¹ Iyo malaika wa katano nukua tarumbeta yakue. namona nsonda kupuna kugulu nali iguile munkumbigulu. Nsonda nipegua mpungulo nyi kombo naliukilile ku kombo nigila mpelo, ² Nuigula ikombo nigila ka mpelo, ni lyuki nalinankila kyanya ku safu kupuna mu mulungu kulu. jua ni anga naikailika naitula kiti kunsooko ya lyuki nalilipuna mukombo. ³ Mukati yi lyuki mpandii nazipuna kuiza kukyanya ya unkumbigulu,nindio aliapegue ngulu kina iyo nya ngii kyanya ya unkumbigulu. ⁴ Aliailua kulekiyonona masanzi mu nsii hua mumea wensi naudemu hau kota, angasikaiyo du antu naliagila ka muntozo waki Mukungile ku paji za usiu wao. ⁵ Sikaliapegue lusa lua kuaulaga antu aso, bali kukiagia du ku mieli itano. Uwai wao aliwili kina uoo wa kulumua ni ngii nyukumulua u muntu. ⁶ Ku ntondo izo antu ikiduma nkia, lakini sikaikakumiligia. ikatamani kukia ,lakini nkia yikakuamanka. ⁷ Nzige alizimpianile ni farasi nalinzipiligue ku mbita. Ku matue mao alikikoli kintu kina taji ya zahabu nu usiu wao aliwili kina muanamuntu. ⁸ Aliatite ntumbi kina za asungu ni mino mao alimili kina nsimba. ⁹ Aliatite ni ikua kina ikua ya shuka nu luli lua mbaa zao alizili kina nduli za mituka mingi nya mbita ni farasi nazukumanka kuyenda ku mbita. ¹⁰ Aliatite mikila niluma zii ngii: ku mikila yao aliatite ngulu ya konona antu ku mieli itano. ¹¹ Aliiensi nunduyo kina mutemi kyanya yao malaika wi kombo nigila ka mpelo. Lina lyakue ku Kieblania ingi Abadoni, nu ku Kiyunani utite lina Apolioni. ¹² Ole wa kuandia wakila. Laa! pembele ya ilii makoli maafa mabili mijile. ¹³ Malaika wa mutandatu nukua tarumbeta yakue, nanigulia luli lupuna mu lupembe lua mazabahu nikolii ntongela yaki Mukungile. ¹⁴ Luli nalumuila malaika wa mutandatu naluite tarumbeta, " Alekele a malaika anii natungue mu mongo ukulu Efrata." ¹⁵ Malaika ioo anii naliazipiligue ku tungo lyaso maalumu, lutondo luaso, mweli uoo, nu mwaka uoo, alialekelue aulage selusi ya anaantu. ¹⁶ Ingele ya agalimanga kyanya ya farasi alii 200,000,000. alinigilie ingele yao. ¹⁷ Itii yoi nalimonie farasi ku maono mane ni ndio nalianankile kyanya yao: Ikua yao alii ikasuku kina moto, buluu niilile ni njano nasikiilile. Matue ma farasi alimimpianile nimatue ma nsimba, nu mumilomo yao naupuna moto, lyuki ni salufa. ¹⁸ Selusi ya anaantu aliaulague ni makuo igaa matatu: moto, lyuki, ni salufa nalipunile mu milomo yao. ¹⁹ Kunsooko ngulu ya farasi aliyili mu milomo yao nu ku mikila yao_ kunsooko mikila yao aliyili kina nzoka, na aliatite matue naliitumila kukiikila inkonko anaantu. ²⁰ Antu naliasagile, ioo nalisika aulague ni makuo igaa, sikanaungamila ntendo zao naliatendile, walaa sikanaleka kuulia mapepo ni miungu ya zahabu, mpia, shaba,mague ni makota_ intu nasikaishumile kuyona, kuigia hau kugenda. ²¹ Wala sikaliaungamile uulagi wao, ulogi wao, ukosi wao hau nzila zao za wii.