¹ Inoo ishee nakutite ingulu yukujipiile kukusola uneketu wa naneketu, na sika yukujipiile kukijipila undishe. ² Kila muntu witu wamujipilie ujilani wakue kuani ingin kintu kiiza, kua kumuzenga. ³ Kwani sunga Kilisito sikaliwijipilie mwene. Badala yakue, alikina yandikue, "ituki ya ioo naliakukuktuka nandigagia ninene." ⁴ Kua kyensi nalikitongile kuyandikua, nalikiandikue kua kukulingia, kua kusudi kina kukilila wiumatilia nu kukilila kupegua umoo ni mandiko alikujitula nu ugimia. ⁵ Inoo Mukungile wa wiumatilia nu kupela umoo wapele kutula ni nia sawa ku kila umui kuligana nu Yesu Kilisito. ⁶ Wasume kutenda itii kunia mui musuume kukumukulia kua kukilakala kimui Mukungile nu Tata waki Tata witu Yesu Kilisito. ⁷ Kululo musingilii kila umui, kina iyo Kilisito nawasingile, ku utukufu waki Mukungile. ⁸ Kwani nitambula kina u Kilisito watendegua mutumii wa tohara ku niaba ya kulkulu waki Mukungile.Alutendile itii kin wasume kuyakikisha ahadi nalimpunigue kua tata, ⁹ nu kunsii kukumukulia u Mukungile ku ukende wakue, Kina nayandikue,kululo nkipunia sifa kumuako mu nsii nu kuyimba sifa ku lina lyako. ¹⁰ Kanki itambula,"Lumbii inye antu aa nsii, palumui ni antu akue. ¹¹ Ni kanki, " mukulie Shekulu, inye nsii tulu, leka antu aa nsii tulu amukulie mwene," ¹² Kanki u Isaya utambula, " ikalikoli itina lyaki Yese, nu mui nukiyukigua kutemaa kyanya ya nsii. Nsii ikitula ni shuilo ku mwene," ¹³ Inoo Mukungile wi shuilo wamujulie nu ulumbi tulu ni amani kua kushuila, kina musume kukilikila ku shuilo, ku ngulu zaki Muau muelu. ¹⁴ Inee unene gaa numusisikiligue nininye, antua anee.Numusisikiligue kina gaa nininye akola muijulagigua nu ukende, muijulagigua ninsii tulu. Nukumusisikilia kina, inyemusumile gaa kuhimiza kila umui nu muua. ¹⁵ Lakini niyandika ku ugimia kukilalikila kumiani kyanya ya mantu kitunga kukumujukia kanki, nsooko ya kipawa nanupegue nu Mukungile ¹⁶ Kipawa ikii ali nsuume kutla muitumi waki Kilisito nalimutue ku nsii, kukipunia kina kuhani wa mpola zaki Mukungile. Alinsuume kutenda itii kukipunia kumuane ku nsii itule igombigue, yatuanulagua nu Mukungile ku nzila ya muau muelu. ¹⁷ Iyo ulumbi wane ukoli kuaki Kilisito Yesu nu ku mantu maki Mukungile. ¹⁸ Kwani sikanishuma kugema kulikitia lyensi anga kina Kilisito wakaminkilagia kukilila kumuane utii wansii. Igaa mantu matimilagigua ku lukani ni ntendo, ¹⁹ ku ngulu za miena ni ishembo, nu ku ngulu za muau muelu. Iyii ali kina kupuna ku Yelusalemu, nu kupilimil kulii kina Iliriko, nsuume kukumisola kunzii ku ukaminkilu impola zaki Kilisito. ²⁰ Ku nzila iyii, nia yane yatula kukumitanantia impola, lakini sika luandi u Kilisito ukumazukile ku lina, kina ndekishuma kuzenga kyanyanya musingi wa muntu muua. ²¹ Kina nailyandikue: " Nu ku mwene agia mpola zakue aliwizile ikakumuona, ni ndio ninalisikaamuigilie ikakumumana. ²² Klululo alinili gaa numugililigue nkua ningi kuiza kumiani. ²³ Lakini inoo, numugila kanki luandi lyensi ku mikoa iyii, na natula nitamani ku miaka mingi kuiza kumiani. ²⁴ Iyo nkua tulu nikiyenda ku Hispania, nishuila kukumuona kinanikila, nu kushuma kutualua nzia yane ni ninye, pembele natula nalumbaa ushilika ni ninye ku matungo. ²⁵ Lakini inoo nonguile ku Yelusalemu kukuahudumila aumini. ²⁶ Ndogolelio aliyajipiile iantu aku Makedonia nu ku Akaya kutenda shangilo maalumu kua atuka muamui aumini uko ku Yelusalemu. ²⁷ Eee, alikuulowa wao,na taitai, atula adeni aoo. Ndogolelio anga nsii ashiliki ku mantu mao ma kinkolo, idaigua ni ndioo gaa kukuahudumila ku maitaji ma intu. ²⁸ Kululo, tungo nakaminkilagia itii nukutula ukondia wa nkalii iyii kumiao, inee nikiyenda munzila palumui nininye kuaso ku Hispania. ²⁹ Ningile kina, tungo kinanikiiza kumiani, nikiiza kuukaminkilu wa matiliga maki Kilisito. ³⁰ Inoo nukumupepia, antua, kuaki Shekulu witu Yesu Kilisito. nu ku ulowa wa nkolo, kina mushiliki palumui ninene ku malompii manii kuaki Mukungile kunsooko yane. ³¹ Lompii kina Nsume kugunua kupuna kumiao nagila kautii ku Yudea,ninkina huduma yane uko ku yelusalemu nsume kushinigilua ni aumini. ³² Lompii kina nsumi kuiza kumiani ku ulumbi kukilila ulowa waki Ukungile, ni kina nsume kutula palumui nininye, kuligia kushupia. ³³ Nu Mukungile wa amani watule nininye tulu. Amina.