¹ Pembele ya intu ii nanumuona malaika wingii utima pansi kupuna kugulu. Mwene alutite mamlaka makulu, ni nsii niangaligiua ku utukufu wakue. ² Nulila ku luli lukulu, nutambula, "wagua, wagua, u muji uoo naukulu wa Babeli! watula luandi namakikala imapepo, nu luandii nikikalaa kil nkolo nashapu, nu luandi nukikalaa kila mushapu ni noni nyukuipilagia. ³ Kunsooko nsii tulu zakopa mubinyo wa tamaa nya ukosi wakue na ukumuletela gazabu. Atemi a nsii azinii nunduyo. Asuluja a nsii atula agoli ku ngulu ya ukalii wakue wa anasa." ⁴ Kangi nanigia luli luingi kupuna kugulu itambula, punii kumuakue antu anee, mulekizishiliki mu milandu yakue, na mulekizi shingila makuo makue tulu. ⁵ Milandu yakue yilundikile kyanya kina gulu, nu Mukungile wijukaa matendo makue namadobu. ⁶ Mulipii kina aliwalipile naingii, na mukamumulipe nkua zibili ku namna nalutendile: ku kikombe nalukisalinkanilie nkua zibili kunsooko yakue. ⁷ Kina naliwitukuzile mwene mukola, na aluklile ku nasa, mupelii uwagiiwingii nu ukia." kunsooko ukutambula mumoo wakue, Nikalile zii malikia: wala sika mujane, na wala sikaniyona kaunsunsulia, ⁸ Kululo mukati mu lutondo lumui makuo makue mikakumulemeilia nkia, usunsulia, ni nzala. Ukilimansiligua ku moto, kunsooko Shekulu Mukungile ingi muna ngulu, na ingi mulamuli wakue." ⁹ Atemi a nsii nazinile nu kushalinkanilua palumui nunduyo ikilila nu kushunsulia kinaikaliona ilyuki lya kupia kumuakue. ¹⁰ Ikiyimika kulii nunduyo, ku shupo lya uwai wakue itambula , " ole,ole ku muji nakulu, Babeli, muji nautite ngulu! ku shaa limui ulamuli wako wazaa. ¹¹ Asuluja a nsii lilii nu kushunsulia kunsooko yakue, kunsooko kutili sunga numui nukugula intu yakue kanki_ ¹² intu ya zahabu, mpi, mague ma thamani, lulu, kitani, zambalau, halili, nkusuku, aina tulu za makota ma mununko uza, kila kiseme kya mpembe za nzogu, kila kiseme nakizipigue ni makota ma thamani, shaba, shuka, gue, ¹³ mudalsini, iyungo, uvumba, manemane ubani, mubinyo, makuta, utuu uza, ngano, ng"ombe ni nkoloo, farasi ni mituka, ni asese, ni nkolo za antu. ¹⁴ Nkalii natamanile ku ngulu zako zalega kupuna kumuako. Anasa zako tulu ni mapambo malegaa, sikamikigela kanki. ¹⁵ Asuluja a intu ii naliligilie ugoli ku ulowa wkue ikiyimika kuli kupuna kumuakue kunsooko yii shupo lya uwai wakue, nailila nu luli lua usunsunsulia. ¹⁶ Naitambula "Ole, ole, muji uoo naukulu nauimbue kitani kizaa, zambalau, na nkasuku, nu kupambua ku zahabu, ni vito ya thamani ni lulu!" ¹⁷ Mukati yi tungo limui ugolii tulu waso naulega. kila nahoza wa meli, kila bahalia, na tulu anamazii, na tulu nakitumaa mulimo mu bahali, naimika kulii. ¹⁸ Nalilaa kina nauona ilyuki lya kupia mwene. Natambula, " Ingi muji uu ukulu? ¹⁹ Nataga lunkundi kyanya ya matue mao, naalila, naipunia misholi nukunshunsulia, Ole,ole muji ukulu luandi tulu naliatite meli zao mu bahali alii agolii kupunila ni nsao zakue. mukati yi shaa limui walimansilagigua." ²⁰ Lumbilii kyanya yakue, gulu, inie asuili ,atumua, ni manabii , ku ndogolelio Mukungile waleta ulamuli wani kyanya yakue!" ²¹ Malaika muna ngulu nunansula igue kina gue kulu lya kushiela na nulitaga mu bahali, nutambula, ku nzila iyii, Babeli, u muji uoo naukulu, ukitagua pansi ku ukatili sikaukakigela kanki. ²² Luli lua inanda, anambina, isiga mpilimbi, ni talumbeta sikaikakigulika kankikumiani. Wala fundi wa aina yensi sikaukakigela kanki kumiani. wala luli lua tulii sikalukiigigua kanki kumiani. ²³ Uwelu wa ntala sikaukiyangaja mukati yako. Luli luaki shekulu wa wingaa nu bibi wa wingaa sikazikikiguligua kanki mukati yako, ndogolelio asuluja ako ali akulu a nsii, na a nsi, akongue ku ulogi wako. ²⁴ Mukati yakue migali ya manabii ni asuili aligiile, ni migali ya tulu naliaulague kyanya ya nsii."