe, umwene na bhana bhakwe wila. ⁶ Nkesho Umulawi afuma hu khaya zyenyu hunze yi Israeli yonti afuma wha khala, nanyonywe hu moyo gwakwe gonti awhenze whi enewo lya Yahwe anzasalule, ⁷ basi awhanziwa atumishe whitawa lya Yahwe Ungolobhe wakwe nkesho aholo bhakwe wonti Bhalawi bhawomba, bhabhawhemelela whilongolela lya Yahwe. ⁸ Bhahanziwa abhe ni gawo lililengana walye, badala ya sgila shishiwhenza alengane ni nkazyo yi pyano wifamiliya yakwe. ⁹ Hu wakati mwenzele honse ya Yahwe Ungolobhe wenyu ahubhapela, muwhanziwa amanyile awhenye amavisyo gi mataifa. ¹⁰ Pasahapatihane mumyongoni mwenyu weka wahumeha usahala wakwe au unendo wakwe mu moto, wowonti watumila uwusu, wowonti wauwa, au unozi, unozi wowonti, ¹¹ wowonti wahwizya na bhafwe, au wowonti wahwizya ni roho. ¹² Wha wowonti wawomba amambo ega luvito wha Yahwe hu sababu yivwisyo ega ga Yahwe Ungolobhe wenyu ahubhefwa whilongolela lyenyu. ¹³ Nawhanziwa abhe bhatimilifu whilongolela lya Yahwe Ungolobhe wenyu. ¹⁴ Hu mataifa ega gamubhahugadigizye atejelezye bhala bhabhawomba ulozi nu ganga; lakini humwenyu, uYahwe Ungolobhe wenyu abhakhanile amwe awombe esho. ¹⁵ U Yahwe Ungolobhe wenyu ayiwhemelesya kwa ajili yenyu ukuwe afume humyongoni mwenyu, weka wa holo bhenyu, hansi ane. Muwhanziwa hutejelezye. ¹⁶ Eshi shesho wawozelezezye afue wha Yahwe Ungolobhe wenyu oho hu Horebu whi siku liwongano, ayanje, "Leha tisahevwe tena isauti ya Yahwe Ungolobhe wetu, wala alole umoto ugosi tena, wala tayifwa." ¹⁷ U Yahwe ayanjile nane, "Shila shabhayanjile shinza. ¹⁸ Imbahumwemelesye ukuwe kwa ajili yawo afume mumyongoni mwa holo bhawo, hansi awe. Imbabheshe amazu gane mwilomu lyakwe, na yayiyanga anawo gonti giwozezye. ¹⁹ Yayibha hansi wowonti wasagayihevwa amazu gane gayanga whitawa lyane, nayihulyanza hu kwakwe. ²⁰ Lakini ukuwe wayanga izu whinsyosi whitawa lyakwe, izu zyasagaimozezye ayanje, au wayanga whitawa lya ngolobhe abhamwawo, oyo ukuwe ayifwa. ²¹ Esho shesho uwhanziwa ayanje hu moyo genyu: "Tayigundula wele aje intumi ya Yahwe sagayanjile?