¹ Pembele ya iga namona malaika anii imikile ku kona zinii za unkumbigulu, agililie nzega zinii za nsii ku ngulu kina ilekitula ninzega nikunka mu nsii, kyanya hau zidi yi kota lyensi. ² Namona malaika mua upolokile kupuna kukilima, nalutite muntozo waki Mukungile namupanga. Nulila ku luli lukulu kua malaika anii naliapegue lusa ya kuona nsii ni bahali. " ³ Mulekumionona insii, bahali,hau makota mpaka kinakukitula kuaikila muntozo pi paji lya matue ma itumi aki Mukungile witu. ⁴ Nanigia zidi ya ioo naikilue muntozo: 144,000, na naikilua kupuna kila kabila nya antu a Izlaeli: ⁵ 12,000 kupuna ku kabila lya Yuda naikilua muntozo, 12,000 kupuna ku kabila lyaki Rubeni, 12,000 kupuna ku kabila lyaki Gadi. ⁶ 12,000 kupuna ku kabila lyaki Asheri, 12,000 kupuna ku kabila lyaki Naftali, 12,000 kupuna ku kabila lyaki Manase. ⁷ 12,000 kupuna kabila lyaki Simioni, 12,000 kupuna kabila lyaki Lawi, 12,000 kupuna kabila lya Isakari, ⁸ 12,000 kupuna kabila lyaki Zebuloni, 12,000 kupuna kabila lyaki Yusufu, na 12,00 kupuna kabila yaki Benyamini naikilua muntozo. ⁹ Pembele ya mantu igaa alinaile, na aliukoli mulundo ukulu na kutili muntu nalushuma kukuualia _ kupuna kila nsii,kabila ,jamaa,ni ntambo_ imikile nongela yi tyengu lya enzi ni ntongela ya muanankolo. Aliajalile nkanzo nzelu na atite matambi ma mitende mumikono yao, ¹⁰ na aliiyita ku luli lukulu lua kyanya: "Ugunua ingi kuaki Mukungile nukalile ku tyengu lya enzi, nu ku Muanankolo!" ¹¹ Malaika tulu naliimikile kupilima tyengu lya enzi nu kukuapilima ioo anampala palumui ni natite upanga anii, natuna munsilili munsii yi tyengu lya enzi na mukulia Mukungile, ¹² naitambula," Amina! sifa, utukufu, hekima, shongelio, heshima, usumi ni ngulu itule kuaki Mukungile witu kali na kali! Amina!" ¹³ Iyo umui wa anampala nankolia, "iaa itii anii najalile nknzo nzelu, n apunile pii? ¹⁴ Nanumuila, "Shekulu mukulu, ulingile uwee," na numbuila, iaa ingi ioo napunile ku ziki nkulu. Azikanzile nkanzo zao nu kukuzitenda nzelu ku migali ya muanankolo. ¹⁵ Kunsooko iyii, akoli ntongela yi tyengu lya enzi lyaki Mukungile, na akumukulia mwene utiku ni munsii ku hekalu lyakue. Mwene nukalile kyanya yi tyengu lya enzi ukishapatilia kianda lyakue kyanya yao. ¹⁶ Sikaikiyona ka nzaa kanki, wala nota kanki. mpasi sikaikuasonsa. wala upiu wa kutiima. ¹⁷ Kunsooko muanankolo wao, na ukakuatongela ku kisizii kya mazii ma upanga, nu Mukungile uduma kila lusholi ku miso mao."