¹ Niyo ukwerihe Kristo. Siyo mongo, naho fanyanyi gho jirayo hawe na ani he Swaho Mnyakhare, ² ite helo vuhuye vugiru na kuhiriisha kusihe mwisho za he swaho gho. ³ Ite teseedumuye ani salaghu kubusuwe na kukewe uda ne Kristo kwa mburi ja vabahu gho, huvo va jamii gho he msa. ⁴ Vo ni Vaisraeli. Vekwae he kutoti sa va-inyi, va unyakhare, wa maaghano, naho zawadi ja sheria, kumwaresi Kiumbi, na kilagha. ⁵ Vo nivaza-ka-e ehuko Kristo elitiye he heshima ku-oro msa yao - ehuye uye ni Kiumbi wa vikabuna. Na-uye atogolwe azeto na azeto. Amina. ⁶ Mira sihe ite kilagha vya Kiumbi vyaatahowe kutimia. Ake sihe kira mhe eata Israelk ni Muisraeli erehu. ⁷ Sicho neri he uzao wakwe Abrahamu kukwa ni va-inyi ku-u erehu. Mira, "Nikutahoiya Isaka uzao kechi unesewe. ⁸ Yayo ni kuba, Va-inyi va msa si va-inyi va Kiumbi. Mira va-inyi va kilagha vewesiwa kukwa sa uzao. ⁹ Ake yacho nicho kilagha: "He majira yayo ninelita, ne Sara ene-owe mu-inyi." ¹⁰ Sireyab, mira too Rebeka areati-i maso he mhe muwe, Isaka aba kanu - ¹¹ ite va-inyi veekwaye vecheri neri kuahowe naho teenabo-i mburi yoyose kulho kana kusa, nesa ite idumuisho la Kiumbi kuagha na usaghuro liuma, neri sihe mibo-ire, mira ni he mburi yahuye eseye. ¹² Yeeyoiwe haku-u, "Mgiru enemnyamarikia mgitutu." ¹³ Sacho cheefiritiwe kugondwa," Yakobo neemdumuye, mira Esau neemsanuiye." ¹⁴ Iji kahali tuneyo ahoni? He helo ukusa he Kiumbi? Hai neri. ¹⁵ Kwaite eyo he Musa, "Ninekwa na mbazi he huye ninemuahoiya mbazi, naho ninekwa na mbazi he huye ninemkoiya mbazi." ¹⁶ Kwato iji, si he mburi ya uye edumuye, neri si he mburi ya uye erehe egugulu, mira kwa mburi ya Kiumbi, ehuye ea-ija mbazi. ¹⁷ Kwaite magondo yeyo hakwe Farao, "He mburi yayo ereka bii neekukuturuye, nesa ite niaije nguvu gho he ari, naho nesa ite ilhe gho libirikirwe he idi ikabuna." ¹⁸ Kwato iji, Kiumbi ekwa na mbazi he wowose emdumuye, na he huye emdumuu, em-bo-i kukwa mkusa. ¹⁹ Naho uneyo hagho, "NI kiahoni echeri eaho ikusa? Ni mhama erehuye efiritiye kugumirija vyoedumuu ku-u? ²⁰ Kimzungure ku-u, mhe, ari ni ji ulandula kimzungure ne Kiumbi? Helo umuruisho wowose wa cheefinyangwe kumbaya mzafinyanga, "Ni kiahoni weenibo-iye to ani? ²¹ He mzafinyanga ekwaa telo haki ana ya kilongo kubo-i kikolhe cha matumiji maalumu kuwesiana na ifumba hulihulo, na kikolhe kihali he matumizi ya kira muaze? ²² Kimomo kai KIumbi, ehuye elo utayari wa kuaija malhaha ku-u na kubo-i nguvu ku-u ku-ilikana, eegumirije he ugumiriji wa kutosha vikolhe vya mahaha vikeiwe pere kwa huangamija? ²³ Kimomo kai ebo-iye to nesa ite a-aije ukumure wa unyakhare ku-u ana ya vikolhe vya mbazi, huvyo efiritiye kvike kwa mburi ya unyakhare? ²⁴ Kimomo kai eebo-iye yalo naho hakanu, naho bi etuseye, sihe bi kuli he Vayahudi, mira kuli he vahe va Mataifa? ²⁵ Sahucho eyoo naho Hosea: Ninevase vahe gho huvo veesikwaye vahe gho, na mzadumuwa ku-u erehuye teedumuiwe. ²⁶ Naho chinekwa ite too ireayowe hakini, 'Kune si vahe gho' too venesewe 'Va-inyi va Kiumbi erazoko." ²⁷ Isaya ezo kuwesiana na Israeli nanga cheekwaye sa mpulhe wa bahari, iseekwaye ni mashighajo huvo veneokolewa. ²⁸ Kwaite Dilao eneidori mburi ku-u ana he idi, mapema naho he kufiriti. ²⁹ Naho sahucho Isaya cho eyoye bosi, "Kai Dilao wa majeshi tetukeiye mzungure uzao kwa mburi kanu, tweseekwaye sa Sodoma, naho tweseebo-iwe sa Gomora. ³⁰ Tuneyo kiahoni iji? Ite vahe va Mataifa huvo veekwaye tevedaa haki, veepatiye haki, haki he mdarisho. ³¹ Mira Israeli, ehuye edaaye sheria ya haki, teiheye. ³² Kwa ahoni sikacho? Kwaite teveidaaye he mdarisho, mira hemibo-ire. Veekukontiye ana he isaheru la kukukonta, ³³ sacho chifiritiwe kugondwa, "Wesia, naabodija isaheru la kukukontiya he Sayuni na msaheru wa kubeni. Huye erehu edarisha he yalo tekabuu susune."