¹ Kua malaika a kanisalya Efeso andika: izi ingi nkani zaki uyo nuambilile nsonda mupungati ku munkono wakue wa kundilo. Mwene nukugendaa ya inara vya zahabu ya ntala mupungati utambula itii, " ² Ningili namutenda ni ukamatiku wako wa mlimo nu wiumatilia wako naukamu, na kina sikusumile kuyusiana nindio nadobu, na wagemaa tulu naikiita kina atumua na kumbe sikaiyo, na igelaa kina alongo. ³ Ningile utite ulindili ni wiumatilia, na ukilile mingii kunsooko ya lina lyako, na kili ukatale. ⁴ Lakini ilii lyoli nantiite zidi yako. wauleka uwilogua wako wa kuandia. ⁵ Kululo iujuke kinauguile, uungame nu kutenda ntendo nalutendile kupuna umuandio. angulekiungama, nikiiza kumuako nu kulegia kinara kyako kupuna luandi luakue. ⁶ Lakini uweutite ilii, uyipilua igoo ma Anikolai namatendile, na sunga ninene nimaipilue. ⁷ Kina utite kutui, tegela igoo u nkolo nukumaila makanisa. Na ku mwene nukudula nikakumupela kigombia kya kulia kupuna mu kota lya upanga nalyili mu paradiso yaki Mukungile." ⁸ Kwa malaika aa kanisa lya Smirna andikaa: izii ingi nkani zaki uyo nua muandio ni mpelo nalukiile nu kutula mupanga kanki: ⁹ ""Ningile uluago luako nu utuka wako(lakini uwe ingi umugoli), nu ulongo wa ioo naikiita ingi ayahudi(lakini sikaiyo_ ioo ingi sinagogi lyaki Shetani). ¹⁰ Ulekiopoka uluago nalukakukuligia. Laa! Ibilisi usiilie kukumutaga akei yani mugeleza muligie kugemua, nu mukuyaga ku ntondo kumi. tulii asuili mpaka inkia, na nikakumupelela taji nya upanga. ¹¹ Kina utite kutui, tegela nkolo nukumaila makanisa. Mwene nukudula sikuligia ka madhala ma nkia ya kabili." ¹² Kwa malaika aa kanisa lya Pergamo andika: igaa maya nukulikitagia mwene nutiite impanga nyaso nanzugi, natite uugi ubili. ¹³ Ningile luandi nukikala_ luandi kinalikoli ityengu lya enzi lyaki shetani. Sunga iyo uwee waliamba zigi lina lyane, na sikali ukanile usuili wako nawili kumuane, sunga ntondo izo za Antipasi shuda wane, musuili wane, nali muulague ktai yani, paso papo shetani ukikala. ¹⁴ Lakini ntite mantu makei zidi yako: utite kuaso antu nakuambaa mamanio ma Balaamu, mwene nalumumanilie u Balaki kuyika igilio ntongela ya anaa aa Izlaeli, alie ndia nalimpunigue sadaka ku miungu nu kuzini. ¹⁵ Ku hali iyo nyaso, sunga uwee utite akei aoo naiamba mamanio Anikolai. ¹⁶ Iyo ungamii! Na anguleki tenda yaso, nije kuukau, na nikitenda mbita zidi yao ku mpanga nyukupuna mu kilakala kyane. ¹⁷ Kina utite kutui, tegela nkolo nukualaa makanisa. Mwene nukudula, nikakumupela nkei imana nampisue, gaa nikakumupela igue lielu naliandikue lina pia kyanya yi gue, lina nakutile nulimanile angasikaitula mwene nukulipokela. ¹⁸ Kwa malaika aa kanisa lya Thiatira andika: izii zazi nkani za muana waki Mukungile, mwene nutite miso makue kina mwali wa moto, ni ntilatiligua kina shaba nankilisigue zigi: ¹⁹ "" Ningile nuku kitenda_ ulowa wako nu usuili ni huduma nu wiumatilia wako naukamu, na kina ikio nukitendlie itii piipi ingi kukilikila ya ikio nalukitendile umuandio. ²⁰ Lakini ntite ilii zidi yako: ukiumatilia ku musungu Yezebeli nukiita mwene nabii musungu. ku mamanio makue, ukialimilia itumi anee kuzini nu kulia ndia nampunigue sadaka ku sanamu. ²¹ Alinumupiile matungo makuungama, lakini sikawili tayali kuyungamila udobu wakue. ²² Laa! Nikakumutaga mu kitanda kya uluile, ni ndio nakutenda uashelati nunduyo mu wagii utakii, angayio aungame kua nukitendile. ²³ Nikakuakua iana akue akie ni makanisa tulu ikimana kina inee nene nanukulaa masiigo ni tnsula. Nikakumupela kila umui wani kadiri ya ntendo zakue. ²⁴ Lakini kua akei itu namusagilile ku Thiatra, ku ioo tulu nasika muyamba imanio ilii, nasikamuizi ikio na ake akuita mafumbo maki shetani, nitambula kumiani, sikaniyika kyanya yani muligo wensi." ²⁵ Ku lintu lyensi, lazima mutule muakamu mpaka kinanikiiza. ²⁶ Wensi nukudula nu kutenda ikio nalintendile hadi impelo, kumuakue mwene nikakumupela mamlaka kyanya ya nsii. ²⁷ Ukakiatema ku nkome nyi shuka, kina mabakuli maulongo, ukakiauna ipande ipande. ²⁸ Kina nalinsingile kupuna kuaki Tata wane, nikakumupela gaa nsonda ya dau. ²⁹ Anga utite kuti, tegela ikio u nkolo nukumaila makanisa.