¹ Kila nafisi nitule nu utii ku mamlaka ma kyanya, kunsooko kutilii mamlaka ila nipunile kugulu ku Mukungile. Ni mamlaka nazikoli mbikue nu Mukungile. ² Kululo nugilia imamlaka nyaso ukugilagia amli yaki Mukungile, ni ndioo nakumiilagia ikishingile ulamumlua kyanya yao enee. ³ Kunsooko atemii sika tisilio kua nakutenda namaza, bali kua nakutenda namadobu. Mbii utaka kulekiyopoka mamlaka? Tenda namaza, na ukikuligua nindayo. ⁴ Kunsooko ingi muitumii waki Mukungile kumuako kunsooko ya namaza. Bali kina ukitenda namadobu, opoka, kunsooko sikukenka impanga bila nsooko. Kunsooko ingi muitumii waki Mukungile, mulipa kisasi ku gazabu kyanya ya uyo nukutenda udobu. ⁵ Kululo yukujipiile uutii. sika du kunsooko ya gazabu, bali gaa kunsooko ya dhamiri. ⁶ kua ajili iyii gaa ulipa ikodi. kunsooko natite mamlaka ingi itumii aki Mukungile, nalongolekile kutenda kintu ikii, ⁷ Mulipii kila umui nakukidai inie: kodi nujipile kodi: ushulu nujipiile ushulu: woa nujipile woa: heshima nujipile heshima. ⁸ Muekidaigua nu muntu kintu kyensi, ila kukilogua ninye kua ninye. kunsooko mwene numulogilue jilani wakue watimilagia shalia. ⁹ Kunsooko , sikazini, sikaukiyulaga, sikukiia, sikukiita lutii," na kina ikoli amli yingii gaa, yakuilagiguaku ntambo iyii: "Ukakumulogua u jilani wako kina uwee mukola" ¹⁰ Ulowa sikaukumualalia ka jilani wamuntu. Kululo, ulowa ingi ukaminkilu wa shalia. ¹¹ Kunsooko ya ilii, mulingile matungo, kina yakondaa ingi matungo ma kupuna mu ndolo. Kunsooko ugunua witu wapiipika kukilikila matungo igo nalikusuililie ikuandia. ¹² Utiku ulongolekile, nu munsii wegelaa. Na kuike pampelo ntendo za kiiti, na kujale nsonga za welu. ¹³ Na kuenendee kisa kisa, kina mu welu, sika ku mbina za udobu nu ugala. Na kulekienendaa mu zinaa hau munsula nasika zisumile kugiligua, na sika ku pitina hau wilu. ¹⁴ Bali kumujale u Shekulu Yesu kilisito, na kulekiyika lyoma kuajili ya mwili, ku nsula zakue.