¹ Angandae tungo muanankolo muanankolo kinanuigula imui yamintizo iyo mupungati, nanigia umui wa ioo natite upanga anii nutambula ku luli nalukimpina ni nkua, "Nzuu!" ² Angandae na alikoli farasi nzelu! Nalumunankile alutite bakuli, na nupegua taji. Alupunile kina muduli nukudula ili wadule. ³ Matungo muanankolo kinanuigula muntozo wa kabili, nanigia nutite upanga wa kabili nutambula, "nzuu!" ⁴ Iyo farasi nzia nupunila _ mukasuku kina moto. Nalumunankile nupegua lusa ya kulegia amani munkumbigulu, kina antu isinzee. Uyu numunankile nupegua panga nkulu. ⁵ Matungo muanankolo kinanuigula muntozo uoo wakatatu nanigia nutie upanga nua katatu nutambula, "Nzuu!" Namona farasi mwilu, na nalumunankile utite mizani mu mukono wakue. ⁶ Nanigia luli naligiile kutula ya umui wa ioo natite upanga nyitambula, "kibaba kya ngano ku dinali imui na ibaba itatu ya shayiri ku dinali mui. Lakini uleke kumaonona makuta ni divai." ⁷ Matungo muanankolo kinanuigula u muntozo wa kanii, alinigilie luli lua nutite upunga wa kanii itambula, "Nzuu!" ⁸ Iyo namona farasi wa kijiu. Nalumunankile alimuitue lina lyakue nkia, nu kuzimu aliyumutiatile. Napegua mamlaka kyanya ya lobo ya nsii, kuyulaga ni mpanga, ku nzala nu ku uluile, nu ku nimu za mushaka mu nsii. ⁹ Matungo muanankolo kinanuigula muntozo wa katano, namona pansi ya mazabahu nkolo za ioo naliaulagagua kunsooko ya lukani luaki Mukungile nu kupunila nu ushuda naliauambile ku ukamu. ¹⁰ Nalila ku luli lukulu, " mpaka nali, Mutemi wa tulu, muelu na muna kulukulu, ukakialamula nakikala kyanya ya nsii, nu kulipilia kisasi migali yitu?" ¹¹ Iyo kila umui nupegua nkanzo nzelu nailua kina yajipiile kulindila inino sunga kinalikitimila ilyalio kamili lya itumi iaa ni antua aoo a kisungu ni akigosha kinaikitimila na ikakuaulaga, kina iyo naioo aliaulague. ¹² Matungo muanankolo kinanuigula muntozo wa mutandatu, alindaile na alilikilo tetemeko kulu. jua nalitula lilu kin agunila lya nsinga, nu mweli wensi nautula kina muigali. ¹³ Nsonda za kugulu nazigua ku nsii, kina ikota naukulagalagia nkali zakue matungo inzega kinishungusika nu kimpupu. ¹⁴ Wekusi naulega kina gombo niilingilue. kila mulima ni kisiwa nakisamigua luandi luaso. ¹⁵ Kangi atemi a nsii ni antu maalufu na majemedali, agoli, natite ngulu, na kil umui namusese nui hulu, naipisa mu mapango nu munkonko nya mulima. ¹⁶ Naaiila mulima ni nkonko, "kuguilii! Kupisii zidi ya usiu wakue nukalile ku tyengu lya enzi nu kupuna ikuo lya muanankolo. ¹⁷ Kunsooko lutondo lukulu lua gazabu yao yapikaa, na itii wani nakulusumile kuyimika?"