¹ Baada ya ago tzambona wamalaika wane tzawema wima kune kona nne tza isi, tzawatzigoma pepo nne tza isi kwa ngupfvu ili kwamba kusuye na dibeho diduma mne isi, mchanya ya ditzimbu au tzidi ya gumbiki goghose. ² Tzambona malaika yungine kakutza kulawa mashariki, tzayakalile na gumuhuri gwa Mlungu yakalile mghima. Tzakalila kwa isauti n'gulu kwa malaika wane ambao tzawen'gigwa iruhusa ya kiunanga isi na ditzimbu: ³ "Msiinange isi, ditzimbu, au imibiki mpaka hatutzokala twika gumuhuri mne dipaji ja iditwi ja watwana wa Mlungu wetu." ⁴ Tzanihulika idadi ya awala wageligwe gumuhuli: 144,000, ambao tzawageligwa gumuhuli kulawa chila kabila ya iwanu wa Israeli: ⁵ 12.000 kulawa mne dikabila ja Yuda tzawageligwa gumuhuri, 12000 kulawa mne dikabila ja Rubeni, 12000 kulawa mne dikabila ja Gadi. ⁶ 12,000 kulawa mne dikabila ja Asheri, 12,000 kulawa mne dikabila ja Naftali, 12,000 kulawa mne dikabila ja Manase. ⁷ 12,000 kulawa mne dikabila ja Simioni, 12,000 kulawa mne dikabila ja Lawi, 12,000 kulawa mne dikabila ja Isakari, ⁸ 12,000 kulawa mne dikabila ja Zebuloni, 12,000 kulawa mne dikabila ja Yosefu, na 12,000 kulawa mne dikabila ja Benjamini tzawageligwa gumuhuri. ⁹ Baada ya gamambo agano tzanilola, na tzakula na dikingili kulu ambaye tzakuduhu imunu yanadahile kudipeta, kulawa chila taifa, kabila, jamaa, na luga, tzawema hambele ya ichigoda cha enzi na hambele ya ichigoda cha enzi cha Mwanakondoo. Tzawapfvala gamagwanda gamatzelu na tzawana gamatawi ga imitende mne imimoko yao, ¹⁰ na tzawakala wolanga kwa isauti ja mchanya: "Ukombola ni kwa Mlungu ambaye kakala katikati ya ichigoda cha enzi, na kwa Mwanakondoo!" ¹¹ Malaika wose tzawema wima kutzunguluka ichigoda cha enzi na kuwatzunguluka awala iwatzee hamwe na wane ughima wanne, tzawenama hasi ya artzi na tzaweka pfvihanga pfvao mchanya ya ardhi hambelel ya ichigoga cha enzi tzawamtamanila Mlungu, ¹² tzawalonga, "Amina! Sifa, wenzeluka, hekima, shukurani, heshima, uwetza na ingupfvu pfvikale kwa Mlungu wetu milele na milele! Amina!" ¹³ Kuya yumwe wa awala iwatzee tzakanighutza, "awano ni kina nani wapfvalile gamagwanda gamatzelu, na walawile kwani? ¹⁴ Tzanimlongela, "Mtwa mkulu, kupfvimanya gweghe," na tzakanilongela, "Awano ni awala walawile mne itziki n'gulu. Wagapfvua gamagwanda gao na kutzitenda nzelu kwa idamu ya Mwanakondoo. ¹⁵ Kwa isababu aino wa hambelel ya ichigoda cha enzi ya Mlungu, na womtamanila yeye nechilo na namisi mne dihekalu jake. ¹⁶ Yeye yakalile mne ichigoda cha enzi kotzosambatza dihema jake mchanya yao. Hwatzakona nzala keli, wala kunyala gamatzi keli. Ditzua haditzowalakatza wala dijoto. ¹⁷ Kwa apfvila imwanakondoo yakalile katikati ya ichigoda cha enzi kotzokala mdimi wao, na katzowalongotza mne ichemchem ya gamatzi ga ughima, na Mlungu kotzofuta chila hotzi mne tzinenge tzao."