¹ Pembele mantu igaa nanigia luli kina ya mulilo ukulu wi dale kulu lya antu kugulu itambula, "Haleluya, ugunua, ni ngulu ingi yaki Mukungile witu. ² Ulamuli wakue ingi wa kulukulu na wa haki, kunsooko wamulamula kahaba mukulu nunminonile insii ku ukosi wakue. Utendile kisasi ku migali ya itumi akue, na aliwitile mwene mukola." ³ Ku nkua ya kabili natambula, " Haleluya! lyuki lyukupuna kumakue kalii na kalii." ⁴ Anampala ioo makumi mabili na anii ni iyumbe napangaa anii natungama nu kukumukulia Mukungile nukikalaa mu tyengu lya enzi. alii itambula , Amina. Haleluya!" ⁵ Papo lulii nalupuna mu tyengu lya enzi, nitambula " mululii u Mukungile witu, inie itumii akue tulu, nininye namukumukile mwne, tulu nagila ka umuhimu na natite ngulu." ⁶ Iyo nanigia luli kina luli lui dale kulu lya antu, kina luli lya ngulumo ya mazi mingi, ni kina ngulumo nya nkua, itambula," Haleluya! Shekulu ingi Mukungile witu, mutemi kyanya ya tulu, ukutemaa. ⁷ Na kuiloikie nu kulumba nu kukumupela utukufu kunsooko wingaa ni shelehe yaki muana nkolo yazaa, nu mutizila wakondaa." ⁸ Alimugombigue kujaligua kitani kielu nakimilinta( kitani kielu ingi matendo ma haki ya umini). ⁹ Malaika nutambula ninene, Maandike aya: akembetue naalikiue ku sikunkulu nya wingi wa Muana nkolo. Iyo iyo numbuila, "izii ingi nkani za kulukulu zaki Mkungile." ¹⁰ Nantuna ntongela ya migulu yakue nanumukulia, lakini numbuila, " ulekitenda itii! Inee ingi nimuitumii miako na wa antu ako muna kuuamba ushuda waki Yesu, Mukulie Mukungile, kunsooko ushuda waki yesu ingi nkolo ya unabii." ¹¹ Kangi namona igulu naliduguka, na laa alikoli farasi nzelu! nu nduyo naluminankile uyitua Musuili na wa kulukulu. ukulamula ku haki nu kutenda mbita. ¹² Miso makue ingi kina mwali wa moto, na kyanya yi tue lyakue utite taji ningii. Utite lina naliandikue kyanya yakue nasikaulingile muntu wensi angasika mwene mukola. ¹³ Ujalile kijalo nakinimikue mu migali, ni lina lyakue alimuitue Lukani luaki Mukungile. ¹⁴ Majeshi ma kugulu alimakumutiata kyanya ya farasi naelu, najaligua kitani kiiza, kielu na kisafi. ¹⁵ Mukilakala kyakue yukupuna mpanga nzugi nyukulimansilagia insii, nunduyo ukakiatema ku nkome nyi shuka. Nunduyo ukutilata isheme ya mubinyo ku kuo tyaki lyaki Mukungile, ukutema kyanya ya tulu. ¹⁶ Nunduyo muandikue kyanya ya kijalo kyakue nu ku kuni lyakue lina, MUTEMI WA ATEMI NA SHEKULU WA ASHEKULU. ¹⁷ Namona malaika wimikile ku jua. Nuaita ku luli lukulu noni tulu nazukuputa mukyanya,"nzui, ilingilii palumui pa ndia nkulu zaki Mukungile. ¹⁸ Nzui mulie nama za atemi, nama za agalimanga, nama zaantu akulu, nama za farasi ni anankila farasi, ni nama za antu tulu, naili huru ni asese, nagila ka umuhimu ni ana ngulu." ¹⁹ Nanimiona nimuu ni atemi a nsii palumui ni majeshi mao. aliipaingile kunsooko ya kutenda mbita na umui nalunankile farasini jeshi lyaki. ²⁰ Nimuu niguilua nu nabii wakue wa ulongo nalutendile miena ku ukoli wakue. ku miena iyii aliwakongile ioo naliasingile muntozo wa nimuu na ninaliamitungamile sanamu yakue. tulu abili natagua nakili apanga ku lungu lya moto nalyukuakila kua kibiliti. ²¹ Ioo naliasagile naulagua ku upanga naliupunile mukilakala ku mui nalunankile kyanya ya farasi. Noni tulu nazilia imizoga ya miili yao.