¹ Nanigia luli lukulu luyita kupuna ku luandi naluelu na lutambula kua malaika ioo mupungati, "Lenda wendiiita kyanya ya unkumbigulu mabakuli mupungati ma gazabu yaki Mukungile." ² Malaika wa kuandia nuenda nukuita bakuli lyakue mu unkumbigulu: nkonko mbii nanitiite uwai utaki nawiza ku antu natite muntozo wa nimuu, ku ioo naliikulia sanamu yakue. ³ Malaika wa kabili nuita bakuli lyakue ku bahali: naituka kina migali ya muntu nukiile, na kila kiumbe nakipanga ku bahali nakikia. ⁴ Malaika wa katatu nuita bakuli mu miongo nu muishiizi ya mazii:nitula migali. ⁵ Nanigia malaika a mazii nutambula, "uwe ingi umusuili_umui nukoli, nalukolii, muelu_kunsooko waletaa ulamuli uu. ⁶ Kunsooko aliitile migali ya asuili ni manabii, wapela ene kukopa migali: kikio naijipiile." ⁷ Nanigia mazabahu ishokelia,"eee! Shekulu Mukungile muna kutema kyanya ya tulu , ulamuli wako ingi kulukulu na za haki." ⁸ Malaika nua kanii nuita kupuna mu bakuli lyakue kyanya yi jua, naligombigua kupia antu ku moto. ⁹ Napisigua ku upiu wa kutumbaa, nakufulu lukani luaki Mukungile, muna ngulu kyanya ya makuo tulu, Sinaungama wala kukumupela mwene utukufu. ¹⁰ Malaika wa katano nuita kupuna mu bakuli lyakue pi tyengu lya enzi lya nimuu, ni kitii naliukumba uutemi wakue. Nasia mino ku uwai ukali. ¹¹ Namutuka u Mukungile wa kugulu kunsooko ya uwai wao ni nkonko zao, na kilii aliendelile kulekiyungama ku ikio naliakitendile. ¹² Malaika nua mutandatu nuita kupuna mu bakuli lyakue mu mongo ukulu, Frati, ni mazi yakue namumaa kushuma kujipilia nzila kua atemii naikiiza kupuna kukilima. ¹³ Namona nkolo zitatu nshapualizigiile kina ntundu nazukupuna kunzi ya mulomo wa ijoka ilo, inimu iyo, nu nduyo nabii nua ulongo. ¹⁴ Ingi nkolo za pepo nazukutenda miena ni ishembo. Aliendile kua atemii aa unkumbigulu tulu kushuma kukiailingila palumui ku mbita ku lutondo lukulu luaki Mukungile, mun akutema kyanya ya tulu. ¹⁵ (" Laa! nijile zii mwii! bau uyo nukuima kuyelia, nukutunza ijalo yakue walekishuma kuyenda kunzii kipuii nu kuyona nsoni.") ¹⁶ Naaleta palumui ku luandi nalinitue ku kieblania Amagedoni. ¹⁷ Malaika nua mupungati nuita kupuna mu bakuli lyakue ku anga, Kangi luli lukulu lugulika kupuna paluelu nu kupuna pi tyengu lya enzi,nalutambula, "yasilaa!" ¹⁸ Alikoli ni miale nya welu wa nkua, ngulumo, ishindo ya nkua, ni tetemeko lya kutumbaa_ tetemeko ikulu lya nsi nakili lipunile munkumbigulu punila ananantu naaliakoli munkumbigulu, Iyo ni tetemeko kulu kukilikila. ¹⁹ Muji ukulu nautuanukaa. Kangi Mukungile numujukia u Babeli mukulu, na nupela muji waso kikombe nalikijuile divai kupuna kugazabu yakue nantakii. ²⁰ Kila kisiwa nakilimila ni milima sikanigela kanki. ²¹ Mbula nkulu nya mague, nitula nu uluto wa talanta, nitima kupuna kugulu kyanya ya antu, na namuzuma u Mukungile ku makuo ma mbula nyamague kunsooko kuo ilo alibii zigi.