¹ Ejile emisango ejo, Yesu agendele kungego ya inyanja ya Galilaya niyo eibhilikilwa Inyanja ya Tiberia. ² Echise chinene nichimulubha kwo kubha bhalolele ebhibhalikisho bhinu akolele ku bhalwae. ³ Yesu nalinya ingulu kulubhala lwa ingulu lwe chima neyanja eyo na bheingisibwa bhae. ⁴ (Na ipasaka, ya malya ga Bhayaudi galiga gali yei). ⁵ Yesu anaenamusha ameso Gaye aliga galiyeyi na Lola chise chinene chimujako, kumwene na mubhusha Filipo ati, "Echijaki okugula ebhilo koleleki abhanu bhanu bhabhone okulya"? ⁶ (Nawe Yesu ajaikile jinu ku Filipo kumusaka kwokubha omwene aliga amenyele chinu kenda okukola). ⁷ Filipo namusubya ati, "Nolwo ebilyo bye chibhalo silingi magana gabhili bhitakabheile nolwo bili umwi akabhene katoto." ⁸ Andrea, oumwi wa bheigisibwa bhae omumula wabho Simon Petro namubwila ati ⁹ Yesu, "Aliyo omusigaji anu ana emikate etanu na jiswi ebhili, nawe bhinu ni woki mubhanu bhafu kutyo?" ¹⁰ Yesu nabhabwila ati, "Mubheyanje abhanu asi" (bwaliga bhulio bhunyasi bwafu kulubhaju ao). Kutyo abhalune bhali uti bhisila bhitanu nibheyanja asi. ¹¹ Mbe Yesu nagega emikate ejo etanu nasima na bhagabhila abhanu bhaliga bheyanjile. Kutyo kutyo nabhagabhila jiswi lya kutyo aliga mbenda. ¹² Abhanu bhejile bhakeguta, nabhabwila abheigisibwa bhae ati, "Mubhikofye ebhibhutu bya jinswi, bhinu byasigae koleleki chasiga kubhulao chona chona". ¹³ Mbe nibhakofya na nibhejusha ebibho ekumi na bhilili, ebhibhala bye mikate etanu eja jisairi-ebibhala bhinu byasigae kubhanu bhanu bhalie. ¹⁴ Mbe abhanu bhejile bhalola echibhalikisho chinu akolele nibhaika ati, "Chimali unu niwe omulagi unu kaja muchalo." ¹⁵ Yesu ejile amenya ati abhenda okumwagwata koleleki bhamukole kubha mukama webwe, atagene nabho, nagenda kuchima omwene enyele. ¹⁶ Kwejile kwakinga kegolo, abheigisibwa bhae nibhatebhela kumwalo. ¹⁷ Nibhalinya mubwato nabhaliga nibhambuka okugenda Kapernaumu. (Echisute chaliga chengie na Yesu aliga achali kubhakingako kubhene). ¹⁸ Omwanya ogwo omuyaga gwaliga nguyemba, na inyanja nigendelela okusaluma. ¹⁹ Lindi abheigisibwa bhae bhaliga nibhafuga mafugile makumi gabhili na gatanu amwi makumi gasatu, nibhamulola Yesu nalibhata ingulu ya inyanja nafugela ku bwato, nibhobhaya. ²⁰ Nawe nabhabwila ati, "Nanye! Musige okubhayana". ²¹ Lindi bhaliga bhekilisishe okumuyeka okwingisha mubwato, ao nao obwato nibhugobha kuchalo enu bhaliga nibhaja. ²² Olusiku lunu lwalubhiye echise chaliga chimeleguyu kugego ya inyanja nibhalola ati bhutalio bwato bhundi tali bhunu Yesu na bheigisibwa bhae bhaliga bhachali kulinya nawe abheigisibwa bhae bhaliga bhagengele jebwe bhenyele. ²³ (Amwi no kubhao amato agandi ago gasokele Tiberia ayei nanu bhaliye emikate unu Lata bhugenyi asimiye). ²⁴ Omwanya