¹ Kangi malaika nundagila mongo wa mazii ma upanga, mazi ali ma mupiito kina wa bilauli. Aliimisha mishamamba kupuna ku tyengu lya enzi kya Mukungile ni kya Muana nkoloo ² Kukilila pakati ya mutaa wa muji. ku kila mpembe za mongo alilikoli ni kota lya upanga, naukulela aina kumi na abili za nkali, na ukulela kila mueli. Masanzii ma kota ingi kunsooko ya ugunii wa nsii. ³ Wala sikaikitula ni uzumi wensi kanki. Tyengu lya enzi kya Mukungile ni kya Muani nkolo kikitula mukati ya muji, ni itumii akue ikakutumikila. ⁴ Ikakumuona usiu wakue, ni lina lyake likitula kyanya ya ipaji ya usiu wao. ⁵ Sikaikitula nu utiku kanki: wala sikaikitula ni uitaji wa welu wa ntala hau jua kunsooko Shekulu Mukungile ukitanantia kyanya yao. nindio ikitema kali na kali. ⁶ Malaika numbuila, " Nkani izii ingi za kusuila na kulukulu. Shekulu Mukungile wa nkolo za manabii numutuma malaika wakuenkukualagila itumi akue nakikipunila itii piipi." " ⁷ Laa! nijile kuukau! Mukembetue mwene nukuzitiata inkani za unabii wa kitabu Hiki." ⁸ Inee, Yohana, nene nalinigilie nu kuyona mantu igaa. kinanigia na kukumaona, nangua pansi mukola ntongela ya migulu ya malaika kukumukulia, malaika nalundagilie mantu iga. ⁹ Numbuila, " ulekitenda yaso! inee ingi muitumi miako, palumui ni antua ako manabii , palumui ni ndioo natiata nkani ya kitabu ikii. Mukulii Mukungile. ¹⁰ Nummbuila, " ukiyikila muntozo inkani za unabii wa kitabu ikii, ndogolelio tungo lyapiipika. ¹¹ Namugila haki, wendelele kulekitula ni haki. Na ingi mushapu kimaadili, na nuendelele kutula mushapu kimaadili. muna haki, na nuendelele kutula muna haki. Namuelu, na nuendelele kutula muelu." ¹² Laa! nijile kukau. malipo mane ukoli palumui ninene, kumulipa kila umui kuliganila ni nalukitendile. ¹³ Inee ingi namuandio ni mpelo, na muandio na nampelo, ¹⁴ Akembetue ioo ijaza yao kina aligie haki ya luli kupuna ku kota lya upanga nu kukuingila u muji kukilila mu malango. ¹⁵ Kunzi zikoli mbua, alogi, akosii, aulagi, akulia sanamu, na kila namulogue nu nukushudila ushaidi wa ulongo. ¹⁶ Inee, Yesu numutumile malaika wane kukuashudila kuhusu mantu iga ku makanisa. Inee ngi muili waulelua waki Daudi, Nsonda nya dau nyukumiliminta." ¹⁷ Nkolo nu mutizila itambula,"nzuu!" Nu mwene nukuigagianuatambule, "nzuu!" Wensi nutite nota, nuaze, na wensi nutite insula, nualigie mazii ma upanga nkanda. ¹⁸ Nukumushudila kila muntu nukuigagia nkani za unabii wa kitabu ikii: Kina wensi ukiyongeliaku maso, Mukungile ukakumuongelia makuo nalimandikue ku kitabu ikii. ¹⁹ Kina muntu wensi ukilegia inkani za kitabu ikii kya unabii, na ku muji nawelu, nia mpola zakue zandikagua mukati ya kitabu ikii. ²⁰ Mwene nukushudila msntu igaa utambula, "ee! nijile kuukau." Amina! Shekulu Yesu! ²¹ Ukende waki Shekulu Yesu utule nu kila muntu.Amina.