¹ Kua malaika nua kanisa lya Sardi andika: Nkani zaki uyo nuambilile inkolo izo mupungati zaki Mukungile ni nsonda mupungati. "Ningile nukitendile. utite sifa ya kutula mupanga, lakini U_mukiu. ² Laila nu kukamia namasagilile, lakini makoli piipi kukia, kunsooko sikalinimaonie matendo mako makamilika mu miso paki Mukungile wane: ³ Kululo, igoo nalusingile nu kuigia. Matii nu kuyungamana. Lazima angulelaila, nikiiza zii mwii, na sikulinga matungo kii nanikiiza kyanya yako. ⁴ Lakini makoli makei ya antu ku Sardi na sikaliashapuile ntila zao. Ikigenda palumui ninene, ajalile ntila nzelu, kunsooko yajipiile. ⁵ Mwene nukudula ukiiikua ijalo yelu, na ninaido sikanikifuta lina lyakue kupuna ku kitabu kya upanga, nu nikakilitea lina lyakue ntongela yaki Tata wane, ni ntongela ya malaika. ⁶ Anga utite kutui, tegela nkolo nukumailaa makanisa." ⁷ Kwa malaika a kanisa lya Philadefia andika: Nkani za namuelu na kulukulu_ nutite mpungulo zaki Daudi, ukigulaa na kutilii nukigagila, ukigagila nakutili nukusum kukigulaa. ⁸ Ningile nukitendile. Laa, nakuikilagia ntongela mulango naugulue na kutilii nukusumaa kukuugalila. Ningile utite ngulu nino, lakini witaa lukani luane na sikulikanile lina lyane. ⁹ Laa! tulu na ii sinagogi lyaki shetani, ioo nakutambula ene ingi Ayahudi na kumbe sikaiyo, badala yakue ikongaa. Nikakiatenda aze nu kutuna ntongela ya migulu yako, na ikilinga ya kina alinukulogilue. ¹⁰ Kunsooka watunza amli yane ku wiumatilia wa ukamu, nikakukulinda gaa ku tungo lyako lya kugemua na ipolokile ku unkumbigulu tulu, kukuagema ioo tulu naikalile munsii. ¹¹ Naja kuukau. Ambiila zigi ikio nutiite walekitula ukoli muntu wa kumisola itaji yako. ¹² Nikakumutenda mwene nukudula kutula kisimbili mu hekalu lyaki Mukungile wane, na sikukipuna kunzii ninaido. Nikakiliandika kumuakue lina lyaki Mukungile wane, lina lya muji waki Mukungile wane ( Yelusalemu mpia, naukutimaa pansi kupuna kugulu kuaki Mkungile wane), ni lina lyane pia. ¹³ Mwene nutiite kutui , nuategele u nkolo utambula ku makanisa." ¹⁴ Kua malaika wa kanisa lya laodikia andika: Nkani zakue nua amina, wakutegemelua nu shaidi musuili, mutemi kyanya ya uumbii waki Mukungile. ¹⁵ Ningile nukitendile, na kina uwee sika mpepo wala moto! nitamani kina angaliutule wa mpepo hau wa moto! ¹⁶ Iyo, kunsooko uwee ingi umuumbuku, sika moto wala mpepo, nikakukulua upune mukilaka kyane. ¹⁷ Kunsooko utambula, " inee ingi mugoli, natula ni nsao ningi, na sinsiilye kyensi." Lakini sikawizi kina uwee ingi neketu zigi, nahuzunisigua, utuka, mupoku na kipui. ¹⁸ Tegela usiigia wane: Gula kumuane zahabu nyagagigua ku moto uligie kutula umgoli, ni ntila nzelu za kumiliminta wiimbe uwee na ulekilagila nsoni za kipui kyako, ni makuta ma kipakaa ku miso mako uligie kuyona. ¹⁹ Kila nanumulogilue, nukumulinga nu kukuamania namna nayumujipiile kukikala: kululo, tula wakulukulu nu kuyungama. ²⁰ Laa niyimika ku mulango nukubisha. Wensi nukuigagia lulii luane nu kukigula mulango, nikiza nu kuingila munumba yakue, nu kulia ndia nunduyo nu mwene palumui ninene. ²¹ Mwene nukudula, nikakumupela haki ya kikala pansi palumui ninene kyanya yi tyengu lyane lya enzi, kina iyo inee nalindulile nu kukikala pansi palumui nu Tata wane kyanya yi tyengu lya enzi, ²² Mwene nutite nu kutui, nawiigie na unkolo ukumailaa makanisa."