echise bhejile bhamenya ati kubha atali Yesu nolwo abheigisibwa bhae bhaliga bhalyeyo, abhene abho bhalinyile munda ya mato nibhagenda Kapernaumu nibhamuyenja Yesu. ²⁵ Bhejile bhamulola kugego yendeyo ya inyanja nibhamubhusha, "Rabi wejile enu lii?" ²⁶ Yesu nabhasubya, nabhabwila ati, Nichimali, chimali, omuyenja anye, tali kwo kubha mwalole echibhalikisho, nawe kwo kubha mwaliye emikate no kwiguta. ²⁷ Musige okukolela emilimu ebhilyo bhinu ebhinyamuka, nawe muchikolele emilimu ebhilyo bhinu ebhikala nolwo obhuanga bhunu omwana wo munu kabhayana, kubha Nyamuanga Lata amuteyeo omuuli ingulu yaye." ²⁸ Mbe nibhamulola ati, "Nichinuki chinu chiile okukola koleleki okujikola emilimu ja Nyamuanga?" ²⁹ Yesu nasubya ati, "gunu nigwo omulimu gwa Nyamuanga: Ati mumwikilishe omwene antumile." ³⁰ Mbe nibhamubwila ati, "Ni chibhalikishoki chinu ouja okukola ati echitula okulola no kwikilisha? Oukola chinuki? ³¹ Bhalata bheswe bhaliye ebhilo ebhala, lwa kutyo jandikilwe, "Abhayaye emikate okusoka mulwile koleleki bhalye." ³² Mbe Yesunabhasubya ati, "Nichimali, chimali, atali Musa oyoabhayeye omukate okusoka mulwile, nawe Lata wani niwe kabhayana omukate gwe chimali okusoka mulwile. ³³ Kwokubha omukate gwa Nyamuanga ni guliya okwika okusoka mulwile no kuyana obhuanga echalo. ³⁴ Mbe nibhamubya ati, "Lata bhugenyi chiyane omukate gunu omwanya gwona." ³⁵ Yesu nabhabwila ati, "Anye nanye omukate gwo bhuanga, unu kanyijako kwanye atalilumwa mweko no mwene unu kanyikilisha atalitwa bhulilo kata." ³⁶ Nawe nabhabwila ati, mwandola, na muchali kunyikilisha. ³⁷ Bhona bhanu Lata kanana bhalija kwanye, wona wona unu kaja kwanye nitalimwesa anja katyali. ³⁸ Kwo kubha nisokele mulwile, tali kwo kukola kwenda kwani, nawe okwenda kwaye unu antumile. ³⁹ Na ganu nigo okwenda kweye unu antumile ati, nisige okumubhusha nolwo umwi ku bhaliya ananile, nawe enebhasulula ku lusiku lwa kubhutelo. ⁴⁰ Kwo kubha kunu nikokwenda kwa Lata wani ati, wona wona unu kamulola Omwana no kunyikilisha abhone obhuanga bwa kajanende; nanye ndimusulula ku lusiku lwo bhutelo. ⁴¹ Mbe Abhayaudi nibhetong'anila kwo kubha aikile, "Anye ni mukate ogwo gwekile okusoka mulwile." ⁴² Nibhaika ati, "Unu atali Yesu omwana wa Yusufu, unu esemwene wae na nyilamwene wae chimumenyele? Yabha kutiki woli kaika, 'Nasokele mulwile'?" ⁴³ Yesu nasubya, nabhabwila ati, "musige kwitong'anila emwe abhene. ⁴⁴ Atali unu kaja kwanye akalema okukululwa na Lata wani unu antumile nanye ndimusulula ku lusiku lwo bhutelo. ⁴⁵ Kwo kubha jandikilwe mu bhalagi, 'Bhaliigisibwa na Nyamuanga.' Bhuli unu kongwa no kwiigila okusoka ku Lata kaja kwanye. ⁴⁶ Tali ati alio omunu oyo amulolele Lata, atali unu asokele ku Nyamuanga-amulolele Lata. ⁴⁷ Nichimali, chimali, unu