¹ Pembele mantu igaa nandaa, namona kina mulango aliugulue kugulu. ululi ulo lua kuandia, nilikitia ninene kina tarumbeta, nyitambula, "nzuu ipaa, nikakukulagila namikipunila pembele ya mantu igaa." ² Nkua imui alinili ku nkolo namona alilikoli tyengu lya enzi yikue kugulu, nu muntu ukalile. ³ Umui nalukalile alugiile kina gue lya yaspi ni akiki. alilikoli kyikamo lya mbula lipilimilie ityengu lya enzi. kyikamo lya mbula naligela zii zumaridi. ⁴ Kupilimikilia ityengu lya enzi alimakoli maengu ma enzi miia makumi mabili na manii, ninaliikalile mu matengu ma enzi alii anampala makumi mabili na manii, aimbue ijalo yelupe ni taji za zahabu mumatue mao. ⁵ Kupuna ku tyengu lya enzi nipuna nsansi za nkuaa, mugulumo ni nkua. Ntala mupungati alizakile ntongela yi tyengu lya enzi, na alinkolo mupungati zaki Mukungile. ⁶ Kanki ntongela yi tyengu lya enzi alikoli bahari, yilikualie kina kioo. Tulu kupilima tyengu lya enzi ninatite upanga anii, najuile miso kuntongela nu kunuma. ⁷ Kimbua wa kuandia nutite upanga aliwili zii nsimba, kimbua wa kabili nutite upanga alwili kina mwanag"ombe, kiumbua wa katatu nutite upanga alitite usiukina wa muanamuntu, nu nduyo nutite upanga nua kanii aliwili kina nanda nyukuputa. ⁸ Iyumbua natite upanga anii kila umui alitite imbaa mutandatu, ijuile miso kyanya ni pansi yakue. Utiku ni munsi sikakuleka kutambula, " Muelu,muelu,muelu ingi Shekulu Mukungile, mutemi kyanya ya tulu, nalukoli, na nukoli na nukiiza. ⁹ Kila tungo iyumbua natie upunga aliipunia utukufu, heshima, nu kushongelia ntongela yaki nulukalile ku tyengu lyaso lya enzi, mwene nukikala kali na kali, ¹⁰ anampala makumi mabili na anii natungama enee ntongela yaki nalukalile ityengu lya enzi, Natuna pansi kumuakue nukikala kali na kali nu kutaga pansi itaji zao ntongela yi tyengu lya enzi naitambula, ¹¹ Ujiipile uwee, Shekulu witu na Mukungile witu, kushingila utukufu ni heshima ni ngulu. Kunsooko aliwiyumbile intu tulu, nu kuulowa wako, aliikoli na aliiyumbue."