¹ Kwato tehelo hukumu ya itemo ana kini veata he Kristo Yesu. ² Kwaite kanuni ja Swaho wa uzime huo uata he Kristo Yesu yaanibi-u kukwa huru uda na kununi ya makusa na kigame. ³ Kwaite hucho sheria ichikwasiwe kuchibo-i kwaite cheekwaye kihuye he msa, Kiumbi ekabo-i. Emsughaye Mu-inyi ku-u wa salaghu he kutotisha na wa msa wa makusa akwa sadaka ya makusa, naho ekahukumu makusa he msa. ⁴ Eebo-iye to nesa misughaisho ya sheria yatimijwe za kanu, nne tusisoija he kudosa mburi ja msa, mira he kudosa mburi ja Swaho. ⁵ Huvo veudosa msa vejifanyanya mburi ja msa. mira huvo veidosa Swaho vejifanyanya mburi ja Swaho. ⁶ Kwaite fanyanyi ja msa ni kuga, mira fanyanyi ja Swaho ni uzime na m'polele. ⁷ Yacho ni kwaite huyo fanyanyi ya msa ni unkru ana ya Kiumbi, kwaite teikoiya sheria ya Kiumbi, neri temuru kuidosa. ⁸ Huvo veudosa msa tevemuru kumlhamuija Kiumbi. ⁹ Hata cho, temhata he msa mira he Swaho kai ni kweri ite Swaho wa Kiumbi tezoko za hakaghu. Mira kai mhe telo Swaho ya Kristo, uye si mku-u. ¹⁰ Kai Kristo eata za kaghu, msa wa-aga he mburi ja makusa, mira swaho ni ndime he mburi ja haki. ¹¹ chikukwa Swaho wa huye emfufue Yesu kuli ha vegaye ezoko za hakaghu, ere uyebemfufue Kristo kuli ha vegaye ene-i-o naho misa kaghu ya kigame uzime he kwalhi ya Swaho ku-u, ezokoo za kaghu. ¹² Kwato iji, vabahu gho, nne ni vadeni, mira si he msa ite tuzoko he kutoti kwa msa. ¹³ Kwaite chikukwa muzoko he kutoti kwa msa, muatasina kuga, mira chikukwa he Swaho muibo-i mibo-ire ya msa, kune mnezoko. ¹⁴ Kwaite sa hucho vakumure vekaetiwe ni Swaho wa Kiumbi, yavo ni va-inyi va Kiumbi. ¹⁵ Kwaite temdoriye swaho wa uzasughawa kahali hata muko bughu. Mira iji, mweedoriye swaho ya kubo-iwe kukwa va-inyi, erehuye heka tuzo, "Abba, Baba!" ¹⁶ Swaho salaghu era-wesia hawe na swaho klanu ite tuvainyi va Kiumbi. ¹⁷ Chikukwa tu va-inyi, iji tuvapaji naho, vapaji va Kiumbi. Na nne tu vapaji hawe ne Kristo, Chikukwa he kweri tunyamarika na uye nesa apate tutogolwa hawe nau. ¹⁸ KWaite niyatara manyamarisho ya wakati yao kukwa si kigi nikuaghati na unyakhare uneaghubulwa hakanu. ¹⁹ Kwaite viumbe vikabuna navo vila-aija he kise kigiru kughubulwa he va-inyi va Kiumbi. ²⁰ Kwaite uumbaji naho weekeiwe di he ukusa, si he kudumu ku-u, mira he mburi ku-u uye evikeye di. Ni he muariro ²¹ ite uumbaji salaghu nawo unekewe huru na kuguwe he uzasughawa wa ku-onika, na kubutuwe he uhuru wa unyakhare wa va-inyi va Kiumbi. ²² Kwaite tureile ite uumbaji nawo naho uirahiri na kunyamarika he uchungu hawe hata waijiji. ²³ Sire kabi, mira nne salaghu turelo na malimbuko ya Swaho - nne naho turaru he nafsi kanu, tukula-a kubo-iwe va-inyi, yaani ukombo wa misa kanu. ²⁴ Kwaite ni he muariro ya tweeokolewe. Mira kigi chiarirwe chikuahoikana tehelo muariro mhali wa, kwaite niji enechiarira hucho erachiaho? ²⁵ Mira tukuarira kiogi tusichiahoye, tuchila-a he saburi. ²⁶ He mburi kayo kayo, Swaho na-u etulha-ari he uhuye kanu. Kwaite tetu-iliye kuaresi chitadumuwe, mira Swaho salaghu etuaresia he kuhiri kusimuruika kuyowe. ²⁷ Naho uye ejiwesi-isha swaho e-i-iliye akiri ja Swaho, kwaite earesi he mburi kini vedarishe kuagha na midumuire ya Kiumbi. ²⁸ Na nne tuiliye ite he vakabuna vemdumuye Kiumbi, uye ebo-i makabuna hawe he ukulho, he huvo vakabuna veseiwe he kudumu ku-u. ²⁹ Kwaite huvo vakabuna eva-iliye kulholhoshi azeto, naho eevasaghure kulholhoshi azeto vatotijwe na kutoti kwa Mu-inyi ku-u, nesa uye akwa mza-ahowe wa bosi hasi ha vabahu vakumure. ³⁰ Na huvo evasaghure kulholhoshi azeto, kavo evasee navo. Nahuvo eevasee, kavo ekavataria haki. Na huvo eevatariye haki, kavo navoekavatogola. ³¹ Tuyo kiahoni iji ana ya mburi yajo? Kiumbi ekukwa bwa mkanu, ni ji eata ana kanu? ³² Uye esimlhamaya mu-inyi ku-u salaghu mira emguye he mburi kanu nne vakabuna enebeni mo kutuoiya naho mburi kabuna hawe na-uye? ³³ Niji enemulaha vasaghurwa va Kiumbi? Kiumbi ni-u mza kumutariya haki. ³⁴ Ni ji enemuhukumia itemo? Kristo Yesu ni-u egaye kwa mburi kanu, na kutahoisha kayo, uye naho efufuliwe. Naho uye enetawala hawe ne Kiumbi hodi ha heshima, na kahali ni-u etuaresia nne. ³⁵ Ni ji enetuke uda na udumuisho wakwe Kristo? Kubeni kana vuhuye, kana manyamarisho, kana kela, kana bule, kana hatari, kana luhamba? ³⁶ Sahucho chigondiwe, "He faida kechi tutaga-awe chakako kizime. Tweetariwe sa i-alu la kuga-awe." ³⁷ He mburi yajo kabuna nne ni kutaho vashindi he uye etudumuye. ³⁸ Kwaite naafiriti kukengerejika ite neri kigame, neri uzime, neri malaika, neri kisatu, nerivigi viata, neri vigi vinelita, neri nguvu, ³⁹ neri yeata ana, neri yeata di, neri kiumbe kihali chochose, techikamuru kutuke uda na udumuisho wa Kiumbi, erehuye ni Kristo Yesu Dilao kanu.