¹ Nitambula ikulukulu ku Kilisito. sikanitambula kaulongo, ni shigo lyane lyukushudila palumui ninene ku muau muelu, ² kina kikoli kinishungu kikulu ni uwai nasikaushila mukati ya moo wane. ³ Kina alinijilitamani inee nene kuzumua nukutengua kulii nu Kilisito. kunsooko ya antua anee, ⁴ Ioo aa luli luane ku mwili. ioo Aizlaeli. natite hali ya kutendeka alisha, a utukufu, a malago, ni zawadi nya shalia, kukumukulia u Mukungie, ni ahadi. ⁵ Ioo ingi atongeli u Yesu waza ku heshima kujala u mwili uu_ nu wene ingi Mukungile wa tulu. Nunduyo wakuligue kali na kali.amina. ⁶ Lakini sika kina ahadi zaki Mukungile zadulagua kupikiila. Ndogolelio sika kila muntu nuili ku Izlaeli ingi Muizlaeli muene. ⁷ Sikaiyo sunga ku ulelua waki Ablahamu kutula ingi alisha akue muene.Lakini, " ingi kukilila u Isaka ulelua wako ukiyitua." ⁸ Iyii ingi kina, alisha aa mwili sika alisha aki Mukungile.Lakini alisha aa ahadi ilagua kutula ulelua. ⁹ Ndogolelio iyii lualu lukani lua ahadi: Ku matungo iga nikiiza, nu Sara ukipegua mulisha." ¹⁰ Sika ilii du, lakini pembele u Rabeka kuligia iimbi ku muntu umui, u Isaka tata witu_ ¹¹ kina alisha alikilii alelue naa alikili watende kintu kyensi nakiza hau kibii, kina kusudi lyaki Mukungile kuligana nu usaguli lyimike, wala sika ku ntendo, lakini ingi kunsooko yaki uyo nukuita. ¹² Aliikitigue kumuakue, "Mukulu ukakumutumikila munino." ¹³ Kina naliyandikagua: "Yakobo alinumulogilue, lakini u Esau alinumuipilue." ¹⁴ Basi kanki kukitambula yani? Mbii ukoli uzalimu kuaki Mukungile? aaa. ¹⁵ Kunsooko utambula kuaki Musa, "nikitula nu usamili kuaki uyo nanikakumusamila, na nikitula ni kinishungu kuaki uyo nanikakumuonela kinishungu" ¹⁶ Ku kululo gua, sika kunsooko ya mwene nukumanka, lakini kunsooko ya Mukungile, nukulagila usamilua. ¹⁷ Kunsooko mandiko makutambula kuaki Farao, 'Kwa kusudi ilii maalumu alinukuukilie, ndagile ingulu zane kumuako, nakina ilina lyane litanantigue ku nsii tulu. ¹⁸ Iyo gua, Mukungile kulaa wa usamilii, ku wensi numulogilue, nu kuaki nakulumulogilue, ukumutenda kutula wahalalii. ¹⁹ Kangi ukitambula kumuane," Niki kilii uyona tiulio? Nuwii nuakonda kiumatilia ulamuli wakue?" ²⁰ Sia numwene, muanamuntu, uwee ingi wani nukushokelagia sia nu Mukungile? ukoli usuumi wensi wa nalikiumbue kutambula kuaki muumbii, "Niki alunumbile itii inee?" ²¹ Mbii umuumbi kulaa mugila haki kyanya ya ulongoo kujipia kiseme ku utumili maalumu kupunila nii ilongo lilo lilo, ni kiseme kyingii ku utumilii wa kil ntondo? ²² Mbii kina Mukungile, nuili wakondaa kuagila gazabu yakue nu kutenda ingulu yakue kukumazuka, aliwiumatililie ikulu nangulu kuisheme ya zahabu naliijipiligue kua kulimansiilya? ²³ Mbii kina alituendile itii kina walagile uwingi wa utukufu wakue kyanya ya isheme ya usamili, naliwakonda kukuijipilia kunsooko ya utukufu? ²⁴ Mbii kina alutendile itii gaa kumuitu, nali ukuitile gaa,sika du kupuna kua Ayahudi, lakini gaa kutoka kua antu aa nsii? ²⁵ Kina nukutambula gaa kuaki Hosea: "Nikakiaita antu anee nasikali antu anee, nu muilogua wakue nali sika mulogue. ²⁶ Na ikitula kina ipoo kialiitambulue kumuao, "inyee sika antu anee,"ipoo ikiyitua anaa aki Mukungile nuili hai." ²⁷ Isaya ulilaa kuyusiana ni Izlaeli, " kina yalio lya anaa aa Izlaeli zii munsanga wa bahali, ikitula masagilo naikigunua, ²⁸ Kunsooko u Shekulu ukakulusola ulukani luakue kyanya ya nsii, kuukau nu kuukaminkilu. ²⁹ Na kina namna u Isaya nalutambuile ikuandia, "kina u Shekulu nua majeshi sikanukulekela kunuma ikileli kunsooko yitu, alikujitula kina Sodoma, na alikujilitendua kina Gomola. ³⁰ Kukitambula yani gua? kina antu aa nsii nalisikaiduma ka haki, haki ku usuili. ³¹ Lakini Izlaeli, nuludumile shalia ya haki, sikanumipikiila. ³² Kua niki sika iyo? Kunsooko sikaliamidumile ku usuili, bali ku ntendo. Aliikumpilie kyanya igue lya kikumpia, ³³ Kina naliyandikagua, "Laa, nagonagia igue lya kikumpia ku Sayuni nu nkonko ya kuulia. Mwene ukusuila ku ilii sika ukikolua nsoni."