¹ Nguhanya tute khate ama Kristo. Ntiuhanya uregheghe, na ighemo rane rukumua itambe rimwe nanee kene mwahu ne mweru, ² nechu kwena urai ukuu na mavai ne atiuhia mung'e a nkhoo ane. ³ Kate ajanguyanja nene mghonjo ujumwa na ubaghuwa lurenge na Kristo kwa soko anyandughu vane, avoyo va khitu khate mwere. ⁴ Veso ne Aisraeli. Hevena namna autendeka vana, va weru, va maaghano, na dahwa a sarea, umkurya Mungu, na irafeywa. ⁵ Veso ne atongeri nechu Kristo wajie kwa mwighuyo uyaa mweere urui - nechu mweso ne Mungu wa ong'e Na mweso akutwe khae. Amina. ⁶ Nyesi ti rese marafeyo a Mungu aremwa ughea. Soko ti mu muntu neuki Israeli ne Mweisraeli wa kamwe. ⁷ Ti uyi nampa kwa ufafo wama Abrahamu tise ne vana vakwevakamwe. Nyeso, "ne ukeera Isaka ufafo wako ukuetamwa." ⁸ Eyei nee kate, vana va mweeri ti vana va Mungu. Nyeso vana va irafeyo nee raraviwe utendeka kinya ufafo. ⁹ Soko urui yuchu ne ukhani wa irafeyo: "Khate a mkhondo ayai nejie, ne Sara ujofepa mwana." ¹⁰ Ti erei yi, nyeso ufwaya Rebeka kwohanga urito kwa mntu umwedu, Isaka tata witu- ¹¹ Nechu vana arevakee vatinafafwa na are akee atinatenda intu na rimwe ne rija au e rive, nechu kate ighemom ra Mungu kiningana na ihwania reemeke, natimpa kwa ntendo, nyeso ne kwa soko ama uywa neukuetana. ¹² Ekawanywa kene mweso, "Nemkuu ujomtumamia ne mnyue." ¹³ Mwino adakie uandekwa: "Yakobo nekamyanja, nyeso Esau nekamikiwa." ¹⁴ Ari kange ukajohanya ure? U kwina uneyeywa kene Mungu? Ti uyi. ¹⁵ Kwa soko ukuhanya kene Musa, "Ngutendek ngurekea kene uyuo nengumrekea, ngutendek nina uvai kene uyuo nenumwonea uvai." ¹⁶ Vari kate, tikwasoko akwe mweso ne usighite, nati kwasoko akwe nehu ukudua, nyeso kwasoko a Mungu, nechu ukigheya urekea. ¹⁷ Kwasoko maandeko euhanya kene Farao, "Kwa ighemo erei rahamwe ngakuhumbua, nechu nigheye nguu yane khate ako, na nechu rina rane ntamantiywe khate a ng'e ong'e." ¹⁸ Uyi kange, Mungu ukujaa wina urekea kwa wasuu nemyanjite na kene ukumyanja, ukumtend atendeke we kekii. ¹⁹ Kange ujohanya kinenene, "Asike ne keeukengee ihutye? Ne wafe nechu akadaha ugheghimea usegha kwakwe?" ²⁰ Hiya ayo, mwanadamu, veve we auyu ne ukusucha buya na Mungu? Kwina udaheka kunge mekaumbiwe uhanya umuumbe, "Asike ne ukatenda nene vii?" ²¹ U muumbi ukajaa atikweti nguu kunto airongo utenda kiife kwa utumamea kamwe ufumia kirundo erero erera, na kiife kiuya uketumamea mwiche? ²² Wore mbese Mungu, nechu witungie ukuraghea makuo akwe na utenda nguu yakwe imanyike, akaghighimea kwa ughimeyi wodaha maife a makuo neaghondaneywe kwo hirenkeya? ²³ Wure mbese akatenda vii nechu awigheye winge wa weru wakwe kunto a amaite aurekea, a nechu akadaha uyaghonda neya kwa soko aweru? ²⁴ Wure mbese katenda vii no kene sese, nechu no akakwetana ti uyi ufuma kwa Ayahudi, nyeso no ufuma kwa antu vomatuumbe? ²⁵ Mwino chu ukuhanya no kene Hosea: "Nejovaetana antu vane nechu areti antu vane, na muyoyanjwa wakwe nechu are atiyanjetwe. ²⁶ Na ejotendeka nechu hafoo neekahanywa kene veso, nyenye mtiantu vane,' hafo vajoetamwa vana va Mungu ne mfanga." ²⁷ Yesaya ukureea kusoko a Israeli, "Mwino ehu winge wa vana va Israeli ekutendeka kinya mhanga hanga wa kirambo, eutendeka ne usaghe nechu vajokhomowa. ²⁸ Kwa soko Mkuu ukuuhoa ukhani wakwe kuuto ang'e, rue na kwa uning'anea. ²⁹ Na mwino chu Isaya akahanya mwandyo, "Mbese Mkuu wa madare atinakurekea unyuma afafo kwasoko itu arekutendeka kinya Sodoma, na ekutendwa kinya Gomora. ³⁰ Kuhanya ntumi ne? nechu antu va matuumbe nechu arevatiufenjaa tute, vekananga tute, tute kwa uhuvei. ³¹ Nyeso Israeli, nechu akafenja sarea a tute, atinameghea. ³² Asikee ne tiuyi? Kwasoko vatinamefenjaa kwa uhurei, kweso kwa ntendo. Vekahutya kunto a igwe ro hutya, ³³ mwino ekaandekwa, "Raava, nareenewa igwe rohutya khate a Sayuni na ng'ongo orua. Mweo nechu wahuvea khate aeyei ationa menyaa."