¹ Iji nne turelo na nguvu tudumuwe kuudoria uhuye wa velo uhuye, naho tetudumuwe kukulhamuija salaghu. ² Kira muwe amlhamuije msina ku-u ake ni mburi kulho, he mburi ya kumkwa. ³ Ake hata Kristo tekupendeze salaghu. Mira iji, cheekwaye sacho hegondiwe, "Kuolhu yahuvo vekuolhuye yaaniheya ani." ⁴ He chochose chika-eye kugondwa,cheegondiwe he kuerekeja, he mburi ite kutahoiya ugumiriji na kutahoiya swaho na magondo tweseekwaye na ujasiri. ⁵ Iji Kiumbi wa ugumiriji na wakubutu swaho ava-o kukwa na fanyanyi jitoti he kira muwe kuagha ne Yesu Kristo. ⁶ Amuru kubo-i he fanyanyi we mumuru kumtogola he lugwalu luwe Kiumbi ne Aba wa Dilao kanu Yesu Kristo. ⁷ Kwato mdorieni kira muwe, sahucho Kristo evadoriye, he unyakhare wa Kiumbi. ⁸ Ake niba ite Kristo abo-iwe mnyamalo wa elha he mburi ya ukweri wakwe Kiumbi. Ebo-iye to nesa ite amuru kuaija vilagha viguiwe he va-aba, ⁹ na he mataifa kumtogola Kiumbi he neema ku-u. Sa hucho chigondiwe, "Kwato ninegu Ntogolo hake ha mataifa na kufaru ntogolo he ilhe kechi. ¹⁰ Kahali iba, "Lhamuiwani, kune vahe va mataifa, hawe na vahe ku-u." ¹¹ Naho kahali, "Mtogoleni Dilao, kune mataifa makabuna; ro vahe va mataifa makabuna vamtogole uye." ¹² Kahali Isaya eba "Henekwa na izina lakwe Yese, na muwe eneaka kutawala ana ya mataifa. Mataifa venekwa na muariro he uye." ¹³ Iji Kiumbi wa muariro emuhuti kinyemi vakabuna na m'polele he kudarisha, nesa ite mumuru kutaho he kuarira, he nguvu ja Swaho Mnyakhare. ¹⁴ Ani salaghu naho nitekengerejwa nikune, vabahu gho. naakengerejwa ite naho kune salaghu mwaahutiweni ukulho, mwaahutiwe ni viugho vikabuna. Nikengerejeka ite, kune mumuru naho kubayana kira muwe na m-a-ro ku-u. ¹⁵ Mira nigonda he ujasiri hakaghu ana ja mburi fulani nesa kumuhulhaati kahali, he mburi ya Kipawa chonioiwe ni Kiumbi. ¹⁶ Kipawa yacho cheekwaye ite nimuru kukwa mzasughawa wakwe Yesu Kristo esughaiwe he mataifa, kukugu sa mzemo wa injili yakwe Kiumbi. Neseemuru kubo-i to nesa kukugu kugho he mataifa hakwa haadumuika, haatengwa ni Kiumbi he kwalhi ya Swaho Mnyakhare. ¹⁷ Kwato kinyemi gho chiata hakwe Yesu na he mburi ja Kiumbi. ¹⁸ Kwaite sikamuru kugali kuyo lolose mira hebi ite Kristo aafiriti kutahoiya hagho kukoiya he mataifa. Yajo mburi jaafiritiwe he kiome na kubo-i, he nguvu ja ishara na vimako, ¹⁹ na he nguvu za Swaho Mnyakhare. Yacho cheekwaye nesa ite kuli Yerusalemu, na kujungulukia uda sa Iliriko, nimuru kuidori gana he ukamirifu wa injili yakwe Kristo. ²⁰ He kwalhi yayo, fanyanyi gho yaakwa kubirikira injili, mira si hodi Kristo ho-eilike kwa ilhe, nesa ite nimuru kukwa ana he msingi wa mhe mhali. ²¹ Sa hucho hegondiwe: "Ehuvo he uye tevelo mburi ku-u eelitiye venemwaho, na huvo erevo vesimkoye vene-m-ile." ²² Kwato neekwaye naho neelhiijwe kagi kakumure kulita hakaghu. ²³ Mira iji, silo kahali hodi hohose he mikoa yayo, naho naakwa nikudumu he miko mikumure kulita hakaghu. ²⁴ Kwato kagi kakabuna nikuso Hispania, niarira kuva-aho nikutaho, na kumuru kuti-iwe kwalhi gho na kune, baada ya kukwa naalhamuiya ushirika na kune he muda. ²⁵ Mira ijinitaso Yerusalemu kuvahudumia vazadarisha. ²⁶ Ake cheeva-agize vahe va Makedonia na Akaya kubo-i msango maalumu he vahuye hasi ha vazadarisha are Yerusalemu. ²⁷ Eewa, cheekwaye he udumuisho kini, naho kweri, vaakjwa vadeni kini. Kwaite chikukwa mataifa veshiriki he mburi kini ja kiswaho, vedumuwe navo naho kuvahudumia he midumuire ya vigi. ²⁸ Kwato, too nirefiriti yavyo na kukwa na kutosha wahe ituunda yalo hakini, ani nineso he kwalhi hawe nakune are Hispania. ²⁹ Nire-ile ite, too nikunelita hakaghu, ninelita he utimirifu wa baraka jakwe Kristo. ³⁰ Iji nimusembereja, vabahu, he Dilao kanu Yesu Kristo, nahe udumuisho wa Swaho, ite msikwariane hawe na ani he kuaresi kaghu he Kiumbi kwa mburi gho. ³¹ Aresini ite nimuru kuokolewa kuli hakini vesilo na kukoiya he Yudea, naho ite huduma gho are Yerusalemu imuru kudoriiwa ni vazadarisha. ³² Aresini ite nimuru kulita hakaghu na kinyemi kutahoiya midumuire ya Kiumbi, naho ite nimuru kukwa hawe na kune, kumuru kumujika. ³³ Ne Kiumbi wa mdarisho akwa hawe na kune vakabuna. Amina.