¹ Neari khwathendekha khwarekhanukha nayo, nari khutunguyie u bahari, khukhaghea ithambi rimwe u ngii a Kosi, na fhadiu ayo khukhaghea ungii a Rodo, na ufhuma khukhi khukhaghea ung'ii a Patara. ² Nekhwahanga meli ukhia uenda Foinike, khukhanantia na khwenda. ³ Nekhwagh'ea unsonge a kisiwa kha Kipro, khukhamire kha ufhande wa khimoho, khukhaenda fhakha Siria, khukhaikha nanga u ngii a Tiro, khusokho khukho ndio meli ari injusimiywa migho ayo. ⁴ Khwenso nari wavaona anafunzi vakhakhikhaa khukho mathikhu saba. Anafunzi avai vikhamwira Paulo ukhiriya khene Mwahu khwenso mwenso athafhandathe Yerusalemu. ⁵ Hata nekhwadaha mathikhu ayo, sese khukhahegha khwenda khwithu. Vong'e ithambi rimwe, na akhema vawe na vana vawe, vakhakhuthindikhia u njia yithu fhakha ne khwafhuma unji a ng'ii, khwenso khukhatungama pwani, khukharomba, khukhakhirekha mu muntu. ⁶ Khukhanantia meli, khunui venso vikhasukha umakhaya awe khanki. ⁷ Khwenso nekhwadaha muhinjo withu ufhuma Tiro, khukhaghea Tolemai. Hafho khukharamucha anyandughu na ukhikhaa kwa ithikhu rimwedu na venso. ⁸ Fhadiu ayo khukhahegha khukhaenda Kaisaria. Sese khukhahefhea ukhaya ama Filipo, muhanyi wa nkhani neari umwedu wa avoyo ni visaba, na sese khukhakhikhaa ithambi rimwe nayo. ⁹ Muntu uyuyi ari wina ancha vane mabikira nari vutabiri. ¹⁰ Baada okhikhaa khukho kwa mathikhu kadhaa, akhasima ufhuma Uyahudi nabii umwedu ukhuithanwa Agabo. ¹¹ Mwenso akhaja khene sese na akhauheya mukhanda wama Paulo. Kwa usuyu akhakhithunga mighuu na mikhono akhwe mwenso na uhanya, "Mwahu ni Mweru ukhuhanya vii," "Vayahudi vo Yerusalemu vajomuthunga muntu niumiliki mukhanda uruyi, venso vakhamufhunya u mikhono a antu vo mataifa." ¹² Nekhwathegheya nkhani iyii, sese na antu nari vukhikhaa afhoyo vakhamusihi Paulo athanantie uenda Yerusalemu. ¹³ Khwenso Paulo akhasucha, "Muthenda ntuni, muria na uvunja nkhoo ane? Khusokho ni tayari nti kwa uthungwa, khwenso pia ukhuyia khukho Yerusalemu kwa ajili a rina rama Thatha Yesu." ¹⁴ Khusokho Paulo athinayanja ukhaniwa, khkharetha na uhanya, "Basi mafenji ama Thatha athendekhe." ¹⁵ Baada a mathikhu ayayi, khukhahoa mifukho ithuna unantia Yerusalemu. ¹⁶ Baadhi a anafunzi ufhuma Kaisaria pia vakhakhisambiya na sese. Vakhamuretha muntu umwedu niukhuithanwa Mnasoni, muntu wo Kipro, mwanafunzi wa khengi, nari khukhakhikhaa nayo. ¹⁷ Narikhwaghea Yerusalemu, anyandughu vakhakhusingi ya kwa uyanjo. ¹⁸ Fhadiu ayo Paulo ithambi rimwe na see khene Yakobo, na anyampaa vong'e arivarifho. ¹⁹ Baada ovaramucha, akhavafha sayu imwedu baada a mbuya a nkhani nari Mungu akhaithenda u miongoni a mataifa kwa ukhiriya uhuduma akhwe. ²⁰ Neari vathegheya ayoo, vakhamimbia Mungu, na akhamukhania, "Ukhengee, munyandugh'u, khwina maelfu anga nivaamini miongoni mwa aWayahudi. Venso vong'e vina nkhoo okhwatha sheria. ²¹ Vakhaniwa uhusu veve, kwamba ukhufundisha Wayahudi nivukhikhaa mukhathi amataifa urekhanukha vina Musa, na