¹ Uu ingi ukunukula waki Yesu Kilisito uwaso Mukungile alumupelile kukialagila itumi akue mantu ma lazima mapunile piipi. Alutendile makumazuke kua kumutuma malaika wakue kuaki muitumi wakue u Yohana. ² Yohana alupunile ushuda wakila kintu nalukionie kuyusiana nu lukani luaki Mukungile ku ushuda naliupunigue kuhusu u Yesu Kilisito. ³ Mukembetue umwene nukusoma ku luli luakitunta ni ndiio tulu naiigia inkani za unabii uu nu kutiata nakyandikue muaso, kunsooko matungo mapipiika. ⁴ Yohana, ku makanisa mupungati namakoli ku Asia: ukende utule kumuani ni amani kupuna kumuakue nukoli, nalukoli, na nukiiza, ⁵ na kupuna ku nkolo mupungati naili ntongela yii tyengu lya enzi, nu kupuna kuaki Yesu Kilisito na shuda musuili, mulelua wa kuandia wa nakiile, na mutemi wa atemi wa unkumbigulu uu. Kumuakue mwene nukulogilue na ukuikile huru kupuna ku milandu yitu ku migali yakue, ⁶ ukutendile kuatemi, makuhani aki Mukungile nu Tata wakue_kumuakue itula utukufu ni ngulu kali na kali ntondo tulu.Amina. ⁷ Laa, upolokile ni malunde, kila liso likakumuona, palumui ni tulu naliamusomile. ni makabila tulu ma unkumbigulu ikitula nikililo kumuakue. ee,Amina. ⁸ Inee ni Alfa nu omega,"utambula Shekulu Mukungile, Mwene nukoli, ni nlukolii, ni nujile, nutite ngulu." ⁹ Inee, Yohana_muntua wani na umui nushiliki palumui nininye ku wagii nu wuimatilia ukamu nawili kuaki kilisito: alinili mukisiwa nakyukuitagua Patmo kunsooko ya lukani luaki Mukungile nu ushuda kuhusu Yesu. ¹⁰ Alinili mu nkolo lutondo luaki Shekulu.nanigia kunuma yane lullli kyanya kina ya talumbeta, ¹¹ nyitambula,"andikaa mu kitabu nukumaona ,na umatume ku makanisa mupungati, kuyuka ku Efeso, kuyuka ku Smirna, kuyuka ku Pergamo, kuyuka ku Thiatira, kuyuka ku Sardi, kuyuka ku Philadelphia, nu kuyuka ku Leodikia." ¹² Nanikea kuyona itii luli lua kauani nalulikitia ninene, na kina nanikea namona kinara kya zahabu lya ntala mupungati. ¹³ Pakati ya kinara kya ntala alukoli umui kina muana waki Adamu, ujalile nkazo ndipu nipikile pansii ya migulu yakue, nu mukanda wa zahabu kupilima kikua kyakue. ¹⁴ Tue lyakue ni ntumbi zakue ali nzelu kina sufu nzelu kina seluji, ni miso makue alimili zii lulimi lua moto. ¹⁵ Ntilatigua zakue alizili kina shaba nankilisigue zigi, kina shaba nyakondaa kukiligua mu moto, nu luli luakue aliluili zii luli lua mazi mingi namikila kua ngulu. ¹⁶ Aluambilile nsonda mupungati ku mukono wake wa kigosha, nu kupuna kukilakala kyakue alikoli mpanga nzugi itite ugii kaubili. Usiu wakue aliumiliminta kina welu ukali wi mpasu. ¹⁷ Kina nanumuona, nagua mumigulu yakue kina muntu nukiile. Nuika mukono wakue wa kundilo kyanya yane nu kutambula, " ulekiyopoka! Inee ingi nakuandia nu nua mpelo, ¹⁸ nina nikikala. alinkiile, lakini laa, nikalile kali na kali! Na ntiite mpungulo za ukii nu kuzimu. ¹⁹ Kululo, mandikue numaonie, namakoli inoo, ni ndiigo namikipunila pembele ya igaa. ²⁰ Ku ndogolelio nyipisile kuhusu nsonda mupungatii nuaziona ku mukono wane wa kigosha, na ikio kinara kya zahabu kya ntala mupungati: nsonda mupungati ingi malaika aa ayoo makanisa mupungati, ni kinara kya ntala mupungati ingi iyoo makanisa mupungati."