¹ Henu tenga tetivi ni makili yitupasa kuutotola udhaifu wu vavavi dhaifu, ni ngachetipaswa kujipendezesha taveti. ² Kila yumu witu ampendeza jilani yaki kwani ni jambu jema, ku lengu li kunchenga. ³ Kwani hata Kristo ngacheakajipendizi mweni. Badala yaki, akavi ngati moyalembakiki, "Matondu yi vala vavakutukine yanipatiki nenga. ⁴ Ku chochela chechikalonguli kulembekeka, chikalembakiki ku kutuelekeza, ku kusudi kuye kupete uhinakilu ni kupete kuyeghewa moyu ni malembu tukavya ni ukangamahu. ⁵ Henu Chapanga wu uhinakilu ni wu kuyeghe moyu avapekya kuva ni nia sawa kwaka kila yumu kulengana ni Yesu Kristo. ⁶ Aweza kutenda lenel ku nia yimu muweza kumusifu ku ndomu wumu Chapanga ni Tati waka Bambu witu Yesu Kristo. ⁷ Ku vela munjopalya kiia yumu, ngati vela Kristo moakavayopali, ku utukufu waka Chapanga. ⁸ Kwani nivaha kuye Kristo akatendakiki ntumishi wu tohala ku niaba yi chakaka yaka Chapanga. Akatendiki vela ili kuye aweza kuthibitisha ahadi heyikawohakiki kwaka vakatati, ⁹ ni ku mataifa kuntukuza Chapanga ku neema yaki. Ngati ambavyu yilembakiki, "ku vela nayiwoha sifa kwaku miongoni mu mataifa ni kuyemba sifa kupete lihina laku". ¹⁰ Kaveti nivaha, "Mufulahia, mwenga vandu wu mataifa, papamu na vandu vaki." ¹¹ Ni kaveti, "Munsifwayi Bambo, mwenga mataifa yoha; leka vandu wu mataifa yoha vansifwa yombe." ¹² Kaveti Isaya avaha, "Kwava ni shina laka Yese, ni yumu yoayinuka kuvatawala panani yi mataifa. Mataifa vaya ni tumaini kupete yombi." ¹³ Henu Chapanga wu tumaini avatweliha ni fulaha yoha ni amani ku kuamine ili kuye muweza kuzidi mu tumaini ku makili yaka Roho Muhuhu. ¹⁴ Nenga namweni kave nishawishiwi nimwenga, valongu vangu. Nishawishiwi kuye kave mwenga maveni mutwelikiki ni wema, mutwelikiki ni maalifa yoha. Nishawishiwa kuye, mwenga muweza kave kuhimizana kiia yumu ni njake. ¹⁵ Nambu nilemba ku ukangamahu nganila kwinu panani yi mambu fulani ili kuvakombosha kaveti, ndava yi kipawa cheanipeki Chapanga. ¹⁶ Kipawa chenjeni chikavi kuye niweza kuva ntumishi waka Yesu Kristo yoakatumakiki ku mataifa, kuliwoha ngati kuhani wu injili yaka Chapanga. Nikayaniweziki kutenda vela ili kuliwoha kwangu ku mataifa kuva kuyetakiki, kutekutengwa ni Chapanga ku ndela yi Roho Muhuhu. ¹⁷ Vela fulaha yango yivi kupete Kristo Yesu ni ku mambu yaka Chapanga. ¹⁸ Kwani nganiwezi kuthubutu kulonge lokapi isipokuva kuye Kristo akamilishi kupete kwango uhinikilu wu mataifa. Mambu yanaya yatimiziki ku lilovi ni tendu, ¹⁹ ku makili yi ishala ni maajabu, ni ku makili yaka Roho Muhuhu. Aye yikavi ili kuye kuhuma ku Yerusalemu, ni kuhyongulutela kutali ngati Iliriko, niweza kuyitola kunja ku ukamilifu injili yaka Kristo. ²⁰ Ku ndela yeneyi, nia yangu yivi kuyitangaza injili, nambu nga mahala Kristo amanyikana ku lihina, ili kuye nikaweza kuchenga panani yi msingi waka mundu niyongi. ²¹ Ngati moyilembakiki: '' Ambawu kwaka yombi ngachevavi ni habali yaki akahikiki vambona, ni vala ambawu ngachevakanjowini vatamufahamu." ²² Ku vela nikavi kave vanihivalaki mala yinawingi kuhika kwinu. ²³ Nambu henu ngachenivi kaveti ni sehemu yokapi ku mikoha yenje, ni nivi nitokule mu hyaka yinawingi kuhika kwinu. ²⁴ Vela mala yoha niyenda ku - Hispania, nitumaini kuvawona panapeta, ni kuweza kupelekwa mu ndela yangu ni mwenga, badala yi kuva nifulahili ushilika ni mwenga ku muda. ²⁵ Nambu henu niyenda ku-yerusalemu kuvahudumi vaumini. ²⁶ Ndava yavapendizi vandu wuku Makedonia ni Akaya kuhenga changizu maalumu kwaka masikini miongoni mu vaumini kola ku Yerusalemu. ²⁷ Ena, yikavi mu upendu wawu, ni chakaka, vavi vadeni vawu. Mambu nayivi mataifa vashiliki mu mambu yawu yi kiroho, vadaiwa ni vombi kave kuvahudumi mu mahitaji yi hindu. ²⁸ Ku vela, chikahi nikamilishi vela ni kuva ni utosheleku wu tunda leneli kwawu, nenga nayenda mundela papamu nimwenga kola ku Hispania. ²⁹ Nimanyi kuye, chikahi nahika kwinu, nahika mu utimilifu wu balaka yaka Kristo. ³⁰ Henu ninsihi, valongu, kwaka Bambu witu Yesu Kristo, ni ku upendu waka Roho, kuye mushilika papamu ninenga mu malowu yinu kwaka Chapanga ku ajili yangu. ³¹ Mulova kuye naweza kuokulewa kuhuma kwawu vanga ni luhiniku mu Yudea, ni kuye huduma yangu kola ku Yerusalemu yiweza kuyopeleka ni vaumini. ³² Mulova kuye niweza kuhika kwinu ku fulaha kupete mapalilu yaka Chapanga, ni kuye niweza kuva papamu ni mwenga, kupata kupomulela. ³³ Ni Chapanga wu amani aya papamu ni mwenga mawoha. Amina