¹ Nampegua mwanzi wa kutumila kina nkome ya kupimila. nambuilua: Lega na upime ihekalu lyaki Mukungileni mazabahu, na ioo naishalil mukati yakue. ² Lakini ulekipima ieneo lya kulua wa kunzii ii hekalu, kunsooko apegue antu a nsii. Ikakuutilata u muji nawelu ku matungo ma mieli makumi manii. ³ Nikakuapela mashaidi ane abili mamlaka ma kulotelia ku matungo ma ntondo 1,260, iajalile magunila." ⁴ Iaa mashaidi ingi makota mablima mizeituni ni inara ibili nayimikile ntongela yaki Shekulu nua unkumbigulu. ⁵ Kina muntu wensi ukilamula kukuaonona, moto ukupuna muilakala yao nu kukuanona anaulugu wao.wensi nusiilie kukuaonona lazima waulague ku nzila iyii. ⁶ Iaa mashaidi atite usumii wa kutunga anga kina mbula ilekikua tungo kinailotelia. Atite ngulu za kukaila mazii kutula migali na kukumikua insii ku kila aina ya kuo tungo lyensi angatake. ⁷ Tungo kinaikitula amalaa ushuda wao, inimu iyo niupuna mu kombo nigila ka mpelo uktenda mbita zidi yao. ukakiadula nu kukuaulaga. ⁸ Miili yao ikigona ku mutaa wa muji naukulu( na kumpiani uyitua Sodoma ni Misili) nu Shekulu wao alimuangikue. ⁹ Ku ntondo zitatu ni nusu nkei kupuna kua jamaa aa antu, kabila, ntambo ni kila nsii ikilaa miili yao na sikaikipunia kibali kuyikua ku kibiila. ¹⁰ Ioo naikalile ku nsii ikakiloa kunsooko yao nukukua nu kushangilia, sunga kukitumila zawadi kunsooko aso manabii abili aliagilie ioo naliikalile ku nsii. ¹¹ Lakini pembele ntondo zitatu ni nusu mpumu nya upanga kupuna kuaki Mukungile yikakuaingila nindio ikiyimika ku migulu yao. shupo kulu ikakuaguila ioo nakualaa. ¹² Kangi ikiigia luli lukulu kupuna kugulu yikialaa, "Nzuu kunu!" nindio ikiyenda kyanya kugulu ku lunde, tungo alugu ako iilaa. ¹³ Ku tungo lyaso kalikoli ni tetemeko kulu lyaa nsii ni mui ya kumi ya muji ikigua. Antu ihumbi mupunguati ikiyulagua ku tetemeko ni naikishagila apanga ikiyopokigua nu kukumupela utukufu Mukungile wa kugulu. ¹⁴ Ole nya kabili yakilaa. Laa! Ole nya katatu ipolokile kuukau. ¹⁵ Nkangi malaika nua mupungati nukua tarumbeta yakue , na sauti nkulu alindikitigue kugulu nu kutambula, "utemi wa unkumbigulu watula utemi waki Shekulu witu nu waki Kilisito wakue. ukitema kali na kali." ¹⁶ Kangi anampala makumi mabili na anii naliiklile mu matengu ma enzi ntongelo yaki Mukungile naagua enee pansi mu nsii, usiu wao utunile pansi,nindio naamukulua Mukungile. ¹⁷ Natambula, " kuipunia shongelio lyitu kumuakue, Shekulu Mukungile, mutemi kyanya ya tulu, na ukoli na alukoli, kunsooko wasola ngulu yako nkulu na kuyandia kutema. ¹⁸ Insii naataka, lakini gazabu yako yazaa. tungo lyapikaa kua akii kulamulua nunduwe yapoloka itumi ako manabii, asuili ni ioo natite ishupo lya lina lyako, tulu abili nasika afaile kintu ninatite ngulu. Ni tungo lyako lyapika lyakuaonona ioo na atula iyonona unkumbigulu." ¹⁹ Nkangi hekalu lyaki Mukungile kugulu nikunukulue ni shandiko lya lyago lyakue aliligile mukati ya hekalu lyakue. alikoli ni miali ya mwanga,kilanga, ngulumo za nkua, tetemeko lya nsii ni mague ma mbula.