^{1 2} Kululo nukumupepia, antu, ku kinishungu kyaki mukungile, ipunie imiili yani itulu dhabihu nampanga, nzelu, nigombekile kuaki Mukungile. Iyii yoi ibada yani nitite ndogolelio. Wala muleke kumitiata namna ya unkumbigulu uu, bali mupilulue kua kutendua upia inia zani. Tende itii muligie kumana ulowa waki Mukungile namaza, makumulogelia namakamilikile. ³ Ku ndogolelio nitambula, kunsooko ya ukende nanumupegue, kila muntu nukolii muamui mumiani sikayumujipiile kushiga kukilikila kukyanya yakue mwene kuleka kinayumujipiile kushiga. Bali, yumujipiile kushiga ku hekima, kina u Mukungile wapiile kila umui ngele kitunga kya usuili. ⁴ Kunsooko kutite iyungo ingii ku mwili umui, lakini sika iyungo tulu itite mulimo umui. ⁵ Iyo iyo, ishee nakuingi kumwili umui kuaki Kilisito, ni iyungo kila umui ku muua. ⁶ Kutiite karama ningii ku kadili ya ukende namuapegue. anga karama ya muntu ingii unabii, na itendeke ku kadili ya usuili wakue. ⁷ Anga karama ya muntu ingi huduma, nuatumike. anga umuua utite karama ya kumania,nuamanie. ⁸ Anga karama ya muntu ingi faraja nuafaliji. angakarama ya muntu kupunia, nuatende yaso kuukalimu. anga karama ya muntu ingi kutongela, na litendeke kukilao, anga karama ya muntu ingi ku kuagila kinishungu, na litendeke ku ulumbi. ⁹ Ulowa ulekitula nu unafiki. ipilui udobu: muambiile namazaa. ¹⁰ Ku ulowa wa nduguu, ilogue inye kua ninye. ku heshima, muiheshimu, ninyekua ninye. ¹¹ Ku wikamatikia, mulekitula muaneketu. Ku nkolo, tulii ni nsula. kuaki Shekulu, mutumikilii. ¹² Lumbii ku ugimia namutiite ku ntondo nazijile. mutule nuulindilii ku matatizo manii. Muimee ku malompii. ¹³ Muiunge ku maitaji ma aumini. Dumii nzila ningi za kulagila ukalimu. ¹⁴ Atakilii matiliga tulu nakumusunta inye: muakembete na wala muleke kuazuma. ¹⁵ Lumbii palumui ninailumba, lilii palumui nina ililaa. ¹⁶ Mutule ni nia imui inye kua inyee. Mulekishiiga kua kukivuna, lakini agombii antu aa hali ya pansii. Muleki tula ni hekima kyanya ya masiigo mani ninyee. ¹⁷ Muleke kumulipa muntu wensi dobu ku dobu. Tendii mantu namaza mumiso ma antu tulu. ¹⁸ Kina ishumikile, kina naiyikue kumiani, mutule ni amani ni antu tulu. ¹⁹ Alogua, muleke kilipilia ikisasi ninye, lakini mitelelii igazabu yaki Mukungile. Ku ndogolelio yandikue," kiasai ingi kyane: inee nikilipa," utambula u Shekulu," ²⁰ Lakini anga mulugu wako utite nzala, mulishe. anga utie nota, mukopie. Ku ndogolelio ukitenda iyo, ukakumupalia mukala wa moto kyanya itue lyakue." ²¹ Ulekilemua nu ubii, bali uudule ubii ku ukende.