¹ Paulo akhavarava ithambi rimwedu antu vo ibaraza na uhanya, "Anyandugh vane, nakhikharie unsonge a Mungu kwa nkhoo ni njija fhakha fhanoi rio." ² Kuhani ni mukhuu Anania akhavakhania avoyo nevaimikhie fhifhi nayo vamukhwe momo wakhwe. ³ Khwenso Paulo akhamwira, "Mungu ujukhughwa veve, ukuta niwirie chikaa. Wikhee ni ukhunkhania kwa sheria, na vee ukhuamuru nikhuwe kinyume na sheria?" ⁴ Avoyo nari vaimikhie fhifhi nayo vakhahanya, khwenso ndio mwino ukhumuthukha kuhani nimukhuu wa Mungu?" ⁵ Paulo akhahanya, "Anyandughu vane, nene ntinamanya kwamba uyuyi ni kuhani ni mukhuu. Khusokho iandikhiwe, uthijurighitya ivi unto a mtawala wa antu vakho." ⁶ Paulo nari waona kwamba ufhande umwedu wa ibaraza ni Masadukayo na vangija ni Mafarisayo, akhahumbwa ruri na uhanya, "Anyandughu vane, nene ni Mfarisayo, mwana wa Mfarisayo. Khusokho iyiyi nitegemee kwa nguu ufufuo wa akhuyi ni nuhukumiwa nayo." ⁷ Ne wayahanya ayayi, malumbano makhuru akhadwiya baina a Mafarisayo na Masadukayo, na mwirundo ukhafhaghatha. ⁸ Khusokho Masadukayo vuhanya khuthii ufufuo, malaika wala khuthii mwahu, ila Mafarisayo vuhanya ayayi ong'e arifho. ⁹ Ghasia nkhuru ikhathendekha na baadhi a andishi nari vikhu ufande wa Mafarisayo vakhaimikha na wighitha, vakhahanya, "Khuthina ona ni rivi dhidi a muntu uyuyi. Khwiuri mwese mwahu au malaika warighitya nayo?" ¹⁰ Khwenso ikhafhuma hoja nkhuru, mukhuu wa majeshi akhaoghofha khusokho Paulo akhathemangwa ifhande ifhande na venso, khwenso akhahanya anajeshi vong'e fhang'i na umuhoa khwa nguu ufhuma kwa ajumbe va ibaraza ina umuretha ungome. ¹¹ Uthikhu niusambiye Thatha akhaimikha fhifhi nayo na uhanya, "Uthathije, khusokho wanyona u Yerusalemu, khwenso ujufhunya ushahidi pia u Roma." ¹² Nekhwacha, baadhi a Wayahudi vakhathendo iaghano na uithana laana khunto awe venso: Vakhahanya kwamba vathijulya wala unywa intu lolote fhakha vamuuraghe Paulo. ¹³ Ari khwina antu zaidi a arobaini nivathendie njama iyiyi. ¹⁴ Vakhaenda kwa akhuu va makuhani na anyampaa na uhanya, "Khwakhiikha sese u laana ni nkhuru, khuthalye intu lolote fhakha khene khujumuuragha Paulo. ¹⁵ Khwenso, ibaraza rimwire jemadari mukhuu amurethe khene sese, khinya ni mujuamua khesi akhwe ija. Khene sese khwi tayari umuuragha nikhi athinaja hafhai." ¹⁶ Khwenso mwana wama dada wama Paulo akhathegheya kwamba ari khwina njama, akhaenda akhahefhea mung'ii a ngome na umwira Paulo. ¹⁷ Paulo akhamwithana akida umwedu nauhanya, "Muhoe muhumba uyuyi khene jemadari; khusokho wina nkhani yomwira." ¹⁸ Khwenso akida akhamuhoa muhumba akhamuthoa khene jemedari mukhuru akhamwira, "Paulo uyo mthungwa akhanyintana akhasigha nikhurethee muhumba uyo veve. Wina ukhani wo khwira." ¹⁹ Jemadari mukhuru akhamukhwatha kwa mekhono na ukhisunta nayo khwengi na umuwiya, "Ni intu ikhi ni usigh'ithe unkhania?" ²⁰ Muhumba uyo akhahanya, "Wayahudi vaelewana ukhuromba umurethe Paulo fhadio ukhibaraza khusokho vasighithe uhanga sayu yakhwe kwa usahii zaidi. ²¹ Basi veve uthayanje khusokho antu zaidi a arobaini vamuvizie. Vakhifhungie kwa laana, vathalye wala unywa fhakha khene vajomuuragha, hafa fhanoi vithayari, nivarindie ruhusa ufhuma khene veve." ²² Khwenso uyo jemadari mukhuru akhamurekha mhumba wenda yakhwe, baada omuthumiya "Uthamwire muntu yoyote kwamba umeniarifu ayayi." ²³ Wavaithana maakida vaviri akhahanya vakhanii askari maghana aviri vende Kaisaria na askari anyonantia farasi makhumi mufhungathi na ni vina mikhoha maghana aviri, mujuhegha awamu atatu a uthikhu. ²⁴ Akhavakhania uikha marimwana ija ayoo ni Paulo ujumufha na umuhora ija kwa Feliki Gavana. ²⁵ Akhaandikha nkhani kwa namna iyiyi, ²⁶ Klaudio Lisia kwa Liwali mtukufu Feliki, uramucha. ²⁷ Muntu uyuyi akhakhathwa na Wayahudi vathendekha vifhifhi umuuragha, khwenso nkhaenda ithambi rimwe na ikhundi ra askari nkhamuheya, ninajohanga sayu ni mwenso muntu wa Kirumi. ²⁸ Nkhasigha umanya ni ntuni vamusithakha, khwenso nikhamuthoa ubasa. ²⁹ Mkhaona khwenso ari usithakhiwe kwa ajili owiywa nkhani yawe, khwenso athinasithakhwe kwa ukhani wowote wo stahili uuraghwa wala uthungwa. ³⁰ Khwenso ikhamanyikha khini nene kwamba khwina nkhani dhidi akhwe, khwenso rui nikhamuthuma khene veve, na uvakhama avoyo nivamusithakhie varethe nkhani dhidi akhwe unsonge akhwe. Vakhafhaghatha." ³¹ Khwenso avo askari vikhathegheya amri: vikhamuhora Paulo vakhamuthoa fhakha Antipatri uthikhu. ³² Ithikhu nirisambiye, maaskari vingi vakhavarekha avoyo anyonantia farasi vende ithambi rimwe nayo, na venso vakhasukha ngomeni. ³³ Na anyonantia farasi nevaghea Kaisaria, na umufha liwali iyo sayu, vakhamuikha Paulo unsonge awe. ³⁴ Mwenso liwali newamisoma sayu, ikhamuwiya Paulo akhafhumia ijimbo ikhi, nari wamanya kwamba ni muntu wa Kilikia, ³⁵ akhahanya, "Nijukhuthegheya veve mvathendekha vaja avoyo nivakhusithakie," akhahanya aikhwe mukhathi a ikulu rama Herode.