¹ Ku ndava vatuvelangi haki ku ndela yi imani, tuvi ni amani ni Chapanga ku ndela yaka Bambu witu Yesu Kristo. ² Kupete yombe tenga kave tuvi ni fursa ku ndela yi imani kupete neema yenje ambayu mukati yaki tuyema. Tufulahi ku ukakamahu woatupeke Chapanga ku ajili yi badayi, ukakamahu ambawu tashilika mu utukufu waka Chapanga. ³ Nga lende pena, nambu kave tufulahi ku mang'ahiku yitu. Tumanya kuye mang'ahiku yaveleka luhinakilu. ⁴ Luhinakilu luveleka kuyetekeka, ni kuyetekeka yiveleka ukangamahu ku ajili yi badayi. ⁵ Ukangamahu wombo ngacheukatisha tamaa, ku ndandi upendu waka Chapanga uyitakiki mu mitima yitu kupete Roho Muhuhu, ambayi vakambohiki kwitu. ⁶ Patukavi takona tu vadhaifu, ku chikahi mwafaka Kristo akahwile ku ajili yi vaovu. ⁷ Ku ndava nayiva vigumu yumu kuhwa ku ajili yi mundo mweni haki. Yenje ni kuye, pangachi mundo kaya athubutwi kuhwa ku ajili yaka mundu mwema. ⁸ Nambu Chapanga atuhakikishi upendu waki mweni kwitu, ku ndandi chikahi chetukavi tukona veni dhambi, Kristo akahwili ku ajili yitu. ⁹ Kisha nganila yi yoha, henu tuvelangiki haki ku mwahi waki, natuokuliwayi ku vela kuhuma ku ghadhabu yaka Chapanga. ¹⁰ Ku ndandi, nachivi chikahi patukavi maadui, tukapatanishwi ni Chapanga ku ndela yi nyiwa yaka mwana waki, nganila petu, baada yi kuva tuyomwi kupatanishwa, natuokuliwayi ku maisha yaki. ¹¹ Nga ana pela, bali kave tufulahi kuka Chapanga kupete Bambu Yesu Kristo, kupete yombi ambayi henu tuyopiki upatanishu womboni. ¹² Ku vela basi, kupete mundo yumu dhambi yikayingi mu dunia, ku ndela yenje nyiwa yikayingi ku ndela yi dhambi. Ni nyiwa yikasambaa ku vandu voha, ndandi voha vakatendiki dhambi. ¹³ Kwa kuva hadi shelia, dhambi yikavi mu dunia, nambu dhambi ngacheyahesabiki chikahi njeta shelia. ¹⁴ Hata vela, nyiwa yikatawala kuhuma Adamu hadi Musa, hata panani yi vala ambawu ngache vatendiki dhambi ngati kutokuhinika kwaka Adamu, ambayi ni mfanu wu yombi ambayi akahikike. ¹⁵ Nambu hata vela, zawadi yi waka nga ngati lihoku. Kwa kuva nayivi ku lihoku laka yumu vanawingi vakahwile, nganila petu, neema yaka Chapanga ni zawadi ku neema yaka mundu yumu, Yesu Kristo, yizidi kuyonjekeka ku vanawingi. ¹⁶ Kwa kuva zawadi nga ngati matokeo yaka yola ambayi akatendiki dhambi. Kwa kuva upandi wongi, hukumu yi adhabu yikahikiki ndandi yi lihoku laka mundu yumu. Nambu ku upandi wongi, kipawa cha waka chechihuma kupete kuvelengeka haki kikahikiki baada yi mahoku yanawinge. ¹⁷ Ku ndandi, nayivi ku lihoku laka yumu, nyiwa yikatawala kupete yumu, nganila petu vala ambawu vayopa neema yinawingi papamu ni kipawa kupete maisha yaka yumu,Yesu Kristo. ¹⁸ Vela basi, ngati kupete lihoku limo vandu voha vakahika kweni hukumu, ingawa kupete tendu limo li haki kukahika kuvalangiwa haki yi maisha ku vandu voha. ¹⁹ Kwa kuva ngati kupete kutokuhinika kwaka mundo yumu vanawingi vakatendwa veni dhambi, vela kupete uhiniku waka yumu vanawingi vatendekika veni haki. ²⁰ Nambu shelia yikayingi papamu, ili kuye lihoku liweza kuyenea. Nambu mahala ambapu dhambi yikazidi kuva yinawingi, neema yikayonjukeka hata nganila. ²¹ Yenje yikapitali ili kuye, ngati dhambi moyatawala kupete nyiwa, ndi hata neema yiweza kutawala kupete haki ku ajili yi maisha yi mileli kupete Yesu Kristo Bambu witu.