¹ Kangi namona nimuu ipuna mu bahali. alitite mpembe kumi ni matue mupungati. Mu mpembe zakue alizikoli taji mupungati,nu mutue lyakue alizikoli ni nkani za kukufulu kuaki Mukungile. ² Inimuu iyii nalinimionie yikina nsui. migulu yakue aliyili zii kina ya dubu, nu mulomo wakue aliwikina wa nsimba.Inzoka iyo nyumupela ngulu, nu kutyengu yakue lya enzi, ni mamlaka namatite ngulu zigi nya kutemaa. ³ Tue kya nimuu imuiyakue nakigela kutula ni nkonko nkulu na alilijilshakia nkia yakue. Lakini nkonko yakue nikamia,nu unkumbigulu tulu naukulilua naumitiata inimuu. ⁴ Iyogaa namikulia inzoka, ndogolelio numupela mamlaka inimuu nyaso.Namikulia ni nimuu gaa, nalongoleka kutambula, "wani nuikina nimuu? nawani nukakikua nindio?" ⁵ Nimuu nipegua mulomo ilikitie nkani za kikulia ni ituki. Nagombia kutula ni mamlaka ku mieli makumi manii nibili. ⁶ Iyo nimuu nikunukula mulomo wakue kutambula ituki zidi yaki Mukungile, nilituka lina lyakue, iyeneo nalikula ukalile ni ndio naikalile kugulu. ⁷ Nimuu nigombigua kutenda mbita ni asuili nu kukuadula. Iyogaa, nipegua kyanya ya kila kabila, antu, ntambo ni nsii. ⁸ Tulu naikalile muunkumbigu ikakumukulia mwene,kila umui ilina lyakue nasikalyandikue, kupuna uumbi wa unkumbigulu, ku kitabu lya upanga, nakyakimuanankolo, nalimusinzue. ⁹ Anga wensi utite kutui, nua tegele. ¹⁰ Anga umuiwakue wasogua mateka, nu kumateka ukiyenda. Anga umuiwakue ukiyuga ku mpanga, ku mpanga ukiyulagua. Uu ingi witua wa utulu nu wiumatilia nu usuili kuaso naelu. ¹¹ Kanki namona nimuu nyingii ipolokile kupuna ku nsii. aliutite mpembe zibili kina nkoloo na nulikitita zii nzoka. ¹² Nulagila mamlaka tulu ku nimuu iyo nya kuandia ku ukoli wakue, nu kutenda mu unkumbigulu ni ndio naliikalile nakumikulia inimuu nya kuandia, uyo inkonko yalue nyakamagia. ¹³ Nutenda ishembo naitite ngulu, sunga nutenda moto utime mu unkumbiuglu kupuna kugulu ntongela ya antu, ¹⁴ nu kumiena alimugombigue kutendaa, nuakonga aso naikikala mu unkumbigulu, nukiaila kujipia sanamu ku heshima ya nimuu nalimbalaligue ni mpanga, lakini kili alukalile. ¹⁵ Alimgombigue kupunia mpumu ku sanamu iyo nya nimuu isume kutambula na kushakia ioo tulu naliasitile kukumikula inimuu aulague. ¹⁶ Iyogaa nukankanika kila umui, namugila thamani na nutite ngulu, mugoli na mutuka, huru n musese, kushingila muntozo ku mukono wa kigosha hau ku kuni lya usiu. ¹⁷ Alii sikaishumikile ku kila muntu kugulia hau kugula ila nutite muntozo wa inmuu, na iyii ingi namba niwakilisilie lina lyakue. ¹⁸ iyii yisiilie busala. Anga wensi nutite ulingii, muleke wasume kutenda ilyalio lya namba nya nimuu. ndogolelio ingi namba nya kiuntu, Namba yakue ingi 666.