¹ Na kauka ifu kaenda murin wa kwawo, na vanalosho vamwi vakansora. ² Sabato ili indefika, kabooka ilosha ifo numba ya iterevia. vandu veengi vakamwiita na vakarikiswa. vakanumbua, ''Akooya kwi miloshie i? ''Ni urango ki ilu aniingiywa?'' ''Aketana are marikiso va kwa maako amwi?'' ³ ''A uu ni ulya se mfuru mwana wa maria na mwanamae wa Yakobo, Yose,Yuda na Simoni? A vaa mfwamae ni wwo iva se varule iya iya na andu emwi na ise?'' vakava na ilomi na Yesu. ⁴ Yesu kavaia, ''Mwauya kisuku aturaa tikisi ndi, kita ifo murin wamwi na karika vanavamae vamwi na kyen kwamwi.'' ⁵ Amakii itana marikiso alya ndi, kake kaekeria valole vaangu maako kavakira. ⁶ Kariikiswa nnu ni itura lyao ikusura kyasia karua miingon ya kyungu eeloshaa. ⁷ Kavaanga vanalosho valya ikumi na vavili kabooka ivaruma vavili . kavaniinga finya ya yumbuta mimuyo mikasha, ⁸ Kava vavasa vatakurike kyoose ili vaendaa kita mbiiri da. valakurike nkate nta mboloko ana fesa kiroshon. ⁹ Kake varaa faaru, ana mmiseto ivili ndi. ¹⁰ Na kavaia numba yoose mwakaa, kaan yyu kumande muukawo. ¹¹ Na muri woose utakemuwaria ana utake mwaaranya, vaangatyen funga ya marende anu, luve urambuu kwawo.'' ¹² Nawo vakaenda ikwaanisa kwa vandu vailashike na itiawo mareko awo. ¹³ Vakaumbuta mimuyo mikasha miingi, na vakaamba mafura valole vakavakira ¹⁴ Mangi Herode ili andeita ifi, fulya irina lya Yesu lyeemwiira nsendo nnu. kiindi vakanumbua, ''Yohana mbatisaji anduka na kwa ikyo, finya i ya iriikisa ikarunda mashora kari kamwi,'' ¹⁵ Kyeenga kyawo vakanumbua, ''Uu ni Eliya,'' na vengi nawo vakanumbua , Uu ni mwauya fisuku, sha umwi wa vaauya valya va mbele.'' ¹⁶ Kake ili Herode andeita ifi kanumbua, ''Yohana ulya nnderumbua nrwe andutwa.'' ¹⁷ Amu Herode muni avavasa Yohana awarwa na kafingwa kifingion kiimba kya Herode (nka wa mwanamae wa Filipo) amu ye eemwalikiee. ¹⁸ Amu Yohana eemiiaa Herode, ''kisumani kurwaa nka wa mwanamaa ndi.'' ¹⁹ Nae Herode kabooka insua na kanduiya ntambwe wa iwwaa kake katura, ²⁰ Amu Herode eeree Yohana; kamanya sheeli ni nsumani nndu nsongori, na kanrea kibua, neeli andemaa imwaranya kataraaka nnu, kake kafura imwaranya. ²¹ Na ukafika nkonu uwore mwaanya ukava nkonu wa iwonika lya Herode kasongosia vashili vamwi imutu na vngyama yamwi na vanini va Galiliya. ²² Lloyo sambura ya Herode yaaka na itavana mbele yawo, kasenya Herode na na veeni veekee rembo nae ili lya shoonga ya ukwaun. Uo mangi aia mwana, ''shitereva kindo kinde kyoose kukundie, nan nkuniingaa.'' ²³ Kalliya na ikite kamwia, kyoose kushiterevaa nkikuningaa na akwaa nkyeenga kya umangi lwa kwa.'' ²⁴ Kasomuka wooro kandeura mae ''Natereva kiki?'' kanumbua, ''Ni nrwe wa Yohana mbatisa.'' ²⁵ Na liaeni kasha byan kwa mangi kabooka inumbua, ''Nuuri kushiniinge mwashon, nrwe wa Yohana mbatisa.'' ²⁶ Mangi karikiswa nnu, kake kiimba kya ikite eemuliyaana kiimba kya veeni, andemakii illeiya literevo kyamwi ndi. ²⁷ Kyasia, mangi karuuma