Suguhanziwa hufumizye imfumizyo uYahwe Ungolobhe waho ing'ombe au ingole yili na mapungufu au ahantu hohonti ahabhibhi, afwatanaje eyo yayibha vito wha Yahwe Unglobhe waho. ² Nkesho hupatihana mumyongoni mwenyu, mukasi yi malyango gi khaya yoyonti ya Yahwe Ungolobhe wenyu apatihana, unume wowoni au oshe wawomba imbibhi whilongolela lya Yahwe Ungolobhe wenyu huli nanganye ipatano lyakwe - ³ wowonti wabhalile na hugabudu amingolobhe agamwawo na huginamila, wala isenya, umwezi, au ijeshi lya humwanya- na hamo hohonti iwozezye, ⁴ na nkesho ungowozewelwe ahusu eha, au hansi uli ni vyoma- basi uwhanziwa awomba uwuchunguzi wishinza. Nkesho lyoli ni hakika aje uvisyo hansi elyo liwombeshe hu Israeli- ⁵ -basi wayihuneta oyo unume au oshe, wawombile ubhibhi owo hu malyango gi khaya, aje unume kabisa au onshe, umpole oyo umuntu hadi afwe. ⁶ Whilomu lya simisizi bhabhele, au asimisizi bhatatu, yayibha uwene wahanziwa agogwe; ila whilomu lya simisizi weka mwene sagaayigogwa. ⁷ Inyobhe ya simisizi iwhanziwa abhe ya whande ahugoje, na pamande inyobhe ya bhantu wonti; na mwayihumwefwa umibhi mumyongoni mwenyu. ⁸ Nkesho ijambo lifumila lili likhome humwenyu awombe amaamuzi pamo liswali ligogwe au lyafwe shi ajali, ihaki ya muntu weka ni haki ya muntu uwa mwawo au iswali lyeka likabela lyazusye awombeshe, au ikabela iyamwawo yijambo-amambo gitatanizi mukasi yi malyango genyu, basi wayihanziwa abhale wi enewo lya Yahwe Ungolobhe waho abhasalule hansi apafinjile pakwe. ⁹ Wayihanziwa abhale wha puti, apapwe bha Lawi, nu mwamuzi wayitumiha huwakati owo; mwayihanza uwushauli waho na bhayihubhapela amwe amaamuzi. ¹⁰ Muwhanziwa afwate indajizyo yamupewilwe, whienewo uYahwe anzasalule hansi apafinjile apakwe. Mwayibha makini awombe kila hantu habhahubhawozya awombe. ¹¹ Fwata indajizyo yabhahubhamanyizya, na womba alengane na maamuzi gabhahubhapela. Musahewushe afume wha shila bhahubhawozya, hundelo au humongo. ¹² Wowonti wawomba hu nsyosi, wasagaahutejelezya uputi wawhemelela atumishe whilongolela lya Yahwe Ungolobhe waho, au sagaahutejelezya wahamula- ono umuntu abhafwe; mwayibheha uhutali ubhibhi afume hu Israeli. ¹³ Abhantu wonti bhawhanziwa awhevwe na hogope, na bhasawombe hunsyosi tena. ¹⁴ Hu wakati lwamwahenzele honse ya Yahwe Ungolobhe ahubhapela, nu wakati mumiliki na whande akhale mukasi yakwe, na halafu uyanga, 'Imbahujibheshele umwene pamwanya yane, hansi amataifa gonti gagahunyongola ane,' ¹⁵ basi whanziwa kwa uhakika hujibheshele umwene pamwanya yaho umuntu wowonti wa Yahwe anzasalule. Uwhanziwa hujibheshele hansi umwenne pamwanya yaho umuntu wowonti afume myongoni mwa holo bhenyu suguhanziwa abheshe ujenu. Wali sagaholo wenyu pamwanya yenyu. ¹⁶ Lakini sagahanziwa azidisye ifarasi kwa ajili yakwe, wala asababisye abhantu awele hu Misri ili aje awezye azidisye ifarasi afwatanaje uYahwe ayanjile hu mwawo, 'Uhanziwa awhandile isalezi usawele indala elyo tena.' ¹⁷ Na sagahanziwa azidisye abhashe kwa ajili yakwe, ili aje umoyo gwakwe gasageushe afume wha Yahwe; wala sagahanziwa hani azidisye kwa ajili yakwe impeya au iwe li mpeya. ¹⁸ Hu wakati wa khala pitengo shi enzi shiwumwenne wakwe, awhanziwa asimbe hushitabu kwa ajili yakwe inakala yi sheria ene, afume mundajizyo yi leho whilongolela lya puti bhabhali bha Lawi. ¹⁹ Ishitapu shiwhanziwa abhe mwene, na awhanziwa abhazye mukasi yakwe hunsiku zyakwe zyonti ili aje awezye amanyile ahumweshumu uYahwe Ungolobhe wawo ili aje aleme amazu gonti ni ndajizyo ene ni amuri ezi, ahuzileme. ²⁰ Awhanziwa wombe eshi ili aej umoyo gwakwe husanyenyuliwe hani yaholo bhakwe, ili aje asageushe uhutali ni amuri, hundelo au humongo whikusudi aje awezye huzileme insiku zyakwe katika uwumwene wakwe, umwene na bhana bhakwe, mumyongoni mwi Israeli.