¹ Kangi namona igulu pia ni nsii mpia, kunsooko igulu lya kuandia ni nsii nya kuandia zakondikila, ni bahali sikalikoli kanki. ² Namona muji welu, Yelusalemu mpia, na aliwizile pansi kupuna kugulu kuaki Mukungile, nauzipiligue kina mutizila namupambue kunsooko ya mugosha wakue. ³ Nanigia lulii lukulu kupuna pi tyengu lya enzi itambula, "Laa! Ukalii waki Mukungile makoli palumui ni anaantu, nunduyo ukakikala palumui nindio. Ikitula antu akue, nu Mukungile mukola ukitula nindio na ukitula Mukungile wao. ⁴ Uputa kila lusholi kupuna ku miso mao, na sikaikitula ni nkia kanki, hau kushunsulia, hau kulila, hau uwai. mantu ma kalii makondikila. ⁵ Mwene nalukalile kyanya yii tyengu lya enzi alutambuile, "Laa! nitenda mantu tulu kutula mapia." nutambula, "Andikaa ilii kunsooko nkani izii ingi za taii na kulukulu." ⁶ Numbuila, Mantu igaa alimakonda kukila! Inee na kuandia nu nuampelo, mwandio ni mpelo. Ku wensi nukuona nota nikakumupela kikopua bila galama kupuna ku kisizii kya mazii ma upanga. ⁷ Mwene nukudula ukishala mantu igaa, na nikitula Mukungile wakue, nunduyo ukitula muana wane. ⁸ Lakini kina yilii naoa, nasika asuili, nakuipilagia, aulagii, akosi, alogi, nakukulagia sanamu, ni alongo tulu, luandi luao lukitula ku lungu lya moto wa kibiliti naukupisagia. nyasi iyo nkia ya kabili." ⁹ Umui wa malaika mupungati nuiza kumuane , umui nalutite mabakuli mupungati nalimijuile makuo mupungati ma mpelo na nutambula, "Nzuu ipa. Nikakukulagila u mutizila, musungu waki muana nkolo." ¹⁰ Kangi nunsola kulii ku nkolo ku milima ukulu na uliipu na nundagila muji nawelu, Yelusalemu, utima pansi kupuna kugulu kuaki Mukungile. ¹¹ Y elusalemu aliitite utukufu waki Mukungile, nu uza wakue aliwi zii kito kya thamani, kina gue lya kilole safi lya yaspi. ¹² Aliwi nigelele kulu, uliipu utite milango kumi ni bili, palumui ni malaika kumi na abili mu milango. Kyanya ya milango aliyandikue mina ma malaika kumi na abili a Izlaleli. ¹³ Uluandi lua kukilima alikoli milango itatu, Uluandi lua kutakama milango itatu, Uluandi lua kusukuma milango itatu, Uluandi lua kumueli milango itatu. ¹⁴ Magelele ma muji alitite musingi kumi ni bili, ni kyanya yakue alimakoli mina kumi na mabili ma itumi kumi na abili a muana nkolo. ¹⁵ Umui alulikitilie ninene alitite kilingasilio kya nkome nalinzipigue ku zahabu kunsooko ya kulingasilia muji, milango yakue ni magelele makue. ¹⁶ Muji nauikue mukati ya mulaba: ulipi wakue sawa nu ugalii wakue. Nulingasilia ku kilingasilio kya nkome, stadia 12,000 ku uliipu ( uliipi wakue, ugalii ni lika aliyimpianile). ¹⁷ Iyoiyo nulingasilia igelel lyakue , uginu wakue ali zlaa 144 ku ilingasilio yaki kiuntu (na gaa ni ilingasilio ya malaika). ¹⁸ Igelele alizengue ku yaspi nu muji nautite zahabu safi, kina kilole safi. ¹⁹ Imisingi yii gelele aliimbue nikila mague ma thamani. Lya kuandia alii yaspi, lya kabili ali yakuti samawi, lya katatu alii kalkedon, lya kanii Zumaridi, ²⁰ lya katano sardoniki, lya mutandatu akiki, lya mupungati krisolitho, lya munana zabarajadi, lya kenda yakuti nya manjano, lya kumi krisopraso, lya kumi naimui hiakintho, lya kumi nambilii amethisto. ²¹ Milango kumi ni biliali lulu kumi ni blii, kila mlango naliuzipigue kupuna mu lulu imui. mitaa ya muji ali zahabu safi, nikigela kina kilole safi. ²² Sikanamona hekalu lyensi mukati ya muji, kunsooko Shekulu Mukungile, nu temaa kyanya ya tulu, nu muana nkolo ingi hekalu lyakue. ²³ Muji sikalisiilye jua hau mueli kuyelia kyanya yakue kunsooko utukufu waki Mukungile naliwlilie kyanya yakue, ni ntala yakue ingi Muana nkolo. ²⁴ Insii ikigendaa ku welu wa muji waso. Atemi aa unkumbigulu ikileta fahali zao mukati yakue. ²⁵ Milango yakue sikaikakigalilua matungo ma munsii, na sikakaukoli utiku kanki paso. ²⁶ Ikileta fahali ni heshima ya insii mukati yakue, ²⁷ na kutilii kishapu nakikiingila mukati yakue,Wala wensi na nukutendaa kintu lyensi lya nsoni hau ukongani sikukiingila, bali ingi ioo du na mina mao mandikue ku kitabu kya upangaa kya Muana nkolo.