nsikari karika varingi vamwi na kavavasa andennde nrwe wa Yohana. Nringi kaenda kandenrumbua nrwe akee kifingion. ²⁸ Na kande nrwe ukee mwashon na kaniingia mwana na mwana kaniingia mae. ²⁹ Na vanalosho vamwi ili vandeita kuro, vakaenda vakandeimboo nying'a wamwi vakandeurika mbangen. ³⁰ Na varumi, vakakusandia andu emwi mbele ya Yesu vakamwongoya foose vandetana na filya vandelosha. ³¹ Nae kavaia, Oreshon mu veni kyaanya kyanu andu vatayo vandu na timuye kinnya.'' vandu veengi veshaa na yenda, nta ilolia mwaanya wa ilya. ³² Kyasia vakaarukia ngalava vakaenda andu a kyaanya kyawo veni. ³³ Kake vakavalolia veendaa vakamanya, na vakarisha kimwi kwa marende kuuka miri yoose, nawo vakabooka ifika. ³⁴ Ili vandefika kyuruka, kalolia syamu nini kavalilia, fulya veekee sha manriri atawore mwiisi. Na kabooka ivalosha findo fiingi. ³⁵ Ili nkonu wa nkwinika nnu, vanalosho vakanshea vakamwiia, yya na andu a kyaanya na feeri fammenda. ³⁶ Otora veende miri ya kyungu na muungon vandekuuria shoonga.'' ³⁷ Kake kavaarua, eenumbuaa, vaniingei ini shoonga.'' vakamwia, ''Timakii yenda na yuura mikate ya shilingi mayana avili tivaniinge valye? ³⁸ Kavaia, ''Moore mikate inga? Enden mundella.'' vakamanya vakamwia, ''mmikate iraanu na makunga avili.'' ³⁹ Kavavasa vandu vakaa rembo kwa matoroto ringewu ya mare mashu. ⁴⁰ Kavavasa kwa makamba; makamba iana na a makumi araanu. ⁴¹ Kyasia kawaria mikate iraanu na makunga avili kalla iruvewu, kaana Iruva na kaniingia vanalosho varwaa mbele mbele ya syamu. Na kaava makunga avili kwa vandu woose. ⁴² Vakalya woose kumande vakawuura. ⁴³ Vakasang'iria na fibereshu fa mikate indesaa, fikaishua mikusha ikumi na ivili na fa makunga. ⁴⁴ Na veekee womi fiku firaanu iwo valye mikate. ⁴⁵ Liaeni kavaia vaarukie ngalaven vande taari tingi, kumande Bethsaida, ili ye yelakana na syamu. ⁴⁶ Ili vandemaa yenda karwa uroni indetereva. ⁴⁷ Ili kundeva ukwawun, na ngalava yawo saayo ikee karikari ya nruva, nae eekee muni uruken uumu. ⁴⁸ Na kavalolia veeatarwaa mmburaato amu yavveerisha, ili kufui ngama kavalatia eendaa kwa ule ya nruva na kafura ivairia mbele. ⁴⁹ Kake ili vandelolia eerua kwa ule ya uswaa kwa, vakawara manunua veemanyaa vvarumu na vakarorongya. ⁵⁰ Amu vallolia vakataraaka. liaeni karera nawo kavaia, ''Uywan mmuu, nnin tee manya muteree.'' ⁵¹ Kaarukia karika ngalava, na mburaato ikamanda ituta, nawo vakariika nnu. ⁵² Amu veemaarukyoo mmisendie ya mikate ilya ndi. Fulya urango lwao lwiworee imanya yaangu. ⁵⁵ Nawo ili vanderuka kwa kulya, vakafika uruken lwa Genesareti ngalava ikafingiwe weendo. ⁵⁴ Ili vandesomuka wooro ya ngalava, liaeni vakammanya. ⁵³ Vakarisha ikwaanisa uruka lua loose na vakabooka innde valole na firaa, na kilya andu vandeita sheeli ashaa. ⁵⁶ Koose andeaaka karika miimgon, ana mirin ana karika uruka, vakarwaa valole taari ta singira, vakantereva avaniinge muumu wa ibaana nkendu wa nseto wamwi. Na woose vandembaana vakakirwa.