¹ Kira nafsi naikwa nakukoiya he kisatu cha ana, kwaite tehelo kisatu mirabi iliye he Kiumbi. Naho visatu vireata vikeiwe ni Kiumbi. ² Kwato huye elhi kisatu kacho elhi amri ja Kiumbi.; nahuvo velhi venedoriya hukumu ana kini salaghu. ³ Kwaite vatawala sikukoija futo ha vebo-i makulho, mira ha vebo-ii makusa. ⁴ He udumu kusaako futo he kisatu.? Bo-i yere makulho, niho unetogolwa nicho. Kwaite ni mnyamalo wa Kiumbi hake he mburi kulho. Mira kai unebo-i yere makusa,ko bughu; kwaite teti-i luhamba hesilo mburi. Kwaite ni mnyamalo wa Kiumbi, mzalhanu nkuru kwa malhaha ana ya huye ebo-i ukusa. ⁵ Kwato ikudumu kukoiya, si bi he mburi ya malhaha, mira naho he mburi ya fanyanyi. ⁶ He mburi ya naho ulhanu kodi. Kwaite velo kisatu ni vanyamalo va Kiumbi, ambavo vene-endelea kubo-i mburi ya. ⁷ Mlhanuni kira muwe hucho vedai: kodi hehuye eye kodi: ushuru hehuye eye ushuru: futo he huye eye futo; heshima he huye eye heshima. ⁸ Mseedaiwa ni mhe kigi chochose, mira bi kudumuana kune kwa kune. Kwaite huye emdumuishe msina ku-u aatimija sheria. ⁹ Kwaite, "Teukazini, teuka-ga-a, teuka-gwa, teuka-dumu vikusa". nho kai helo amri hali naho, yaakwariwe he sentensi yayo: "Unemdumu msina kechi sa ari salaghu." ¹⁰ Udumuisho teumhiri msina wa mhe. Kwato udumuisho ni ukamirifu wa sheria. ¹¹ Kwa mburi yayo, muraile wakati, ite tayari ni wakati wa kuli he lu-ireno. Kwaite wokovu kanu waahesina sha ya he wakati huo tweezedarishaa bosi. ¹² Kiama chaasoisha, naho chakako chaahe sina. Natuke kakera mibo-ire ya kidughu, naho tuoro silaha ja luatame. ¹³ Naho tusoishishe kuaghagha, kai ni luatame, si he kinyemi cha ukusa kana kuengeli. Naho tusisoishe he zinaa kana kudumuisha kusiye kusimuruika kuro, naho sihe fitina kana wizu. ¹⁴ Mira tu-m-oro Dilao Yesu Kristo, naho tusike ntafasi he mburi ja msa, he tamaa ku-u.