¹ Kana tem-iliye, vabahu gho (kwaite niyo na vahe vei-iliye sheria), ite sheria imtawala mhe ekukwa mzime? ² Kwaite mlage edoriiwe aorowe ni sheria he huye mwagiru ku-u eekwaye mzime, mira chikukwa mwagiru ku-u enega, enekwa akewe huru kuli sheria ya ndoa. ³ Kwato iji, too mwagiru ku-u ekuwa swaho, chikukwa ezoko na mwagiru mhali, enesewe mzinzi, Mira chikukwa mwagiru ku-u ekuga, eata huru kuli he sheria, kwato tekakwa mzinzi chikukwa ezoko na mwagiru mhali. ⁴ Kwato, vabahu gho, kune naho mweebo-iwe vegaye he sheria he kwalhi ya msa wakwe Kristo. Chaakwato nesa mpate kuunganishwa na mhali, he uye erehu efufuliwe kuli havegaye nesa tumuru kumzaya Kiumbi matuunda. ⁵ Kwaite tweekwaye he mitoire ya msa, midumuire makusa jeeka-awe he viungo kanu hekwalhi ya sheria na kuchisaiya kigame matuunda. ⁶ Mira iji twaageiwa kuli he sheria. Twaigaya huyo mitoire itupingiye. Nesa nne tupate kutumika he mitoire miku-a ya Swaho, naho sio he mitoire ya azeto ja igondo. ⁷ Tubamo iji? Sheria ni makusa? Hai neri. Hatacho, seseiliye makusa, teyeseekwa he kwalhi ya sheria. Kwaite sese-iliye kutamani kai sheria teyeseeyo, "Useetamani". ⁸ Mira makusa yeepatiye nafasi he huyo amri naho ikagera za hagho kira aina ya kutamani. Kwaite makusa hesilo sheria yaaga. ⁹ Ani neekwaye mzime ata azzeto hesilo sheria, mira irealita huyo amri, makusa yeka-aho uzime, na ani nikaga. ¹⁰ Huyo amri na erehuyo iseegera uzime ikakirii kukwa kigame hagho. ¹¹ Kwaite makusa yeepatiye nafasi he huyo amri naho ikanita. Kutahoiya huyo amri, ikaniga-a. ¹² Kwato sheria ni nyakhare, na huyo amri ni nyakhare, ya haki naho kulho. ¹³ Kwato iji huyo ereyo kulho yeekwaye kigame hagho ani? Iseekwa to neri. Mira makusa, nesa ya-ahoikane kukwa ni makusa hasa he kutahoiya huyo kulho, ikagera kigame za hagho. Yacho cheekwaye nesa ite kutahoiya huyo amri, makusa yekaongejika kukwa makusa sha. ¹⁴ Kwaite ture-ile he ite sheria uazeto ku-u nihe swaho. mira ani ni mhe wa he msa. Naadiwe di he uzasughawa wa makusa. ¹⁵ Kwaite hulo nibo-i, sili-ile kikulho. Kwaite hulo nilidumuye kulibo-i, silibo-i, naho hulo nilisanuiya, nilo lo niliboi. ¹⁶ Mira kai nikulibo-i hulo nisilidumu, nidumuiyana na sheria ya kuba sheria ni kulho. ¹⁷ Mira iji sire ani nafsi gho niyabo-iye kayo, mira nihuo ukusa uzoko za hagho, ee za he msa gho, teizoko mburi kulho. ¹⁸ Kwaite kudumu yeremakulho kuata za hagho, mira siibo-i. ¹⁹ Kwaite hulo ikulho nilidumuye silibo-i, mira hulo ikusa nisilidumuye, sire ani salaghu niralibo-i, ²⁰ Iji kai niboi hulo nisilidumuye, sire ani salaghu nibo-i, mira nihuo ukusa uzoko za hagho. ²¹ Naa-ile, kahali, iata kanuni za hagho ya kudumu kubo-i erehu ikulho, mira ukusa kweri uata za hagho. ²² Kwaite niilhamuiya sheria ya Kiumbi he uhe wa za. ²³ Mira nira niaho kanuni itotiye he viugo vya msa gho.Ima aku he kanuni ku-a he akiri gho. Inibo-i ani mateka he kanini ya makusa iate he viungo vya msa gho. ²⁴ Ani ni mhe wa vuhuye! Ni ji eneniokoa na msa yao wa kigame? ²⁵ Mira ntogolo he Kiumbi he Kristo Dilao kanu! Kwato iji. Ani salaghu he akiri gho niinyamarikia sheria ya Kiumbi. Mira, he msa niinyamrikia kanini ya makusa.