¹ Vakasha kumande taari ingia ya nruva karika uruka wa Gerasi. ² Na lia eni ili Yesu eelokaa kuuka wooro ya ngalava, nndu awore mumuyo nkasha kasha kwamwi kuuka mbangen. ³ Nndu uu erulee mbangen. nta atefo amakii imwirisha ateefo nta kwa nse. ⁴ Amu eefingwaa keengi na makengeto na mise. kafukya mise na makengeto ayo akafukywa. Ana nta umwi eeworee finya ya ivvinga. ⁵ Kio na nsanyin eekee mbangen na ngyuron, kaishira na ikuminyaminya na mawe muni mawe aminya. ⁶ Ili andelolia Yesu akee kwaasha karishia kwamwi na ikwinika mbele yamwi. ⁷ Kaia kwa unungu nini, ''Nkiki kuuri nkutanie, Yesu , mwana wa Iruva akee ule nnu? Nakutereva kwa Iruva muni, kutashilise ukiva.'' ⁸ Amu , arie imwia, uka nndu uu, iwe mumuyo nkasha.'' ⁹ Nae kamwura, ''Irina lyafo ni iwe i?'' nae kamwarua '' Irina lyakwa ni Legion, amu tikee veengi.'' ¹⁰ Kantereva lingi na lingi atavakurike wooro ya uruka. ¹¹ Alli shoo nini ya nguve ivikiywaa ringewu ya uro, ¹² Nayo ikantereva , venumbua, ''Tirumi kwa nguve; taake kari kayo.'' ¹³ Kyasia kavaniinga muumu, mimuyo mikasha vakavauka na yaaka karika nguve, nato tikarishia kwasi ya uro kumande nruven na kufui nguve fiku fivili tikamirwa. ¹⁴ Na valya veeke ivilikia nguve vakarisha vakandekwanise kilya kyava karika muri na kulya uruken.Llo vandu veengi vaenda vandella kilya kyatanika. ¹⁵ Llo vashe kwa Yesu na vakalolia nndu ulya eewarwaa mmumuyo nkasha nae yye ulya eewarwaa mmatoroto akee rembosi, anvikwa miseto, na awore na urango lwamwi lusumani nawo vakaerea. ¹⁶ Valya valolia kilya kindeva kwa nndu ulya eewarwaa mmatoroto na mumuyo nkasha vakamwia kasa ataniyo kwamwi na kya nguve. ¹⁷ Nawo vakabooka intereva auke karika uruka lwao. ¹⁸ Kyasia neeli eearukia karika ngalava , nndu eewarwaa mmatoroto na mimuyo mikasha kantereva sheeli aende kimwi nae. ¹⁹ Kake nta imwirikia, na kamwia, Enda kyen kwafo na kwa vandu vafo, kundevaongoya akutania Nndumi na ililia akuniinga.'' ²⁰ Kyasia kyaenda na kabooka ikwaanisa mboni nini tilya Yesu andentania kwamwi kulya Dekapoli , na kilya karika kuta. ²¹ Kyasia na Yesu karuka taari ilya ingi, karika ngalava, syamu nini ikakusandie ulengetia, akee mbaai ya nruva. ²² Na umwi wa nnini wa numba ya iterevia avaangwaa Yairo, kasha, ili andellolia, kawa marenden amwi. ²³ Kantereva nnu na kinini, eenumbua mwanakwa munnya wa sambura akee kufui na ifwa. Na kuutereva, oresho kushemwekeria ringewu yamwi amu akooye finya ya iruwa.'' ²⁴ Kyasia kaenda kimwi nae, na syamu nini ikansora nawo vakansisiria kufui venlengetiaa. ²⁵ Eeifoo nka awarwa nsaka yamwi ya kike nayo ikamuuka andu a myaaka ikumi na ivili. ²⁶ Ikallisa ukiva kutu na vaanga veengi kamayawo kilya kindo kyoose awore. kitaare nta kyamweleka. kwa kyoose kilya, kaengena iroywa da . ²⁷ Ili andeita mboni ta Yesu . Nae kasha numa yamwi ili eeiraa karikari ka syamu, nae kabaana nseto wamwi. ²⁸ Amu anumbua,'' kwakooya nabaana miseto yamwi da, vvaa nsha.'' ²⁹ Ili andebaana, yuukwa nsaka likafikya na kakwiita vvili wamwi sheeli ankirwa kuuka ukiven lwamwi. ³⁰ Na liaeni Yesu kamanya nrimen wamwi muni sheeli ammuukwa mfinya . Na kaaruka kunu na kunu syamun kari ka syamu ya vandu na yuura, ''Ni i abaana nseto wakwa?'' ³¹ Vanalosho vamwi vakamwia kulolie syamu i ikwiiding'ie na ikulengetia, nawe kwanumbua ni i shibaana?'' ³² Kake Yesu kalla kununa kunu ilolia ulya andembaana. ³³ Nka, kamanya kindeva kwamwi, kaerea na irerema. kasha kawwoya si mbele yamwi na imwoongoya udeede loose. ³⁴ Na kanumbua kwamwi, ''Sambura, ikusura lyafo lankukangia kuve nsha. Enda na unambwe na va nsha kuuka ndwari yafo.'' ³⁵ Ili eekireraa, kiindi kya vandu vakasha kuuka kwa nnini wa numba ya iterevia, veenumbuaa, ''mfwafo ammaa ifwa nkiki kukaa kwiiturua nlosha?'' ³⁶ Kake Yesu ili andeita kilya vanderera, kaia nnini wa numba ya iterevia , ''kutaeree kusureda.'' ³⁷ Ana andeotora woose ulya iriana nae ndi kita Petro, Yakobo na Yohana, mwanamae wa Yakobo. ³⁸ Vakashe kyen kwa nnini ulya wa numba ya iterevia nae kalolia mwaandu, iishira ingi na kiiyo. ³⁹ Ili andesha kyen, kavaia nkiki mukeriika na nkiki mukee iiya? mwana uu afwa ndi niikai alele.'' ⁴⁰ Vakanseka, kake ye kavasomuta woose wooro kakurika nde wa mwana na mae na valya veekee kimwi nae, na kaira na numba kulya mwana ulya akai. ⁴¹ Kaimboo uko lwa mwana na kamuia, ''Talitha koum,'' nakyo ninumbua mwana munya, nakuia kwimboo.'' ⁴² Liaeni mwana kakwimboo na karuarua (amu eeworee myaka ikumi na ivili). na liaeni vakawarwa ni iriika inni den. ⁴³ Kava vavasa kwa finya sheeli atefo woose asenye imanya kiimba. nakavaia vaniinge mwana ulya shoonga.