¹ Kwaite twaatariwa haki he kwalhi ya mdarisho, tulo m'polele ne Kiumbi he kwalhi yakwe Dilao kanu Yesu Kristo. ² Kutahoiya uye nne naho tulo fursa he kwalhi ya mdarisho he neema yayo huyo za ku-u tura-uma. Tulhamuiwa he ujasiri utuoiya nguvu he mburi ja ma-aze yenelita, ujasiri huo tuneshiriki he unyakhare wa Kiumbi. ³ Siheya bi, mira naho tulhamuiwa he manyamarisho kanu. Turaile ite manyamrisho yegera ugumiriji. ⁴ Ugumiriji ugera kudumuika, naho kudumuika kugera ujasiri he mburi ya maaze yelitiye. ⁵ Ujasiri yaoteupu swaho, kwaite udumuisho wa Kiumbi waasuwe he swaho kanu kutahoiya Swaho Mnyakhare, huye eeguiwe hakanu. ⁶ To tweekwaye tweere vahuye, he wakati urehuo Kristo egaye he mburi ya makusa. ⁷ Kwaite chinekwa vikuji muwe kuga he mburi ya mhe elo haki. Yayo ni ite, hangi mhe eseegali kuga he mburi ya mhe mkulho. ⁸ Mira Kiumbi aahakikisha udumuisho ku-u salaghu hakanu, kwaite too tweekwaye tucheri velo makusa, Kristo eegaye kwa mburi kanu. ⁹ Naho zaidi ya makabuna, iji kwaite twaatariwa haki he sako ku-u, tuneokolewa he kayo kuli he malhaha ya Kiumbi. ¹⁰ Kwaite, chikukwatweekwaye vankuru, tweepatanishwe ni Kiumbi he kwalhi ya kigame cha mu-inyi ku-u, kutahoisha, tureakwa twafiritiwe kupatanishwa, tuneokolewa he mizokoire ku-u. ¹¹ Sihe yabi, mira naho tulhamuiwa he Kiumbi kutahoiya Dilao Yesu Kristo, kutahoiya uye iji twaadoriya upatanisho yawo. ¹² Kwato iji,kai kutahoiya mhe muwe makusa yeebuuye he idi, he kwalhi yayo ya kigame cheebuuye he kwalhi ya makusa. Naho kigame chikasambaa he vahe vakabuna, kwaite vakabuna veeboiye makusa. ¹³ Kwaite mpaka sheria, makusa yeata he idi, mira makusa teyekatarwe too heesilo sheria. ¹⁴ Hata cho, kigame cheetawale kuli Adamu mpaka Musa, hata ana yahuvo vesibo-iye makusa sa kusaakoiya he Adamu, ehuye mfano wa uye erehu eselita. ¹⁵ Mira hata cho, zawadi ja bule si sa ukusa. Kwaite chikukwa he ikosa la muwe vakumure vekaga, kutahoisha neema ya Kiumbi na zawadi he neema ya mhe muwe, Yesu Kristo, yaazikaisha ongejika he vakumure. ¹⁶ Kwaite zawadi sio sa vizalijanya vya huye erebo-i makusa. Kwaite he bwa mhali, hukumu ya adhabu yeelitiye kwa mburi ya ku-oni mhe muwe. Mira he bwa mhali, kipawa cha bule chilijanya he kutariwa haki cheelitiye baada ya makosa makumure. ¹⁷ Kwa ite, chikukwa he kuoni kwa mhe muwe, kigame chikatawala kutahoiya muwe, kutahoisha huvo erevo venedoriya neema kumure hawe na kipawa cha haki venetawala kutahoiya maisha ya muwe, Yesu Kristo. ¹⁸ Kwato iji, kai kutahoiya ku-oni kwa mhe muwe vahe vakabuna vekalita he hukumu, hata kai kutahoiya libo-ike iwe la haki hekalita kutariwa haki ya mizokoire he vahe vakabuna. ¹⁹ Kwaite kai kutahoiya kusakoiya he mhe muwe vakumure vekabo-iwe velo makusa, kwato kutahoiya kukoiya kwa muwe vakumure venebo-iwe velo haki. ²⁰ Mira sheria yeebuuye hawe, nesaikosa limuru kusoisha. Mira hodi ambaho makusa yeezikishe kukwa makumure, neema ikaongejikisha. ²¹ Yayo yeelijanye nesa ite, kai makusa yeetawale he kigame, nicho hata neema inemuru kutawala kutahoiya haki kwa mburi ya mizokoire ya milele kutahoiya Yesu Kristo Dilao kanu.