khwenso ukhuvakhania vathavakhurye ana vawe na vathahonge mila ya khengi. ²² Khusighithwe khuthende ntuni? Bila uoghofa vajothegheya khwenso veve wajaa. ²³ Khwenso thenda risiyi ni sese khukhukhania fhanoi: khukhwethe antu vane avoyo nevaikhie nadhiri. ²⁴ Vahone antu avayi na ukhioye veve ithambi rime nayo na uvarifhiye gharama yawe, ili vadahe umwa mithwe awe. Khusokho mu muntu ahange umanya kwamba nkhani nivaikhaniwa uhusu veve ni ya uregh'egh'e. Vikhifundisha kwamba veve pia usambiye sheria. ²⁵ Khwenso kwa sayu ya mataifa nivathendekha vaamini khukhaandikha na ufhunya maragh'iyo kwamba vupaswa ukhiepusha na mantu ni afhunyiwe sadaka kwa sanamu, na nsaghami, ufhuma khu risiyi nirinyomiywe, na vakhiepushe na uasherati." ²⁶ Khwenso, Paulo akhavafhunya aghosya, na ithikhu rakhavii, akhakhioya mwenso ithambi rimwe na venso, akhahefhea unyumba a Mungu, uhanya muda wa mathikhu okhioya, fhakha sadaka ifhunywe khusokho a kila umwedu wawe. ²⁷ Mathikhu ayo isaba nari ahuera uhiya, baadhi a Wayahudi ufhuma Asia vakhamwona Paulo unyumba a Mungu, na mwinendo ukhahura na vakhamuhumbira mikhono. ²⁸ Ari vukhwa mukhindo, "Antu va Israeli, khwariyi, uyuyi ni muntu nukhuvafundisha antu kila mahali nkhani nari ihiya na antu, sheria, na hafhai. Pia akhavaretha Wayunani mukhathi a nyumba a Mungu na kupanajisi ieneo viyi ni rithakatifu." ²⁹ Khusokho umwandio ari vamwona Trofimo Muefeso nari vi ithambi rimwe nayo u mjini, venso ari vathendie Paulo wamuretha unyumba a Mungu. ³⁰ Ngii ong'e ari a taharuki, na antu vakhadua ithambi rimwe na umukhwatha Paulo. Vakhamufhunya unji a Hekalu, na nduri ikharuthiwa. ³¹ Nari vathendekha vasoya umuuragha, sayu ikhamughea mukhuu wa ijeshi ra alinzi u Yerusalemu ong'e ari iijue ghasia. ³² Khwenso akhavahura askari na jemedari akhauduria umati. Neari antu vamwona mukhuu wa jeshi na askari, vakharekha umukhwa Paulo. ³³ Khwenso mukhuu wa jeshi akhahumbia na umukhwatha Paulo, na akhaamuru athungwe minyororo iviri. Akhamuwiya mwenso ni anyu na wathenda ntuni. ³⁴ Baadhi a antu khu umati ari vulopoka intu iriyi na vangija iriyo, khusokho jemedari athinadaha uvakhania intu lolote sokho a mukhindo, akhaamuru Paulo arethwe mung'ii a ngome. ³⁵ Khwenso nari waghea u ngazi, akhahowa na askari khusokho a ghasia ya umati. ³⁶ Sokho umati wa antu vakhamusambiya na uendelea ukhwa mukhindo, "Muheyi uyuyi!" ³⁷ Paulo nari ukhurethwa mung'ii a ngome, akhamwira mukhuu wa ijeshi, "Mudaha ukhwira intu?" Mukhuu wa jeshi akhahanya, "Je ukhurighitya Kiyunani? ³⁸ Je, veve uthi Mmisri uyo nari mwandio akhathongea uasi na akhahoa magaidi elfu ine nyikani?" ³⁹ Paulo akhahanya, "Nene ni Myahudi, ufhuma ungii a Tarso a Kilikia. Nene ni muntu wa ng'ii niimanyikhie. Nuvaromba, munyanjiye nirighithe na antu." ⁴⁰ Khwenso jemedari ne wamufha kibali, Paulo akhaimikha u ngazi na akhafhunya ishara kwa antu kwa mukhono wakhwe nari khwi thwii ino, akharighitha nayo Kihebrania. Akhahanya,