¹ Kangi namona malaika utima kupuna kugulu, utite ni mpungulo wi kombo nigila ka mpelo nu munyololo ukulu mu mukono wakue. ² Numiamba inzoka iyo, nzoka nya kalii, na ingi ibilisi hau Shetani, na kukumutunga miaka kihumbi. ³ Numutaga mu kombo nigila ka mpelo, nulitunga nu kukuliikila muntozo kyanya yakue. iyii aliiyo kina waleke kuakonga anansii kani mpaka miaka kihumbi kinaikishila. pembele paso, ukilekelua hulu ku tungo kyei. ⁴ Kangi namona matengu ma enzi. naliikalile ingi ioo naliapegue mamlaka ma kulamula. Iyoiyo namona nafisi za ioo na liagulue matue kunsooko ya ushuda kuhusu Yesu nu ku lukani luaki Mukungile. alisika amikulilie inimuu hau sanmu yakue, na aliasitile kushingila muntozo kyanya ya makuni ma usiu wao hau mukono. aliizile mu upanga, na natema palumui nu Kilisito ku miaka kihumbi. ⁵ Akii naliasagile sikanaiza mpaka miaka kihumbi kinaliyasila. Uu wau ukunukulua wa kuandia. ⁶ Mukembetua na muelu ingi muntu wensi na nushola lyoma ku ukunukulua wa kuandia! Nkia yakabili ngila ngulu kyanya ya antu kina iaa. Ikitula ni makuhani aki Mukungile na waki Kilisito na ikitemaa nu mwene ku miaka kihumbi. ⁷ Tungo miaka kihumbi kinaikipikila mpelo, Shetani ukitungulilua kupuna mugeleza lyakue. ⁸ Ukiyenda kunzi kukiakonga anansii ku kona zinii za unkumbigulu_ Gogu ni Magogu- kukualeta palumui kunsooko ya mbita. ikitula ingii kina munsanga wa bahali. ⁹ Naenda kyanya mu tambalale ya nsii nindio napilima nkambi nya aumini, muji naulogue. Lakini moto nawiza kupuna kugulu nu kukualimansilia. ¹⁰ Shetani, nali wakongile, nutagua mukati ya lungi nalyukuakila na kibiliti, mu nimuu na nabii wa ulongo aliatagagua. Ikiyagigua munsi nu utiku kali na kali. ¹¹ Kangi namona tyengu lya enzi kikulu kielu nu nduyo nalukalile kyanya yakue. Unkumbigulu ni gulu nazimanka kulii kupuna ku ukoli wakue, lakini alikutili lyoma lya ene kuyenda. ¹² Naniaona naakile_ agimia naagila ka umuhimu imikile pi tyengu lya enzi, ni itabu naliikunukulue. Kangi kitabu kyingi nakitungulua_ Kitabu kya Upanga. Akii nahukumilua ku ikio nalikiandikue muakati ya kitabu, mapunilo ma ikio naliakitendile. ¹³ Bahali niapunia akii naliili mukati yakue. Nkia nu kuzimu nayapunia akii naliili mukati yakue, ni akii nahukumilua kuliganila ni naliakitendile. ¹⁴ Nkia nu kuzimu nazitagua mukati yi lungu lya moto. ¹⁵ Kina lina lya wensi sikanaligila lyandikue mukati ya kitabu kya upanga, nutagua muakti ya lungu lya moto.*