¹ "Anyandughu na thatha vane, thegheyi ihanyo rane ninkhurithenda khene nyenye fhanoi." ² Mwirundo nari wathegheya Paulo urighithiye nayo kwa kiebrania, vakhakhia. Akhahanya, ³ "Nene ni myahudi, nifhafhiwe ungii o Tarso eneo ra Kilikia, khwenso nikhahanga elimu ung'ii iyiyi, u mighuu a Gamalieli. Nkhasomisywa ulingana na njia ni njija a sheria yama thatha withu. Nene nina bidii a Mungu khinya nyenye nyong'e mwino mwiri rio. ⁴ Nikhavakhasya kwa njia iyiyi fhakha ukhuya; nikhavathunga aghosia na akhema na uvajughutha khigereza. ⁵ Hata muthumami mukhuu wa anyampaa vong'e vudaha ufhuma khene venso khusokho a anyandughu niva fhumie Dameski, khuni nene uthunguya uenda khukho. Ari nivarethee antu Yerusalemu kwa njia iyo ili vathungwe na ukhasywa. ⁶ Ikhathendekha khusokho afhoyo nari nithunguyie ni najohumbia Dameski, muda wa mumwi ghafla weru ukhuu ukhakhighea ukirunde ukhaandia umwikhia. ⁷ Nikhagwa fhang'ii na uthegheya ruri ukhuhanya, 'Sauli, Sauli ni ntuni ukhunsimbiya?' ⁸ Nikhasucha, veve wi anyu, Thatha?' akhahanya, 'Nene ni Yesu Mnazareti, ni veve ukhunsimbia.' ⁹ Avoyo nari khwinawe vakhaona weru, khwenso vathina thegheya ruri wama uyo nari warighitha na nene. ¹⁰ Nikhahanya, 'Nithende ntuni, Thatha?' Thatha akhambwira imikha na uhefhee Dameski; khukho ujukhaniwa mu intu niutakiwe urithende.' ¹¹ Ntinadaha uona khusokho a mwangaza wa weru uroo, ndipo nikhaenda Dameski kwa uthongewa na mikhono a avoyo nari vi ithambi rimwe na nene. ¹² Khukho nikhathana na muntu ni ukhuithanwa Anania, ari muntu ni ukhwathie maraghiyo na muyo oghofhwa unsonge a Wayahudi vong'e nivukhikhaa khukho. ¹³ Akhaduya khene nene, akhaimikha unsonge ane na uhanya anyandughu vane Sauli, udahe uona.' Kwa muda ururo nikhamwona. ¹⁴ Akhahanya, 'Mungu wama thatha withu wakhuhwania veve udahe umanya mafhenji akhwe, umwona uyo ni wina haki na uthegheya ruri niufhumie ukhuurimi wakhwe. ¹⁵ Khusokho ujuthendekha wishahidi wakhwe kwa antu vong'e unto a ayoniwayaona na uyathegheya. ¹⁶ Khwenso fhanoi ni ntuni unindie? Ukhabatizwe, wendo oywa mahuthe akho, niukhurithana rina rakhwe.' ¹⁷ Baada oghea u Yerusalemu, na neari nurombo mung'ii a hekalu, ikhathendekha khwenso nikhafhewa ndothi. ¹⁸ Nikhamwona niukhunkhania, 'Hima na ufhume u Yerusalemu rui khusokho vathijuyanja ushuhuda wakho uhusu nene.' ¹⁹ Nikhahanya, 'Thatha, venso vayo vamanyie nikhavathunga ugereza na uvakhwa avoyo narivakhuyanjithe khwa mu sinagogi. ²⁰ Na nsaghami ama Stefano shahidi wakho neahu nuwa, nene no ari niimikhie fhifhi na uyanja na ari nulinda masaa a avoyo nari vamuuragha.' ²¹ Khwenso akhambwira, 'Enenda khusokho nene nijukhuthuma wende khwengi kwa antu vo mataifa." ²² Antu vakhamuyanjiya arighithe unto a ukhani uruyi. Khwenso baadaye vakhahumbua nduri na uhanya, "Muheye muntu uyuyi u ngii: khusokho nti khuja ukhikhaa." ²³ Nevathendekha vahumbua nduri, na ujughutha masaa awe na uyathendea ukhungu unto, ²⁴ Jemedari mukhuu akhahanya Paulo arethwe ungomeni akhaamuru awiywe khuru ukhukhuwa mianga ili mwenso wayo amanye ni ntuni ari vumukhuria mukhindo namna iyo. ²⁵ Hata nevathendekha vamuthunga na ighava, Paulo akhamwira uyo akida nari wimikhie fhifhi nayo, "Je! ni khuja khene nyenye umukhwa muntu ni Mrumi na khi athinahukumiwa?" ²⁶ Uyo akida nari wathegheya nkhani iyii, akhaenda khuni jemedari ni mukhuu na umwira, akhahanya usighithe uthenda ntuni? Khusokho muntu uyuyi ni Mrumi." ²⁷ Jemedari ni mkhuu akhaja na umukhania, "Nkhania, je veve ni umuntu wa Rumi?" Paulo akhahanya, "Hono." ²⁸ Jemedari akhamusucha, "Ni ukhira kiasi khikuru kha hela ndipo nkhahanga uraia." Khwenso Paulo akhamwira, "Nene ni mrumi wa ufhafhwa." ²⁹ Khwenso avoyo nari vithayari uenda umuwiya vakhahegha na umurekha muda ururo. Na jemedari no akhaughofa, ne wamanya khwenso Paulo ni Mrumi, na khusokho wamuthunga. ³⁰ Ithikhu nirisambiye, jemedari ni mukhuu akhasigha umanya thuthi uhusu mashitaka a Wayahudi dhidi ama Paulo. Khwenso akhamuhambwiya ithungo yakhwe na akhaamuru akhuu va makuhani na ibaraza rong'e vathane. Akhamuretha Paulo ufhangii na umuikha mukhathi awe.