¹ Kululo gua kutilii ulamulua wa azabu kyanya yaoo naili muaki Kilisito Yesu. ² Kunsooko kutili kanuni nya nkolo nya upangaa uoo nawili kuaki Kilisito Yesu intenda inee kutula huru kulii ni kanuni nya milandu ni nkia. ³ Ku ndogolelio ikio ishalia naliyikidulile kutenda kunsooko alineketu ku mwili, Mukungile alutendile. Alumutumile muana wakue nung''ene ku mpiani nya mwili wa milandu watule sadaka ya milandu, na nulamula milandu ku mwili. ⁴ Alutendile itii,malagilio ma shalia matimiligua mukati yitu, ishee nasikakulongola kua kutiata mantu ma mwili, bali kua kutiata mantu ma nkolo. ⁵ Ioo nakuutiata umwili akusiiga mantu ma mwili, lakini ioo nakumitiata inkolo akusiiga mantu ma nkolo. ⁶ Kunsooko nia ya mwili ingi nkia, bali nia ya nkolo ingi upangaa ni amani. ⁷ Iyii ingi kunsooko iyo nya mwili ingi ulugu kyanya yaki Mukugile, ku ndogolelio sikumitiatile shalia yaki Mukungile, wala sikisumile kutiata. ⁸ Ioo nakuutiata u mwili sikaasumile kukumulogua u Mukungile. ⁹ Sunga iyo, mukutilii ku mwli bali ku nkolo, kina kulukulu inkolo yaki Mukungile yikikala mukati yani. Lakini kina muntu mugila nkolo yaki Kilisito, mwene sika wakue. ¹⁰ Kina u Kilisito ukolii mukati yani, mwili wakia ku mantu ma milandu, bali nkolo ingi mpanga ku mantu ma haki. ¹¹ Anga inkolo yaki uyo nalumuiule u Yesu kupuna kuakii ukikala mukati yani, mwene nuaso nalumuiule u Kilisito kupuna ku akii ukakiipela gaa imiili yani nya nkia uupanga ku nzila nyankolo wakue, nukikala mukati yani. ¹² Iyo gua, antua anee, ishee ku adeni, lakini sika ku mwili kina kukale ku namna ya mwili. ¹³ Ndogolelio anga mukalile ku namna ya mwili, muili piipi kukia, lakini anga ku nkolo mukumaulaga matendo ma mwili, inyee mukakikala. ¹⁴ Ndoglelio kina ingii itongelua nu nkolo waki Mukungile, iaa ingi anaa aki Mukungile. ¹⁵ Kunsooko sikalimusingile nkolo nua usese kanki sunga mopokee. Badala yakue, alimusingile nkolo nya kutendue kutula anaa, ku nyaso kulilaa, "Abba, Tata!" ¹⁶ Nkolo mwene ukushudila palumui ninkolo zitu yakina du alisha aki mMkungile. ¹⁷ Anga du ku alisha, iyo du kuasalii gaa, asali aki Mukungile. Ni ndishe du kuasali palumui nu Kilisito, anga ku kulukulu kunomeka nu mwene kuligie kukuligua palumui nunduyo. ¹⁸ Kunsooko niyalia uwagii wi tungo ilii sika kintu angandigalie na utukufu naukikunukulua kumuitu. ¹⁹ Ku ndogolelio iyumbe tulu gaa ilailile ku nsula ningi kukunukulua ku anaa akii mukungile. ²⁰ Ku ndogolelio uumbi gaa pansii ya ubatilii, si ku hiali yakue, ila kunsooko yakue mwene nawitumbile. ingi ku tumaini ²¹ kina uumbi wene nduyo ukiyikua huru nu kupunigua ku usese wa wononi, nu kuingiligua ku uhuru wa ukuligua wa alisha waki Mukungile. ²² Ku ndogolelio kulingile yakina uumbi nduo gaa uluala nu kuyaga kuwaii palumui sunga inoo. ²³ Sika iyo du, ni ndishe akola nakutiite malimbuko ma nkolo_ nindishe gaa kuluala ku nafisi zitu, kulindilile kutendua anaa, yani ugunua wa miili yitu. ²⁴ Ku ndogolelio ingi ku taraja iyii alikuagunue. Lakini kintu nalikitegamilue angakigele kutilii taraja kanki, ku ndogolelio ingi wani nukikukitarjia kio nuakiona? ²⁵ Bali angakutarajie kintu nasika kukukiona, kukilindile kunsula nkulu. ²⁶ Ku namna iyo iyo, nkolo nduyo ukukualia ku uneketu witu. Ku ndogolelio sikakuizi kulompa kina yukujipiile, lakini nkolo mwene ukukuklompela kua kuluala nasikaishumika kulikitigua. ²⁷ Nu mwene nukukendegela imioo ukumana masala ma nkolo, kunsooko ukulompa ku niaba yao nasuilile kuligana ni ulowa waki Mukungile. ²⁸ Nasi kumanile yakina ku tulu namulogilue u Mukungile, mwene ukutenda mantu tuluku ukende, ku ioo tulu naitue kua kusudi lyakue. ²⁹ Kunsooko ioo tulu naliwamanile kupunila iyukii aliwasaguile kupunila iyukii impianigue ni mpiani ya muana wakue, u mwene watule mulelua wa kuandia mua antua naingii. ³⁰ Ni ndioo naliwasaguile kupunile iyukii naliwaitile, asoo aliwaalilie ihaki. Ni ndioo naliwaalie ihaki. Ni ndioo naliwaalilie ihaki, niaso gaa nuakulia. ³¹ Kutambule yani gua kyanya ya mantu igaa? Mukungile kinawili luandii luitu, itii wani nuili kyanya yitu? ³² Mwene nasikukumulekela muana wakue mwene bali alumupunile kunsooko yitu tulu ukiyuliai kukukendepa ni mantu tulu palumui nunduyo? ³³ Itii wani nukakiatakia asagulua aki Mukungile? Mukungile uyo munakualia ihaki. ³⁴ Itii wani nukakumulamulilia iazabu? Kilisito Yesu mwene nalukiile kunsooko yitu, ni kukila maso, mwene gaa alimuiulue. Nunduyo utemile palumui nu Mukungile luandi pa heshima, ninkanki nduyo ukukulompela ishee. ³⁵ Itii wani nukakukutuanula nu ulowa waki Kilsito? dhiki, hau shida, luago, hau nzala, hau kipui, hau ulugu, hau mpanga? ³⁶ Kina nayandikue,"ku nsailo yako kuyulagua munsii pii. Alikuaaligue zii nkolo zakusinzua." ³⁷ Ku mantu igaa tulu ishee du kukila ya adulii ku mwene nalukulogilue. ³⁸ Ku ndogolelio nakondii shisikilia kina wala nkia, wala upanga, wala malaika,wala utemi,wala intu naikolii, wala intu naijile, wala ngulu. ³⁹ wala namili kyanya, wala namili pansii, wala kiumbua kyingi kyensi tulu, sikakikishuma kukukamantula nu ulogua waki Mukungile witu.