¹ Ari nguhanya, u, Mungu akavaita antu vakwena? nane kunyui. Kwasoko nene no ne Mweisraeli, wa ndughu ama Abrahamu, wa mbeyu ama Benyamini. ² Mungu atinavahitaa antu vakwe, neuvamianyie ufuma mwandyo. Umtume iandeko reuhanya ntumi kene Eliya, mwino akamwirer Mungu unto a Israeli? ³ "Mkuu, vavauragwa aghanga vako, veso varuonga masabahu yako. Nene riyene du nenasaghaa, veso veufenja nkhoo ane." ⁴ Nyeso isucho ra Mungu reuhanya ntumi kene veve? "Natughaa kwa soko ane antu elfu mfungate nechu vatiumtugamea maru Baali." ⁵ Nampa uyi, ikhondo erei rafanoi kuina ne vasaghie kwasoko a ihwaniwa ra iforyo ra ija. ⁶ Nyeso ne mbese nekwa iforyo, tikange kwa ntendo. Kweso kwayo iforyo itiutendeka kange iforyo. ⁷ Ni ntuni kate? Intu nechu Israeli are ukurefeuj, atinarehangaa, nyeso auyohwaniwa vekakehanga, na vange vekatendewa urito. ⁸ Ne mwino ekaandekwa: "Mungu wavafaa nkhoo a utuu, u miho ne vataone, na matwe ne vatategheye, faha reo eyei." ⁹ Mweso Daudi ukuhanya, "Reka mesa yawe naitendeke lai mtegho, ku ufande wa uhufya, na urefeya hire khate awe. ¹⁰ Reeka miho awe atendewe kiiti ne vatadahe uona. Wende uvahunamya mighongo kutufu." ¹¹ Ari nguhanya, "U vahutiye faka ugwaa? ''Etatendeke uyi kate. Kweso kwayo, kwa uremwa kwawe, ukhomoi wafikaa umatuumbe, ne veso vayo vahangaa ghusea. ¹² Fanoi nembese uremwa kwawe ne ughware wa uremi, na kinya ukwafeka kwawe ne ughware wa matuumbe, nekwa ure na nguu eutendeka ufikea kwawe? ¹³ Na fanoi ngureghetya nanyee antu vomatuumbe. Kwasoko natendekaa ne mtumwa kwa antu vomatuumbe angeja, gibemea utumamii wane. ¹⁴ Wue ngurafa ghusea ne vemweere umwedu nanee. Wue kuvakhomoa vangeja vauya. ¹⁵ Kwa soko neatendeka uhitwa kwawe ne iyanje na uremi, ukwatywa kwawe kutendeka kweure neti ufanga ufuma kwaa kuyi? ¹⁶ Mbese mbesya ya mwandyo ne mbeeka, yuchu rweuyi kibumu ra utu. Mbese mwiiri ne mbeeka, masanja ayo nouyi. ¹⁷ Nyeso mbese masanja ange atemiwe, mbese veve, wi isanja rakihaka ra mzeituni, ukaembekwa khate awe, na mbese ukakikhanja itamberimwe nayo khate amiiri a ughware wa mizeituni, ¹⁸ utakisanse kunto a masanja. Nyeso mbese ukisansa, tiveve nechu ukuareya miiri, nyeso miiri eukuareya veve. ¹⁹ Are ujohauya, "Masanjo ekatemwa ne nedahe uembekwa khate a itina." ²⁰ Uyi ne tute. Kwasoko audea uhuvea kwawe vekatemwa, nyeso veve ukaemeka dee, kwasoko auhuvei wako. Utakighemeye mghonjo kwa hali akunto nanguu kweso oghofa. ²¹ Kwasoko nechu Mungu atinayarekea masanja a ntuudo, atiukuonea uvai navee no. ²² Raava, hee, ntendo ne njija na ukhae wa Mungu. Kwa ufaude umwedu, ukhae ukaja kunto a Ayahudi nechu vekagwa. Nyeso kwa ufande weuya, ijaa a Mungu eujaa kumto ako, mbese ukusagha khate aujaa. Wakwe mbese tuyi veve no ukuteimewe kuenge. ²³ No mbese vatiufwaeya khate audea uhuvea kwawe vajo embekwa kange. Kwasoko Mungu wina udaho wovaembeka kange. ²⁴ Kwa soko nechu nyenye mkatemwa unji kwa uruo newa ntundo mzeituni wa kihaka, na hiya a ntuido mkaembe kwa khate a mzeituni ne uja, ti nanguu ino Ayahudi, avai nehu ne kinya masanja a ntundo udaha uembekwa kange mung'e a mzeituni veso aghonjo? ²⁵ Kwa soko anyandughu ntiseghete mtamanye, ukeera na siri eyei, nechu kate mtatendeke mwina umanyi khate aughema kwanyu aghonjo. Siri eyei nechu ukaku wakighea khate a Israeli, faka uning'anea kwa matuumbe nekwajoja. ²⁶ Yuchu Israeli vong'e vajoghomowa, mwino eandikiwe: "Ufuma Usayuni ujie Mkhomoi. Ujouheya uyaghao ufuma kene Yakobo. ²⁷ Na erei reutendeka iaghano rane itamberimwe naveso, ikhendo nenejoyaheya mahutye aute." ²⁸ Kwa ufande umwedu ukeera sayu, vahwetw kwasoko anyu. Kwa ufande wuuya ufumea a kihwa niwa va Mungu, vayaujetwe kwa soko avakuuku. ²⁹ Kwasoko dahua na ietanwa ra Mungu refuifeuka. ³⁰ Kwa soko mwandyo nyenye are mwamrekie Mungu, nyeso fanoi mwahangie urekewa kwasoko auhita kwawe. ³¹ Kwa njea eyeye eyeye, fanoi Ayahudi avai vahitie. Idweya vayo nechu ufumea na uonewa uvai nemwajaliwe nyenye mdahete no uhanga urekewa. ³² Kwasoko Mungu wavatungie antu vong'e khate auhita nechu adahe uvaonea uvai vong'e. ³³ Mwino chu ukuu ughware na umanya na ihaa ra Mungu! Itiufimekea uramui wakwe, na njea yakwe itiumanyekaa! ³⁴ "Kwasoko ne anyu neuremanyie ighemo ra Mkuu? Na neanguu ne watendekie mseeyi wakwe? ³⁵ Na ne anyu newamfie mbee intu Mungu, kate arifwe kange?" ³⁶ Kwa soko ufuma kene mweso, na kwa njea akwe mweso, mantu ong'e arefo. Kene mweso etendeke weru khae. Amina.