¹ Ku vela basi njeta hukumu yi adhabu panani yawu vavavi kupete Kristo Yesu. ² Kwa kuva kanuni yi Roho wu womi wola wowuvi kupete Kristo Yesu yinitendiki nenga kuva hulu kutali ni kanuni yi dhambi ni mauti. ³ Ku ndava chela ambachu shelia yikashindwa kutenda ku ndandi yikavi dhaifu kupete hyegha, Chapanga akatendiki. Akantuma Mwana waki wu kanjika ku mfanu wu hyegha yi dhambi ava sadaka yi dhambi, ni akayihukumu dhambi kupete hyegha. ⁴ Akatendiki vela ili malaghalaki yi shelia yatimilika mukati yitu, tenga tangakuyenda ku kuvengale mambu yi hyegha, bali kwa kuvengale mambu yi Roho. ⁵ Vala vavayivengale hyegha vayaholale mambu yi hyegha, nambu vala vavavengale Roho vayaholale mambu yi Roho. ⁶ Kwa kuva nia yi hyegha ni mauti, bali nia yi Roho ni womi ni amani. ⁷ Aye ni ku ndandi yela nia yi hyegha ni uadui panani yaka Chapanga, ku ndava ngacheayihinika shelia yaka Chapanga, wala ngachemweza kuyihinika. ⁸ Vala vavavengale hyegha ngache vaweza kunyambila Chapanga. ⁹ Hata vela, ngachemuvi kupete hyegha bali kupete Roho, ngati ni chakaka kuye Roho waka Chapanga atama mukati yinu. Nambu ngati mundu ngachevi Roho waka Kristo, yombi nga waki. ¹⁰ Ngati Kristo avi mukati yinu, hyegha yipotili ku mambu yi dhambi, bali roho ni yomi ku mambu yi haki. ¹¹ Nayivi Roho wu yola yoakanhyohiki Yesu kuhuka mu wafu atama mukati yinu, yombi yola yoakanhyohiki Kristo kuhuma mu wafu ayipekya kave hyegha yinu yi mauti uhai ku ndela yi Roho waki, yotama mukati yinu. ¹² Vela basi, valongu vangu, tenga tu vadeni, nambu nga ku hyegha kuye tutama ku ntundu wu hyegha. ¹³ Ndava nayivi mutama ku ntundu wu hyegha, muyi pambipi kuhwa, nambu nayivi ku Roho muyafisha matendu yi hyegha namu matama. ¹⁴ Mambu ngati ambavo vanawingi vavalongoheka ni Roho waka Chapanga, avava ni vana vaka Chapanga. ¹⁵ Kwa kuva ngachemukanjopali roho wu vatumwa kavete hata monjoghopa. Badala yaki, mukayopiki Roho yi kutendekeka kuva vana, ambayu ku vela tulela "Abba, Tate!" ¹⁶ Roho mweni ashuhudila papamu ni roho hitu yi kuva ti tavana vaka Chapanga. ¹⁷ Nayivi ti tavana, basi ti valithi kave, walithi waka Chapanga. Ni tenga ti valithi papamu ni Kristo, nayivi ku chakaka tughahika ni yombi ili tupata kutukuzwa papamu niyombi. ¹⁸ Kwa kuva niyavelenga maghahiku yi chikahi chenje kuva nga chindu ananilenganisha ni utukufu wowahyekenuliwa kwitu. ¹⁹ Kwa mana hiumbi yoha kave vihovale ku shauku yanawingi kuhyekunuliwa ku vana vaka Chapanga. ²⁰ Kwa mana uwombaji kave ukahinikishwa pahi yi ubatili, nga ku hiali yaki, ila ku ndava yaki yombi yoavihinikisha. Ni ku kuhovalela. ²¹ kuye uwombaji weni nawu ukavekwa hulu ni kupitali kupete utumwa wu kuyonengeka, ni kuyingiwa kupete uhulu wu utukufu wu vana vaka Chapanga. ²² Kwa mana tumanyi yi kuva uwombali nawu upotekeka ni kung'ahika ku uchungu papamu hata henu. ²³ Nga vela pela, ila ni tenga taveni tetuvi ni malimbuku yi Roho - tenga kave tupotakeka ku nafsi hitu, tulendele kututenda vana, yaani ukombozi kupete hyegha yitu. ²⁴ Kwa mana ni ku talaja leneli tukaokuliwi. Nambu chindu chechatalajiwi chikawonikana njeta talaja kaveti, kwa mana naneki yoachitalaji chela cheachiwona? ²⁵ Bali ngati tuchitalaji chindu changa kuchiwona tuchilendele ku sabuli. ²⁶ Ku ntundu wolawola, Roho niyombi yituyangati kupete udhaifu witu. Kwa mana ngachetumanyi kulova mu ntundu yeyipasika, Nambu Roho mweni atilovela ku kupotekeka kwanga kuweza kuvahakika. ²⁷ Ni yombi yoayichunguza mitima ayimanya malangu yi Roho, ku ndandi alova ku niaba yawu vavaamini kulengana ni mapalilu yaka Chapanga. ²⁸ Nitenga tumanyi yi kuva ku voha vavampala Chapanga, yombi atenda mambu yoha papamu ku wema, ku vala voha vavalohakiki ku kusudi laki. ²⁹ Ku ndandi vala voha vaakavamanyi kutumbu asili, kave akavahawi kutumbu asili vafananishwa ni mfanu waka Mwana waki, ili yombi avya muzaliwa wu kulongole mu miongoni mu valongo vanawingi. ³⁰ Ni vala vavakahawuliki kutumbu asili, avava akavalohiki kave. Ni vala vaakavalohiki, vombi akavavalangi haki. Ni vala vaakavavelangi haki, avava kave akavakweha. ³¹ Tuvaha kiki basi panani yi mambu yanaya? Chapanga naavi upandi witu, ni naneki yoavi panani yito? ³² Yombi ywangakundekeke mwana waki mweni bali akamboha ku ajili yitu tenga tawoha akosa wo kutukilimi ni mambu yoha papamu naku? ³³ Ni naneki yoavatakila vateule vaka Chapanga? Chapanga ndi mweni kuvavalangi haki. ³⁴ Ni naneki yoakamuhumukila adhabu? Kristo Yesu ndi yoakahwili ku ajili yitu, ni nganila yi yanaya, yombi kave akahyohakiki. Niyombi atawala papamu ni Chapanga mahala pu kuyinikwa, ni kaveti ndi yoatilove tenga. ³⁵ Ni naneki yoatutenga ni upendu waka Kristo? Dhiki, pangachi shida, pangachi mang'ahiku, pangachi njala, pangachi hewu, pangachi hatale, pangachi lipanga? ³⁶ Ngati moyalembekiki, "Ku faida yaku vatukoma muhi yoha. Tukavalangakiki ngati mambeleli yi kuchinjakika." ³⁷ Kupete mambu yanaya yoha tenga tu nganila yi vashindi kupete yombi yoatipaliki. ³⁸ Kwa mana niyomwi kushawishika kuye wala mauti, wala womi, wala malaika, wala mamulaka, wala hindo heyivi, wala hindu heyihika, wala makili. ³⁹ wala yayavi panani, wala yayavi pahi, wala chiumbi chengi chochela, ngachiweza kututenga ni upendu waka Chapanga, ambayi ni Kristo Yesu Bambo witu.