kekilisha ali no bhuanga bwa kajanende. ⁴⁸ Anye nili mukate gwo bhuanga. ⁴⁹ Bhesomwana bhemwe bhaliye ebhilyo ibhala, na nibhafwa. ⁵⁰ Bhinu nibyo ebhilyo bhinu dbhisoka mulwile' koleleki omunu alyeko kulubhala lwae koleleki atafwa. ⁵¹ Anye ni bhilyo bhinu ebhiyanja bhisokele okusoka mulwile. Alabha omunu wona wona akalya kulubhala bye bhilyo bhinu, alibha muanga kajanende. Ebhilyo bhinu ndigabha ni mubhili gwani kulwo bhuanga bwa isi." ⁵² Abhayauda nibhabhiililwa abhene kwa bhene na nibhamba okubhambashanya nbhaika ati, "Omunu unu katulaatiki okuchiana omubhili gwae chigulye?" ⁵³ Mbe Yesu nabhabwila ati, "Nichimali, chimali, mukalema okugulya omubhili gwo Mwana wo Munu no kunywa amanyinga gae, mutakubha no bhuanga muda yemwe. ⁵⁴ Wona wona unu kalya omubhili gwani no kunywa amanyinga gani anabho ubhuanga bwa kajanende, anye enimusulula kulusiku lwo bhutelo. ⁵⁵ Kwo kubha omubhili gwani no bhilyo bye chimali, na manyinga gani nicho echo kunywa check chimali. ⁵⁶ Unu kalya omubhili gwani no kunywa amanyinga gani kekala mwanye, nanye mu mwene. ⁵⁷ Alabha Lata omwene ni wo bhuanga antumile, na kutyo kekala kwo kubha Lata, na unu ona kalama kwo bhutulo bwani. ⁵⁸ Gunu nigwo omukate gunungwasokele mulwile, atali lwa bhalata kutyo bhaliye nibhafwa. Unu kagulyaomukate gunu kalama kajanende. ⁵⁹ Yesu aikile emisango jinu munda ya likofwanya bhunu aliga neigisha eyo Kapernaumu. ⁶⁰ Now abhafu bha bheigisibwa bhae bhejile bhongwa ganu, nibhaika ati, "Linu niigisho ekomeye niga kalitula okulilamila?" ⁶¹ Yesu kwo kubha amenyele atiebheigisibwa bhae bhaliga mbetong'anila emisango jinu, nabhabwila ati mbe omisango gunu nigwo ogubhekujusha? ⁶² Mbe jilibha kutiki alibha mwamulola omwana wo munu neka okusoka anu aliga okwamba? ⁶³ Ni mwoyo nigwo ogutamo obhuanga. Omubhili gutakusakila chinu chona chona. Emisango jinu naika kwemwe ni mwoyo na no bhuanga. ⁶⁴ Mbe nawe bhachalio abhunu agati yemwe bhanu bhatakwilisha." kwo kubha Yesu amenyele kusokelela okwamba unu atakutula okwikilisha no mwene unu alija okumulomela inuku. ⁶⁵ Nabhabwila ati, ni kwokubha linu nabhabwiliye ati atalio omunu unu katula okuja kwanye tali ayanibwe na Lata." ⁶⁶ Abha ya jinu abheigisibwa bhae bhafu bhasubhile inyuma nibhalema okulibhatila nage lindi. ⁶⁷ Yesu nabhabwila bhaliya ekumina bhabhili, "Mbe nemwe omwenda okugenda?" ⁶⁸ Simoni Petro namusubya ati, "Lata bhugenyi chije kuga kubha awe uli ne misango Jo bhuanga bwa kajanende, ⁶⁹ Na chekilisha no kumenya kubha awe nimwelu wa Nyamuanga." ⁷⁰ Yesu nabhabwila ati, "Mbe anye nitabhasolele emwe, no umwi wemwe ni shetani? ⁷¹ Woli aliga naika ku Yuda, omwana wa Simoni Iskariote, kwo kubha aliga niwe unu umwi wa bhaliya ekumina na bhabhili, unu niwe kamulomela inuku Yesu.