¹ Tuneyo kiahoni kihali ite Abrahamu, aba kanu he namna ya msa, a-ahoikana? ² Kwaite chikukwa Abrahamu eetariwe haki he mibo-ire, eseekwaye na mburi ya kukutogola, mira si mbele ja Kiumbi. ³ Ake magondo yebamo? " Abrahamuemdarishe Kiumbi, naho ikatariwa haku-u kukwa haki." ⁴ Iji he mhe ebo-i nyamalo, malhanuisho ku-u teyetarwa kukwa neema, mira kukwa ideni. ⁵ Mira he mhe esibo-i nyamalo mira emdarisha uye ehuye emtariya haki esikwaye mnyakhare, mdarisho ku-u mhe kaye yaatarwa kukwa haki. ⁶ Daudi nau eyo baraka ana ya mhe huye Kiumbi emtariya haki hesilo mibo-ire. ⁷ Eyoye, "Vebarikiwe huvo evo makusa kini ya-aka-aiwa na huvo makusa kini yaaghubikwa. ⁸ Ebarikiwe mhe huye ehu Dilao temtariya makusa. ⁹ Iji he baraka yajo ni he huvo vebutuiwe elha bi, kana naho he huvo vesitahontiwe elha? Kwaite twaba, "He Abrahamu mdarisho ku-u weetariwe kukwa haki." ¹⁰ Kwato yeetariwe kimomo iji? Wakati Abrahamu eekwaye he elha, kana teena butuwe elha? Techeekwaye he kubutuwe elha, mira he kusabutuwe elha. ¹¹ Abrahamu ekadoriya alama ya elha. Yacho cheekwaye muhuri wahuyo haki ya mdarisho eelo nayo pere eesina buu elha. Vizalijanya iji ni ite eebo-ikw kukwa aba wa vakabuna vedarishe, hata kai veata hekusaabutuwe elha. Yacho chilo maana ite haki inetarwa hakini. ¹² Yacho nacho chimaanisha ite Abrahamu eebo-ike aba wa elha sihe bi hehu velianyije he elha, mira, mira naho huvo vejidosa bame jakwe aba kanu Abrahamu. Nayowo niwo mdarisho eelo nawo hehu vesibutuiwe elha. ¹³ Kwaite teyeekwaye he sheria ite kilagha cheeguiwe he Abrahamu na uzao ku-u, kilaha yacho nicha ite venekwa vapaji va idi, mira cheekwaye he haki ya mdarisho. ¹⁴ Kwaite sahuvo va sheria nivo vapaji, mdarisho waakwa bule, naho kilagha chaa kita. ¹⁵ Kwaite sheria igera malhaha, mira too ambaho tehelo sheria, naho tehelo kukoiya. ¹⁶ Kwa mburi ya chilijanya he mdarisho, nesa chikwa he neema. Vizalijanya ku-u, kilagha nikweri he uzao mkabuna. Naho vezeahoika yavo sire bi huvo veiliye sheria, mira naho huvo niva mdarisho wa Abrahamu. Kwaite uye ni aba kanu nne vakabuna, ¹⁷ sahucho chigondiwe, "Naakubo-i ari kukwa aba wa mataifa makumure." Abrahamu eekwaye he kuata kwa huye emdarishe, yaani, Kiumbi huye eva-o vegaye uzime na kujise mburi ambajo tejihata nesa jimuru kulijanya. ¹⁸ Kuroana na hali kabuna ja gana, Abrahamu he ujasiri emdarishe Kiumbi he ma-aze yenelita. Kwato ekakwa aba wa mataifa makumure, kuagha na hucho chireyowe,".... Nivyo unerakwa uzao kechi." ¹⁹ Uye teekwaye mhuye he mdarisho. Abrahamu eeyoye ite msa ku-u salaghu weekitiye kuga- eekwaye na umri wa miko igana iwe. Naho edoriane na hali ya kuga ya maso yakwe Sara. ²⁰ Mira he kwa mburi ya kilagha cha Kiumbi, Abrahamu tezero kudarisha: Mira, ekabutuwe nguvu he mdarisho naho ekamtogola Kiumbi. ²¹ Eekwaye eiliye kweri ya ite hucho erecho Kiumbi ekeiye kilagha, eekwaye naho na umuruisho wa kuchifiriti. ²² Kwato naho yeetariwe haku-u kukwa haki. ²³ Iji techigondiwe bi he faida ku-u, ite yeetariwe haku-u . ²⁴ Yeegondiwe kwa mburi kanu naho, hehuvo vekeiwe kutariwa, nne huvo tudarisha he uyw emfufue Dilao kanu Yesu kuli ha vegaye. ²⁵ Yaye ni huye erehu eeguiwe kwa mburi ya makusa kanu na kufufuliwa nesa tumuru kutariwa haki.