¹ Mdorieniwowse ere mhuye he mdarisho, neri msigu hukumu he fanyanyi ku-u. ² Mhe muwe elo mdarisho wa ku-a chochose, mhali erehuye mhuye e-a mbuka bi. ³ Mhe huye e-a kira kigi esim-bere huye esi-a kira kigi. Naho huye esira-a kira kigi asimhukumu mhali huye e-a kira kigi. Kwaite Kiumbi afiriti kumdoria. ⁴ Ari ni ji, ari huye umhukumu mnyamalo huye ni wa mhe mhali? Naho mbele ja Dilao ku-u ite e-uma kikulho? Ni mbele ja Dilao ku-u ite e-uma kana elhu. Mira eneka-airwa, kwaite Dilao emuru kum-boi a-uma. ⁵ Mhe muwe ewesisha mu-aze muwe kutaho ihali. Mhali ewesisha kira i-aze he kutoti. Haki kira mhe akengerejeke he akiri ku-u salaghu. ⁶ Huye erehu edara mu-aze, edara he mburi ykwe Dilao. Naho huye e-a, e-a kwa mburi ya Dilao, kwaite e-m-o Kiumbi ntogolo. Uye naho egu ntogolo he Kiumbi. ⁷ Kwaite tehelo ezokoo he nafasi ku-u, naho tehelo egaa he mburi ku-u salaghu. ⁸ Kwaite chikukwa tuzoko, tutazoko he mburi yakwe Dilao. Chikukwa tuga,tutaga he mburi yakwe Dilao. Iji chikukwa tutazoko kana tutaga tuze mari yakwe Dilao. ⁹ Kwaite ni midumuire yakwe Kristo eegaye na kuzoko kahali, ite akwa Dilao wa vakabuna vegaye na veata swaho. ¹⁰ Mira ari, Ni kiahoni umhukumu m-bahu kechi? Na ari, kwa ahoni umbera m-bahu kechi? Kwaite nne vakabuna tune-uma mbele ja kikire cha hukumu chakwe Kiumbi. ¹¹ Kwaite hegondiwe, Sahucho nizokoye," eyo Dilao, "Hagho ani kira imuro linekomwa, naho kira luanda lunegu ntogolo he Kiumbi. ¹² Kwato iji, kira muwe kanu enegu kutara ku-u salaghu he Kiumbi. ¹³ Kwato, tusiendelee kahali kuzahukumiana, mira iji fanyanya to, ite tehelo eneke kikwazo kana mtegho he m-bahu ku-u. ¹⁴ Nire-ile naho naakengerejika he Dilao Yesu, ite tehelo kigi chikwaye chisiye salaghu. Ni he uye bi efanyanya ite chochose ni kikusa, kwaite haku-u ni ukusa. ¹⁵ Chikukwa he mburi ya viaghu mbahu kechi ehuzunika, tudaha wa kahali he udumuisho. Usi-m-oni he viaghu kechi mhe huye kwa mburi kayo Kristo eegaye. ¹⁶ Kwato msidumu mibo-ire kaghu mikulho yeavabo-i vahe kubera. ¹⁷ Kwaite udilao wa Kiumbi si he mburi ya viaghu na kuwaha, mira ni he mburi ya haki, m'polele, kinyemi he Swaho Mnyakhare. ¹⁸ Kwaite uye emnyamarikia Kristo he mburi ya adumuika he Kiumbi naho adumuika he vahe. ¹⁹ Kwato iji, na tudose mburi ja m'polele na mburi hujo jimkwa mhe mhali. ²⁰ Usionu nyamalo ya Kiumbi kwa mburi ya viaghu. Vigi vikabuna he kweri ni vikulho, mira ni vikusa he mhe huye ara-a na kumgeria uye kukukonta. ²¹ Ni kikulho kusaa-a nihena, neri kuwaha divai, neri chochose erehucho m-bahu kechi chim-sanuija. ²² Yayo midarisho maalumu yo ulo nayo, jike hasi kechi salaghu ne Kiumbi. Abarikiwa huye ekuhukumu salaghu he hucho echidumuye. ²³ Elo futofuto aahukumiwa chikukwa e-a, kwa mburi isigeriwe ni mdarisho. Naho chochose chisigeriwe ni mdarisho ni makusa.