¹ Umui wa malaika mupungati nalutite itasa mupungati nuiza nukumbuila, "nzuu, nikakukulagila ulamuli wa kahaba mukulu nukikala kyanya ya mazii mingii, ² ni atemi a nsii atendile mantu ma ukosi nuduyo na kyanya ya mubinyo wa ukosi wakue nakikalaa munkumbigulu agalagigua." ³ Malaika nunsola ku nkolo mpaka mushaka, na alimonie musungu ukalile kyanya ya nimuunkasuku nujuile mina ma itukii. ⁴ Musungu alimuimbue ntila za zambalau ni nankasuku na mupambue ku zabahu, mague mathamani, ni lulu. Aluambilile mu mukono wakue kikombe kya zahabu nalikijuile intu ya maipilo ma ushapu wa ukosi wakue. ⁵ Kyanya ya kuni lya usiu wakue liandikue lina lya unkunku: "BABELI MUKULU, MAU WA MAKAHABA NA YA INTU YA MAIPILO MA NSII." ⁶ Namona kina musungu nuso alugalile ku migali ya aumini ni migali ya nakiile kunsooko yaki Yesu. Tungo kinalinumunie, alintiite ukungualii ukulu. ⁷ Lakini malaika numbuila, "kua niki ukungualaa? Nikakuiila ndogolelio ya musungu ni nimuu nyukumusolaa(nimuu nyaso nititematue mupungati ni nindizo mpembe kumi). ⁸ Nimuu nalumionie alikoli, yukutilii kanki inoo, lakini ukoli wakondaa kunankila kupuna mukombonigila kampelo. Kangi ukiyendelela nu wononi. ioo naikikala kyanya ya nsii, ioo imina mao sikalimandikue mu kitabu kya upangaa kupunila kuyikua imisingi nya unkumbigulu_ ikikulilua nakumiona inimuu nalukolii, kina ukutilii inoo, lakini wili piipi kuiza. ⁹ Witua uu ingi kunsooko ya masala namatite nihekima. Matue mupungati ingi milima mupungati nu musungu alukalile kyanya yakue. ¹⁰ Nimaso gaa ingi atemi mupungati. Atemi atano aguaa, umui ukoli, nu muua kili waze: tungo kinaukiiza, ukakikala ku tungo kupii du. ¹¹ Nimuu nalikoli, lakini inoo ukutili, mwene gaa ingi mutemi wa munane: lakini ingi umui wa ioo atemi mupungati, uyenda mu wononi. ¹² Mpembe kumi izo nuzionie ingi atemi kumi na sikaasingile u utemi, lakini ikishingila mamlaka kina atemi ku tungo limui ku saa imui palumui ni nimuu. ¹³ Iaa atite shauli limui, na ikakumupela ngulu zao ni mamlaka inimuu nyaso. ¹⁴ Ikitenda mbita katia yao nu muanankoloo, Lakini muana nkoloo ukakiadula kunsooko ingi Shekulu wa Ashekulu na mutemi wa atemi _ nu kumuene nakuitua, nakusagulua,asuilii." ¹⁵ Malaika numbuila, Imazii igoo numaoni, paso kinalukalile u kahaba uyo ingi antu, makutano, nsii ni ntambo. ¹⁶ Impembe izo kumi nuzionie_zaso nu nimuu iyo ikakumusola u kahaba uyo. nindio ikakumutenda kutula mupolelue na ukipui, ikakumulia umwili wakue, na ikakulimansilia ku moto. ¹⁷ Ndogolelio Mukungile waikaa mu mioo yao kukenka kusudi lyakue kua wigombia wa kumipela nimuu nyaso ngulu zao kukumutema mpaka nkani zaki Mukungile kinazikitimila. ¹⁸ Munsungu uyo nalumuonie ingi muji uo ukulu naukutema kyanya ya atemi a nsii.