¹ Kangi nsailo kii nutite u Myahudi? ni nsailo nya tohara itii nyii? ² Ingi izaa zigi ku kila nzila. muandio wa tulu, Ayahudi aliapegue ukunukulua kupuna kuaki Mukungile. ³ Lakini, ikitulaii kina akei a Ayahudialiagila ka usuili? Mbii, kulekishuila kumiao ikitenda usuili waki Mukungile kutula batili? ⁴ La hasha. badala yakue, leka Mukungile wigele kutula kulukulu, sunga kina kila muntu ingi mulongo. kina naliyandikue, "yakina usume kigelaa kina umuna haki ku nkani zako, na usuume kudula kinuingila muuulamulua. ⁵ Lakini anga udobu witu ulagila haki yaki Mukungile, kutambule yani? mukungile sika zalimu kinupunia gazabu yakue, mbi,wilii yaso? nilikitia kupunilaa ni mantiki ma kiuntu. ⁶ La hasha! Ingi namna kii gua Mukungile ukakuulamula uunkumbigulu? ⁷ Lakini anga kulukulu nyaki Mukungile kukilila ulongo wane ukupunagia sifa ningii kunsooko yakue, nikii kilii nilamulua kina muna milandu? ⁸ Nikii kulekitambulaa, kina nakuatungigue ni kina naingi naahakikisiliekina kutambula, " kutende udobu, ili namaza mazee"? Ulamulua kyanya yao ingi ya haki. ⁹ Itii yani gua? kukitetea undiishe? aa nkankana. kunsooko ishee kuakondaa kukualamulaa Ayahudi na wayunani wote palumui, yakutua ilii pansii ya milandu. ¹⁰ Iyii ingi kina naliyandikue." Kutilii nutite haki, sunga numui. ¹¹ Kutilii muntu nulingile. Kutilii muntu numutiatile Mukungile. ¹² Tulu apilukaa. iene palumui atula agila ka ndogolelio. Kutilii nukutendaa namaza, la sunga numui. ¹³ Ilakalaa yao ingi kibiila nakyili kualie. indimi zao zikongile. Sumu ya nzoka ikoli pansii ya milomo yao. ¹⁴ Milomo yao ijuile uzumua nu uwai. ¹⁵ Migulu yao itite lumanko kuita migalii. ¹⁶ Uwononi nu luago ikolii munzila zao. ¹⁷ Antu iaa sikaamanile nzila nya amani. ¹⁸ Kutilii woawaki Mukungule ntongela ya miso mao" ¹⁹ Inoo kumalinile kina kyensi shalia nyukumbulaa, ukutambula ni ioo naili pansii ya shalia. Iyii ingi kina kila kilakala kidindue, ni yaso unkumbigulu tulu usuume kuwajibika kuaki Mukungile. ²⁰ Iyii ingi kunsooko kutilii mwili naukiyaligua ihaki ku ntendo nya shalia ntongela ya miso makue, kunsooko kukilila ishalia yukuiza ulingii wa milandu. ²¹ Lakini inono bila shalia, haki yaki Mukungile yakumazuka. alinshudilueku shalia ni manabii, ²² nyaso ingi, haki yaki Mukungile kukilila usuili ku Yesu Kilisito ku ioo tulu naasuilile. Ndoglelio kutilii kasia. ²³ Kunsooko tulu atendaa milandu, nu kukepelua nu utukufu waki Mukungile. ²⁴ Aalagigua haki nankanda ku ukuende wakue ku nzila nawili muaki Kilisito Yesu. ²⁵ Ku ndogolelio Mukungile alumupunilie u Kilisito Yesu watulu ukamantanio ku nzila nya usuili ku migali yakue. Alumupunile u Kilisito zii ushaidi wa haki yakue, kunsooko ya kuilekelela milandu nyakilile. ²⁶ ku wiumatilia wakue,igaa tulu alimapunile kulagila ihaki yakue kutungo ilii lya inoo. Iyii ailii wasuume kukisibitisha mwene kutula haki, nu kulagila kina ukumualilagia haiki muntu wensi kunsooko ya usuili kuaki Yesu. ²⁷ Yiliipii gua kukikulia? yatemanulagua. ku misingi nyii.? Misingi ya ntendo? ataa, lakini ku misingi ya usuili. ²⁸ Iyo kumalilia kina muntu ukualagigua haki ku usuili bila ntendo nya shalia. ²⁹ Hau Mukungile ingi Mukungile wa Ayahudi du? Mbii mwene sika Mukungile wa antu a nsii gaa? eee, a nsii gaa. ³⁰ Anga kulukulu Mukungile umui, ukakumualilia haki natiite ikumbi ku usuili, na nasika atualue ikumbi ku nzila ya usuili. ³¹ Mbii ishee kukumiakila shalia ku usuili? la hasha, yisia ni maso, ishee kukumihakikisha ishalia.